Qinnuteqarneq

Qinnuteqarneq 

Suliffeqarfiit nunani allani tunineqarsinnaasutut naleqquttunik nioqqutissiorpat, nioqqutissiatit avammut nioqqutigineqassanersut eqqarsaatigisinnaavat. Kalaallit Nunaanniit nioqqutissanik avammut niuersinnaajumallutit akuersissummik peqartariaqarputit.

Avammut nioqquteqarnissamut akuersissummik pissarsiniaraanni, akuersissummut normumik pigisaqaqqaartariaqarputit. Akuersissummut normu tassaavoq suliffeqarfinnik avammut nioqquteqartunik nalunaarsuineq. Akuersissummut normumik Inuussutissalerinermut Immikkoortortaqarfimmi Aalborgimiittumi qinnuteqarsinnaavutit. Taakku e-mail-ikkut: v-foedevare.aalborg@fvst.dk-kut aamma allakkasuaatikkut (fax): 72 27 50 03-kut attavigineqarsinnaapput. Qinnuteqaatinni makku eqqaamassavatit:
  • Suliffeqarfivit aqqa
  • Najugaq 
  • Postboks
  • Allakkasuaatip normua (fax nr.)
  • Tunisassiorfiup najugaa

Akuersissutip normua pissarsiarigukku avammut nioqquteqarnissamut akuersissummik qinnuteqassaatit. Nioqqutissiat suut avammut niuerutiginissaannut akuersissuteqarfigerusutatit pillugit qinnuteqaammi erseqqinnerusumik allaaserinnissaatit.

Qinnuteqaatit Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmut nassiutissavat.

Naalakkersuisoqarfiup qinnuteqaatit tiguguniuk, avammut niuersinnaanermut akuersissummik tunissavaatsit. Akuersissut nioqqutissianut tassani allattorneqarsimasunut aamma ukiumut akuersissuteqarfiusumut taamaallaat atuuppoq. Tamanna isumaqarpoq avammut nioqquteqarnissamut akuersissutit ukiut tamaasa nutartertarnissaa eqqaamassagit.


Nutarternera
Avammut nioqquteqarnissamut akuersissutit periutsit marluk atorlugit nutartersinnaavat:
  1. Nioqqutissiat assingi avammut nioqqutigeqqinniarukkit avammut nioqquteqarnissamut akuersissutit nutartigassanngorlugu Naalakkersuisoqarfimmut nassiutiinnassavat
  2. Akuersissutinnut nioqqutissianik ilanngusserusukkuit, tassa siusinnerusukkut akuersissuteqarfiginngisannut tunisassianik avammut nioqqutigerusutannik qinnuteqarlutit, qinnuteqaammik nutaamik Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmut nassiussissaatit. Tassani suut avammut niuerutiginissaannut akuersissuteqarfigerusutatit pillugit erseqqinnerusumik allaaserinnissaatit 

Malugiuk
Avammut nioqquteqarnissamut akuersissutit nioqqutissianik aalajangersimasunik avammut nioqquteqarnissamut akuersissutaapput, soorlu aalisakkat imaluunniit puisit amii. Nioqqutissianut aalajangersimasunut avammut nioqquteqarnissamut akuersissummik pissarsiguit, nioqqutissiat qanoq annertutigisut avammut nioqqutigissanerlugit nammineq aalajangissavat.

Allaaserisat attuumassutillit

Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik
Imaneq 1A 301
Postboks 1601
3900 Nuuk

Oqarasuaat: (+299) 34 50 00
Fax: (+299) 34 63 64
E-mail: isiin@nanoq.gl
Inuussutissarsiorneq pillugu nittartagaq: businessingreenland.gl
Nittartagaq: www.naalakkersuisut.gl