Ilinniarnertuunngorniarfimmut (GUX) qinnuteqarit

GUX-imut maana qinnuteqarit

Nalinginnaasut 

Ilinniarnertuunngorniarneq (GUX) Aasianni, Sisimiuni, Nuummi aamma Qaqortumi atuagarsorluni inuusuttunut ilinniarfiuvoq. GUX ilinniarnermi sammivinnik amerlasuunik periarfissiivoq, soqutigisannut tulluarsarneqarsimalluni aamma siunissami ilinniagaqarnissannut tulluussagaavoq.

GUX ukiunik pingasunik sivisussuseqarpoq aamma Kalaallit Nunaanni nunanilu allani ilinniarfinnut ingerlaqqiffiusunut isissutaasinnaalluni.

Tunngaviusumik ilinniarneq ilinniakkallu sammivia 

GUX tunngaviusumik ilinniarnermik aamma ilinniakkap sammivianik immikkoortortaqarluni aaqqissugaavoq.

Tunngaviusumik ilinniarneq
Tunngaviusumik ilinniarneq ukiup affaanik sivisussuseqarpoq. Tunngaviusumik ilinniarneq ilinniarnertuunngorniarfinni tamani assigiippoq. Tunngaviusumik ilinniarnermi atuartitsissutit tassaapput kalaallisut, qallunaatut, tuluttut, matematik, kulturilerineq, science, ilinniariaaseq aamma timersorneq. Tunngaviusumik ilinniarnerup kingorna ilinniakkap sammivianik ilinniarneq aallartinneqartarpoq.

Ilinniakkap sammivianik ilinniarneq
Ilinniakkap sammivia tassaavoq immikkoortumi aalajangersimasumi ilinniartitsissutit arlallit. Ilinniakkat sammivii toqqarneqarsinnaasut katillugit arfineq pingasuupput. Taakku saniatigut timersorneq pingaarnertut GUX Nuummi ukiunik sisamanik sivisussuseqartoq toqqarneqarsinnaavoq. Ilinniakkap sammivianik ilinniarneq ukiut pingajuat avillugu sivisussuseqarpoq aamma periarfissaqassaatit ilinniartitsissutinik toqqarsimasannik itisiliinissannut.

Ilinniakkap sammivianik toqqaaneq
GUX-imi aallartinnginninni ilinniakkap sammivia sorleq toqqarusunnerlugu nalunaarutigissavat. Nalunaarutigisassat pituttuisussaanngilaq. Tunngaviusumik ilinniarnerpit ingerlanerani aatsaat aalajangivissaatit.
Soqutigisat malillugu aamma kommunerisanni ilinniakkap sammivia ilinniarneqarsinnaasoq malillugu ilinniakkap sammivia toqqassavat. Ilinniakkap sammivia kommunerisanni neqeroorutigineqanngippat kommunerisavit avataani ilinniakkap sammivianik toqqaasinnaavutit.

Quppersagaaqqat ataanniittut ilinniakkat sammiviinik assigiinngitsunik annertunerusumik paasisaqarusukkuit atuarsinnaavatit.

Ilinniarnertuunngorniarneq pillugu ilitsersuinermi atortussat

Atuarfinni ilinniakkat sammiviinik neqeroorutigineqartunik takussutissiaq

Piumasaqaatit 

GUX-imi aallartissaguit toqqaannartumik – Inatsisitigut minnerpaamik karakteeri E angusimassavat (tassaasoq karakteri 2, 7-trinsskala naapertorlugu):
  • 10. klassemi tamani angusannut tunngatillugu karakteeriliinerit
  • aalajangersimasumik qulequtsiilluni suliassami
  • tamani inaarutaasumik misilitsinnerni pinngitsoorani ingerlanneqartussani
GGS 7-trins
   A     12 A: Naammassisamut pitsaalluinnartumut
   B     10 B: Naammassisamut ajunngivissumut
   C      7 C: Naammassisamut pitsaasumut
   D      4 D: Naammassisamut ajorpallaanngitsumut
   E      2 E: Naammassisamut naammattumut
  FX      0 Fx: Naammassisamut naammaginanngitsumut
   F     -3 F: Naammassisamut akuerineqarsinnaanngilluinnartumut


Aammattaaq ilinniartut immikkut akuerineqarnikkut aallartissinnaapput, kisiannili ilinniagaqalernissamik qulakkeerinniffigineqanngillat. Aamma periarfissaavoq ilinniagaqalernissamut misilitsinneq aqqutigalugu tiguneqarnissaq. Meeqqat atuarfianni naammassereernerup kingornatigut siusinnerpaamik upernaakkut misilitsinneq tiguneqassaaq.

Qinnuteqarneq 

GUX-imi tiguneqarniarlutit qinnuteqarniaruit, qinnuteqarnermi immersugassaq najukkanni Majoriarmut tunniutissavat, Sullissivik aqqutigaluguluunniit qarasaasiakkut attaveqaat toqqaannartoq atorlugu qinnuteqarsinnaavutit. Qinnuteqarfissap marsip aallaqqaataa killigaa.

NemID’qaruit
NemID’eqaruit NemID atorlugu isersinnaavutit toqqaannartumillu sullissivik.gl-ikkut qinnuteqarlutit.

Imminut sullinneq qulaaniittoq tooruk NemID’lu atorlugu iseriarlutit aallartillutit.

Eqqaamallugu
Sullissivik.gl-ikkut GUX-imut qinnuteqassaguit qinnuteqarnermut uppernarsaat takussutissatut toqqussallugu pingaaruteqarpoq.

Qinnuteqarninni mail-it allakkukku uppernarsaat mail-ikkut pissarsiarissavat.

NemID’qanngikkuit
NemID’qanngikkuit qinnuteqaammik ’Kalaallit Nunaanni ilinniakkanut aamma ilinniagaqarnersiutinut qinnuteqaat immersugassaq’ aqqutigalugu aallersinnaavutit Majoriarmullu illoqarfigisamiittumut tunniullugu imaluunniit qinnuteqaat immersoreernikoq nassiullugu.

Ilitsersuut atuaruk qinnuteqarnissamut immersugassap pappialartaata immersornissaanut

Isiginnaagassiaaraq ilitsersuut takuuk - GUX-imut qanoq qinnuteqassaanga?

Isiginnaagassiaaraq takuuk GUX-imi ilinniakkat sammivii pillugit

Ilinniarnertuunngorniartarfiit annertunerusumik paasisaqarfiginiarukkit www.sunngu.gl-imi atuarsinnaavatit.

Malugiuk
Ilinniakkamut tiguneqarnissat qinnutigigukku, imaanngilaq ilinniartut inaannik ingerlaannartumik tunineqarnissat naatsorsuutigissagit.

Piffissaliussat 

Qinnuteqarfissamut 1. marts killigitinneqarpoq.
Majoriaq
Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoqarfik
Imaneq 4
Postboks 1029
3900 Nuuk

Oqarasuaat: (+299) 34 50 00
E-mail: ikiin@nanoq.gl
Nittartagaq: www.naalakkersuisut.gl