Nalinginnaasumik paasissutissiineq siunnersuinerlu

Nalinginnaasumik paasissutissiineq siunnersuinerlu 

Suliffeqarfiit nunani allani tunineqarsinnaasutut naleqquttunik nioqqutissiorpat, nioqqutissiatit avammut nioqqutigineqassanersut eqqarsaatigisinnaavat. Kalaallit Nunaanniit nunamut allamut nioqqutissanik avammut nioqquteqarniaruit, nioqqutissiat assigiinngitsut anninneqarneri pillugit malittarisassat alaatsinaassavatit, pingaartumik nunami tigusisussami eqqussuinermut malittarisassat.


Annissuineq pillugu malittarisassat
Annissuineq pillugu malittarisassanut assersuutitut taaneqarsinnaapput:
  • Uumasunik nungoratarsinnaasunik passussineq niuernerlu pillugu CITES-ip malittarisassai
  • Aatsitassanik avammut niuerneq pillugu malittarisassat
  • Inuussutissanik avammut niuerneq pillugu malittarisassat 
  • Sermip erngullu avammut nioqqutigineqarneri pillugit malittarisassat
  • Isumalluutit Uumassuseqartut avammut nioqqutigineqarneri pillugit malittarisassat 
  • Kalaalimernit anninneqarneri pillugit immikkut malittarisassat
  • Pisattanik nutserineq pillugu immikkut malittarisassat

Eqqussuineq pillugu malittarisassat siunnersuinerlu
Nunani tigusisuni eqqussuineq pillugu malittarisassat nunamiit nunamut aamma niuerfigineqartumiit niuerfigineqartumut assigiinngitsorujussuupput. Taamaattumik Kalaallit Nunaanniit nioqqutissanik avammut niuernissaq eqqarsaatigigukku tamakkunatigut ilisimasaqartunit siunnersortissarsiorneq isumalatsialaavoq.

Nioqqutissanik avammut niuernermut atatillugu pisariaqartutigut inuit suliffeqarfiillu siunnersorneqarnissaat qulakkeerniarlugu Namminersorlutik Oqartussat aaqqissuussinernik assigiinngitsunik pilersitsinikuupput, suleqatigiiffinnillu pingaaruteqartunik isumaqatigiissuteqarlutik. Aaqqissuussinerit isumaqatigiissutillu tassaapput:
  • Avammut niuernermut tunngatillugu qiortagaq, avammut niuernissamut pilersaaruteqarnermut atatillugu ilisimasaqarluartunit ikiorserneqarsinnaanermut tapiissuteqartarneq pillugu aaqqissuussineq. Avammut niuernermut tunngatillugu qiortakkamik qinnuteqarniaruit, illit kommuuninni inuussutissarsiornikkut siunnersuisarfimmut imaluunniit Greenland Business saaffiginnissaatit
  • Greenland Business-imik sullissinissamut isumaqatigiissut, aallarniutaasumik siunnersortinneqarnissamik aamma niuernissamut pilersaarutip annertusinissaanut ikiorteqarnissamut qulakkeerinnittoq
  • Danmarks Eksportråd-imik isumaqatigiissuteqarneq, kalaallit suliffeqarfiisa siunnersorteqarnissaannik qulakkeerinnittoq

Danmarks Eksportråd tassaavoq Danmarkimi Nunanut Allanut ministeriaqarfiup ataani immikkoortortaqarfik. Avammut niuernissaq pillugu Danmarks Eksportråd-imi siunnersortinnissaq pillugu isumaqatigiissuteqarnissap aaqqissuunnissaanut Greenland Business ikiuussinnaavoq.


Malugiuk
Teknologi-imut ilisimatusarnermulluunniit atorneqartussanik isumalluutinik uumassuseqartunik avammut niueruteqarnissaq pilersaarutigigukku tamanna pillugu akuersissuteqassaatit. Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmut e-mail isiin@nanoq.gl aqqutigalugu saaffiginninnikkut akuersissut pissarsiarisinnaavat.

Isumalluutit uumassuseqartut assersuutigalugit tassaasinnaapput:
  • bakteriat pissuseqatigiiaat
  • immap sissallu naasuisa ilaat (quajaatit qeqqussallu ilaat)
  • DNA-mit tigusinerit
  • enzymit
  • vitaminit aamma nunatsinni uumassuseqartuniit nerisat tapiitut nioqqutissiat

Allaaserisat attuumassutillit

Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik
Imaneq 1A 301
Postboks 1601
3900 Nuuk

Oqarasuaat: (+299) 34 50 00
Fax: (+299) 34 63 64
E-mail: isiin@nanoq.gl
Inuussutissarsiorneq pillugu nittartagaq: businessingreenland.gl
Nittartagaq: www.naalakkersuisut.gl