Atuisartut Pisisartullu Maalaarutaannik Aalajangiisartunut maalaaruteqarneq

Atuisartut Pisisartullu Maalaarutaannik Aalajangiisartut maalaaruteqarnissamik immersuiffissaq

Atuisartut Pisisartullu Maalaarutaannik Aalajangiisartunut maalaaruteqarneq 

Inuussutissarsiutilinnit inatsisit naapertorlugit pineqarnissamik qulakkeerinnittumik Kalaallit Nunaanni atuisartutut pisinnaatitaaffeqarputit. Tamanna unioqqutinneqarpat – soorlu pisiaq akornutilik nioqquteqartumit aaqqiiviginiarneqanngippat, arlalitsigut akeqanngitsumik ikiorserneqarnissamut periarfissaqarputit.

Taama pisoqartillugu Atuisartoqarnermut Unammilleqatigiinnermullu Aqutsisoqarfik imaluunniit Atuisartut Pisisartullu Maalaarutaannik Aalajangiisartut attavigisinnaavatit.


Atuisartoqarnermut Unammilleqatigiinnermullu Aqutsisoqarfik
Atuisutut pisinnaatitaaffitit unioqqutinneqaqqunagit inuussutissarsiutillit atuisut illersorneqarnissaat pillugu inatsisinik maleruaanerat, Atuisartoqarnermut Unammilleqatigiinnermullu Aqutsisoqarfimmit nakkutigineqarpoq. Pisinnaatitaaffinnut assersuutitut ilaatigut makku taaneqarsinnaapput:
  • Pisiap ajoqutillip pisiarineraniit ukiut marluk iluanni naammagittaalliuuteqarsinnaatitaaneq
  • Pisinermiit ukiut marluk qaangiutinnginneranni – pisiap ajoquteqarnerata amigaateqarnerataluunniit paasineraniit qaammatit marluk iluanni – naammagittaalliuuteqarneq tamatigut piffissaliussamik eqquinerussaaq
  • Qarasaasiakkut niuernermi pisianik ullunik 14-inik piffissaqarluni utertitsisinnaaneq
  • Akikillisanik neqeroorutinillu pisinermi naammagittaalliuuteqarsinnaatitaaneq

Pisinnaatitaaffiit qulaani taaneqartut avaqqunneqarsinnaanngillat – assersuutigalugu ukiup ataatsip iluani naammagittaalliuuteqarsinnaanerit atsiornikkut akuerisimagaluarukkuluunniit – ukiut marluk iluanni naammagittaalliuuteqarsinnaanerit avaqqunneqarsinnaanngilaq.

Pisinnaatitaaffiit assersuutissallu arlalippassuupput. Illit nammineq qanoq inissisimanerit nalornissutigigukku Atuisartoqarnermut Unammilleqatigiinnermullu Aqutsisoqarfik attavigisinnaavatit. Atuisartututtaaq pisinnaatitaaffinnut tunngasumik nalinginnaasumik apeqqutissaqaruit Atuisartoqarnermut Unammilleqatigiinnermullu Aqutsisoqarfik attavigisinnaavatit.


Atuisartut Pisisartullu Maalaarutaannik Aalajangiisartut
Niuertup illillu akunnissinni aaqqissinnaanngisassinnik isumaqatigiinngissuteqarussi, Atuisartut Pisisartullu Maalaarutaannik Aalajangiisartunut niuertoq naammagittaalliuutigisinnaavat.

Atuisartut Pisisartullu Maalaarutaannik Aalajangiisartut suliap ingerlannissaanut pisinnaatitaaffeqarninni naliliivigereerunikku illuatungeriillu tusarniaavigineqareerpata suliaq aalajangiivigissavaat.

Atuisartut Pisisartullu Maalaarutaannik Aalajangiisartunut naammagittaalliuuteqarneq akeqanngilaq.


Malugiuk
Atuisartoqarnermut Unammilleqatigiinnermullu Aqutsisoqarfiup nittartagaanni www.atuisoq.gl-imi makku annertunerusumik paasisaqarfigisinnaavatit:
  • Atuisartutut pisinnaatitaaffitit
  • Atuisartut Pisisartullu Maalaarutaannik Aalajangiisartuni suliat aalajangiivigineqarsimasut
  • Nioqqutinik misileraanerit
  • Inatsisit tunngaviusut