Tunisassianik ineriartortitsinermut immikkoortitat – Qinnuteqarneq

Tunisassianik ineriartortitsinermut immikkoortitat – Qinnuteqarneq 

Inuussutissarsiutitigut suliniutit ineriartornissamut periarfissaqartut assigiinngitsutigut siuarsarnissaat siunertaralugu immikkoortitanik Namminersorlutik Oqartussat pilersitsinikuupput. Immikkoortitat taaguuteqarput Tunisassianik ineriartortitsinermut immikkoortitat, aningaasanullu inatsisinik tunngaveqarlutik. Tamanna isumaqarpoq nunami inuussutissarsiutinut takornariartitsinermullu siuarsaaqataasunut ingerlatanut Namminersorlutik Oqartussat ukiut tamaasa aningaasanik immikkoortitsisassasut.


Inuussutissarsiuteqaruit aamma GER normoqarlutit imaluunniit pissarsiaqangajalerlutit tunisassianik ineriartortitsinermut tapiissutissanik qinnuteqarsinnaavutit. Ukioq kaajallallugu pisariaqartitsinerlu naapertorlugu tunisassianik ineriartortisinermut qinnuteqarsinnaavutit.

Tunisassianik ineriartortitsinermut qinnuteqarniaruit qinnuteqarnermi immersuiffissiaq atussavat. Taanna uani www.inussuk.gl -imi nassaarisinnaavat. Qinnuteqaatinni makku allaaserissavatit:

  • Kaaviiaartitatit aamma / imaluunniit isertitatit pilersaarutip qanoq annertunerulersissinnaagai
  • Pilersaarutip suut nutaarsiassartarivai. Tassa pilersaarutip nunamut tamarmut imaluunniit nunap immikkoortuanut atatillugu nutaajussaaq


Pingaaruteqarpoq pilersaarutivit nutaarsiassartaqarnissaa. Tunisassianut assigusunut ingiaaniartunut pilersaarutinut Namminersorlutik Oqartussat tapiissuteqarsinnaanngillat.

Qinnuteqarnermi immersugassiaq immersoreerukku kommunimi inuussutissarsiornermut siunnersuisarfianut nassiutissavat. Eqqaamajuk missingersuusiaq qinnuteqaatinnut ilanngutissagakku.


Akuersineq

Namminersorlutik Oqartussanit atsiorneqarsimasumik akuersissummik tigusaqaruit tunisassianik ineriartortitsinissamut tapiiffigitinnissannut neriorsuummik pissarsisimassaatit. Tunisassianik ineriartortitsinermut tapiissuteqarnissamut akuersineq ukiumi akuersiffiusumi atuuppoq.


Tunniussineq

Ullup akuersiffiusup kingorna ukiup nikinnissaata tungaanut aningaasartuutinnut tapiissutisisinnaavutit. Tapiissutisiatit tiguniarukkit akiligassiissutitit kommunip inuussutissarsiornermut siunnersuisarfianut nassiutissavat. Akiligassat nassiunneqartut 50 %-ii tikillugit tapiiffigineqarsinnaavutit.

Pilersaarutivit naammassinerata kingorna kingusinnerpaamik qaammatit pingasut kingorna pilersaarutit pillugit nalunaarusiat kommunip inuussutissarsiornermut siunnersuisarfianut nassiutissavat.


Malugiuk

Pingaaruteqarpoq immersugassiap eqqortumik immersorsimanissaa, taamaalilluni suliamik suliarinninneq sukkasuumik ingerlanneqarsinnaammat. Immersugassiap qanoq immersornissaanut apeqqutissaqaruitkommunimi inuussutissarsiornermut siunnersuisarfiani ikiorserneqarsinnaavutit. Tassani immikkoortitanut annertunerusumik apeqqutigisinnaasatit akissuteqarfigineqarsinnaapput.

Qinnuteqaativit suliarinerani suliamik suliarinnittoq nipangiusimasussaatitaaffeqarpoq.

Allaaserisat attuumassutillit

Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik
Imaneq 1A 301
Postboks 1601
3900 Nuuk

Oqarasuaat: (+299) 34 50 00
Fax: (+299) 34 63 64
E-mail: isiin@nanoq.gl
Inuussutissarsiorneq pillugu nittartagaq: businessingreenland.gl
Nittartagaq: www.naalakkersuisut.gl