Annikitsumik misissuineq piiaanerlu – Peqateqarluni imaluunniit kisermaassilluni

Annikitsumik misissuineq piiaanerlu – Peqateqarluni imaluunniit kisermaassilluni 

Annikitsumik misissuinissamut piiaanissamullu pisinnaatitsissutitit assigiinngitsut marluupput:
  • Allanik peqateqarluni pisinnaatitsissutit kisermaassisinnaatitaanani
    Pisinnaatitsissut DKK 500,- akeqarpoq (qinnuteqaammut aamma nalunaarsorneqarnermut akiliut)
  • Kisermaassilluni pisinnaatitsissutit
    Pisinnaatitsissut DKK 1.000,- akeqarpoq (qinnuteqaammut aamma nalunaarsorneqarnermut akiliut)

Annikitsumik misissuinissamut piiaanissamullu pisinnaatitsissutit kisermaassisinnaatitaanani
Annikitsumik misissuinissamut piiaanissamullu pisinnaatitsissutini kisermaanneqarsinnaanngitsuni pineqarput, sakkuutit atortullu tigummiarneqarsinnaasut atorlugit aatsitassanik katersinerit. Innuttaasut piniarnermik aalisarnermillu inuussutissarsiuteqartut saniatigooralugu katersisarnissaat naatsorsuutigineqarpoq
  • Pisinnaatitsissut ukiuni pingasuni atuuppoq
  • Pisinnaatitsissut inunnut ataasiakkaanut kisiat tunniunneqassapput, suliffeqarfinnuunngitsoq
  • Pisinnaatitsissut amerlanerpaamik inunnut tallimanut tunniunneqassaaq
  • Kalaallit Nunaanni kommunit sisamat iluanni misissuinissamik piiaanissamillu pisinnaatitsivoq
  • Sumiiffinni kisermaassilluni aatsitassarsiornissanik akuersissutitalinni nalunaarutigineqareersimasumiluunniit illit aatsitassanik katersinissat piiaanissallu akuerineqanngilaq
  • Pisinnaatitsissummik pigisaqartoq taassumaluunniit inoqutai kisimik, pisinnaatitsissuteqarfimmi aatsitassanik misissuillutillu piiaasinnaatitaapput
  • Aatsitassanik akisuunik (diamantit, safirit, rubinit, smaragd-it, chrysoberyl-it, opal-it) piiaaniaruit tuniniaarusukkuillu sumiiffimmut piiaaffiusussatut kissaatigineqartumut kisermaassisinnaatitaaffeqarluni annikitsumik aatsitassarsiornissamut akuersissummik aamma § 38 naapertorlugu akuersissummik qinnuteqassaatit. Uani sammisaq paasissutissartai atuarneqarsinnaapput immikkoortumi uani:  Annikitsumik misissuineq piiaanerlu – Nalinginnaasumik paasissutissiineq qinnuteqarnerlu.
  • Aatsitassarsiorneq ingerlanneqassaaq atortut tigummiarneqarsinnaasut mekanisk-iunngitsut atorlugit, soorlu kaataq, qussaataq, sillat aamma ikuttaq
  • Aatsitassanut Ikummatissanullu Aqutsisoqarfimmut qinnuteqarnikkut aatsitassanik paasisassarsiornianik angallassisinnaanermut akuersissummik pisinnaavutit
  • Misissuinissat aamma piiaanissat qanoq amerlatiginissaat aalajangersagaanngilaq
  • Misissuisimaninnit piiaaninnillu nalunaarusiaq ukiumut ataasiarlugu nassiutissavat

Annikitsumik misissuinissamut piiaanissamullu kisermaassilluni pisinnaatitsissutit
Annikitsumik misissuinissamut piiaanissamullu kisermaassilluni pisinnaatitsissutini pineqarput aatsitassarsiornerit piorsarsimanerulaat teknikkikkut atortoqarluni ingerlanneqartut, siunniussaqarluni pilersaarusiukkamik aatsitassamik peqarneranik ilisimasaq imaluunniit aatsitassamik peqarsinnaaneranik tutsuiginartumik ilisimasat aallaavigalugit piiaanerit
  • Pisinnaatitsissutit ukiuni pingasuni atuupput
  • Pisinnaatitsissut amerlanerpaamik inunnut tallimanut tunniunneqassaaq
  • Misissuinissamut piiaanissamullu pisinnaatitsissut sumiiffimmi 1 km2 annertussuseqarpoq, illit nammineq aalajangersugassat (1000 x 1000 meter-it avannamut kujammut killeqarfii takeqqatigiit aamma kangimut kujammut killeqarfii takeqqatigiit)
  • Misissuinissat aamma piiaanissat qanoq amerlatiginissaat aalajangersagaanngilaq
  • Pisinnaatitsissummik pigisaqartoq piiaanermut akitsuummik (royalty), taamaattumik atuutsitsisoqalerpat akiliissaaq aammalu aatsitassanut nakkutiginneriaatsimut Kalaallit Nunaanni atuutsinneqalersumut sumulluunniit maleruutissalluni
  • Sumiiffik akuersissummik pigisaqarfigisaq, allat kisermaassillutik aatsitassanik misissuillutik piiaallutillu pisinnaatitsissuteqarfigisaanni inissisimassanngilaq
  • Aatsitassanut Ikummatissanullu Aqutsisoqarfiup pisinnaatitsissummik pigisaqartup inuit qulingiluat tikillugit sumiiffimmi sulisorisinnaagai akuersissutigisinnaavaa
  • Atortorissaarutit assammik tigummiarneqarsinnaasut, ilaallutik sakkut, sakkussat, atortut, ilitsiviit maskiinallu minnerit. Atortut tassaasinnaapput qillerutit tigummiartakkat, aatsitassanut pilattuutit aamma sillat
  • Atortorissaarutit assammik tigummiarneqarsinnaasut saniatigut atortoqarniaruit Aatsitassanut Ikummatissanullu Aqutsisoqarfimmut akuerineqarnissamik qinnuteqassaatit. Maskiinanik angisuunik aamma qillerinernik qaartitsinernillu ingerlatsiniaruit akuersissutinik tunineqarsinnaavutit
  • Avatangiisinut sunniutaasinnaasut aatsaat naliliiffigineqassapput annertuumik suliaqartoqassatillugu avatangiisinut sunniuteqarsinnaasutut ilimagineqartumik
  • Aatsitassanut Ikummatissanullu Aqutsisoqarfimmut qinnuteqarnikkut aatsitassanik paasisassarsiornianik angallassisinnaanermut akuersissummik pisinnaavutit
  • Misissuisimaninnit piiaaninnillu nalunaarusiaq ukiumut ataasiarlugu Aatsitassanut Ikummatissanullu Aqutsisoqarfimmut nassiutissavat
  • Pisinnaatitsissut taamalu sumiiffimmik kisermaassisinnaatitaanerit ukiut qulikkaarlugit sivitsorneqarsinnaapput, taamaattorli pisinnaatitsissut ukiut 30-it sinnerlugit pigineqarsinnaanngilaq

Annikitsumik misissuinissamut piiaanissamullu pisinnaatitsissutit sumiiffinni aalajangersimasuni atuuttut sivitsortinniaraanni, pisinnaatitsiffiup piffissarititaata iluani ukiut siulliit pingasut ingerlaneranni aatsitassanik aningaasarsiutigineqarsinnaasunik nassaartoqarsimassaaq piiaasoqarlunilu. Taamaappat sumiiffimmik pisinnaatitsissut ukiut qulikkaarlugit sivitsorneqarsinnaavoq. Annerpaamilli pisinnaatitsissut ukiuni 30-ni katillugu atuussinnaavoq. Tamanna isumaqarpoq, sumiiffimmik pisinnaatitsissut assersuutitut ukiuni qulikkaartuni marlunni kiisalu ukiuni arfineq-marlunni sivitsorneqarsinnaavoq.

Allaaserisat attuumassutillit

Aatsitassanut Ikummatissanullu Naalakkersuisoqarfik
Postboks 930
3900 Nuuk

Oqarasuaat: (+299) 34 68 00
Fax: (+299) 32 43 02
E-mail: mmr@nanoq.gl
Nittartagaq: www.naalakkersuisut.gl
Aatsitassanut Ikummatissanullu Aqutsisoqarfik
Postboks 930
3900 Nuuk

Oqarasuaat: (+299) 34 68 00
E-mail: mlsa@nanoq.gl
Nittartagaq: www.naalakkersuisut.gl