Sulisoq misilittagartooq

Emma Jensen ukiuni 37-ni Qeqqata Kommunia sulisimavoq, atorfeqarninilu Sisimiut Kommuniusimasumi aallarnerlugu.
Om kommunen

Borgmesterit arfinillit aqqusaarpai 

Inuit ikitsuinnaagunarput oqarsinnaasut borgmesterit arfinillit sulisitsorinikuullugit. 1978-imi 16-nik ukiulik Emma Jensen suliffissaarsiussisarfimmut suliffissarsiorpoq. Erniinnaq aaneqarpoq, Sisimiut kommuniusimasumi sulisussatut piukkunneqarluni. Suliffillu taanna pikkoriffigilluinnarsimavaa. Ullumikkummi ukiuni 37-ini kommunimi sulereesimavoq. 

Taamanikkut oqarasuaatinik paarsisuullunilu saaffiginnittarfimmi sulisuuvoq. 

Qarasaasiaqanngilaq 

Taamanikkut qarasaasiaqanngilaq Emma Jensenip sulinermini atorsinnaasaanik, marluinnannguanillu lokal normoqartoqarluni. 
- Ullumikkut sisamaapput, qungujulluni oqarpoq. 
- Taamanikkut aamma allakkanik poortuisarpugut agguaanneqarnissaannut immikkoortitereqqissaartarpugut. Allagarpassuit blokkinukartut suliareqqissaartarpugut, oqaluttuarpoq. Ullumikkut allakkat tamangajaasa allakkerivikkut nassiuttarpagut. 

Isertuussaq 

Emma Jensen 78-mili suliffimmi aallartikkami isertugaateqarsimavoq. Aatsaallu 2012-mi, sulilerniminit ukiut 34-t qaangiuttut isertugaatiniminik suleqatini oqaluttuuppai. Tassami naqinnernik ilisarinnissinnaanngilaq.
- Ukiorpassuarni isertugaatiga isertuutiinnarumallugu aqqutissannik nassaartuaannarsimavunga. Paasisaarusunnanga allanik aqqutissarsiornissamut kakkassorujussuanngornikuuvunga, paatsiveerulluinnaraangamalu nukara ikiortigisarlugu. Asoortitaarusunnginnamami. Tassami taamatut eqqarsartarama, taamanikkummi naqinnernik ilisarinnissinnaannginneq eqqartorneqarneq ajorpoq, kommuunimi sulisutoqaq oqaluttuarpoq. 
Kingusissorujussuakkullu aatsaat paasivaa suleqatiminit suliffimminillu innarluutini pillugu tapersersorneqartorujussuulluni. 

Suleqatit nuannersut 

Angerlarsimaffimmi suliffimmilu nuannersumik ingerlagaanni inuuneq oqinnerujuaannarpoq. Aamma tamanna Emmamut atuuppoq. 
- Suleqatit assigiinngitsorpassuit aqqusaarnikuuakka. Nuannerpallaanngitsut suleqqatillu nuannerluinnartut ukiut 37-it ingerlanerani kommunimi suleqatigisarnikuuakka. Nuannersulli amerlanerupput, taakkuuppullu uannut isumaqarluartut, ullaakkullu suliartornissannut kajumitsitsisuusartut. 
Naqinnernik ilisarinnissinnaanngitsuuneq Emmamut paquminarluinnartuusimavoq. Qanoq ittuussusaatali aqqutissiuuttuaannarsimavaa. 
- Arnaq aalajangersimasuuvunga. Taamaannerma ingerlaqqinnissannut nukissaqartittuaannarpaanga, naak ilaasa pissusera paatsoortarunaraluaraat, pissuteqartuaannarpunga. Taamaattumik naqinnernik ilisarinnissinnaanngitsut pikkorissarneranut peqataanera uannut sunniuteqarluinnarsimavoq. Inuunermami annersaani toqqortuinera sunniuteqarluinnalersimammat. 
Suliffimmi Emmap ningiurisimasaata naqinnernik ilasarinnissinnaanngitsunut pikkorissarnissamut innersuussimavaa.

Misigisaq nuannernerpaaq 

Suliassat Emmamut assiigiinngitsorpassuusarput. 
- Eqqaamasanni nuannernerpaatut misiginikuusara tassaavoq, Emilie Lennerti 70-ikkunni borgmesteriugallarmat kommuuni Inspektionskibemut Beskytteren-imut unnussiortitsimmat tjeneriugama, qungajulaqaluni oqaluttuarpoq. 
2009-mi Maniitsoq kommuuniusimasoq Sisimiut kommuuniusimasorlu kattunneqarput Qeqqata Kommuniatut taaguuteqalertumik. 
- Taamattumik oqarasuaat nipangerfeerunnikuuvoq, Emma Jensen illalaarluni oqarpoq. 
- Naami, kisianni suliassat amerlipput, qujanartumilli suliassakka amerlasuut ilaagassaasinnaasaramik. 
Om kommunen

Qeqqata Kommunia

Emma Jensen

+299 70 21 00

emja@qeqqata.gl