Naligiimmik siunissaqarneq

Hermann Berthelsen, borgmesteri, Qeqqata Kommunia
Ole Dorph, borgmesteri, Qaasuitsup Kommunia
Jørgen Wæver Johansen, borgmesteri, Kommune Kujalleq

Siulequt 

Allannguissagaanni nukittuumik aqutsisoqartariaqarpoq. Tamanna inuiaqatigiinnut sutigulluunniit tunngassuteqartuni atuuppoq, aamma pisortat isumagisaat allannguiffigissatillugit atuulluni.

Pisortat suliassaqarfiini aaqqissuussinikkut allannguisariaqarnerit ingerlanneqarnissaasa qularutigineqarnerat piffissami sivitsortumi misigaarput. Aaqqissuussaanerup aaqqissuuteqqinneqarnissaa pillugu qangaaniilli aalajangiunneqarsimasumi pilersaarutit saniatigut, pisortat suliassaqarfii nunami aningaasaqarnerup nammassinnaasaanut naleqqussarneqassapput.

Allannguinerni tamani ajugaasoqarlunilu ajorsartoqartuaannarpoq. Taamaattumik allannguinissami anguniakkat kikkunnit tamanit paasineqartariaqarput. Innuttaasunut sullissinerup sapinngisamik pitsaanerpaap pilersinneqarnissaa, pisortat suliassaqarfiisa allanngortinneqarnissaanni anguniagaavoq. Tamatumani innuttaasut akuutinneqarlutillu tusaaniarneqartariaqarput. Matumani nunap aningaasaqarnera kisimi pineqanngilaq, aammali nunap immikkoortortaanni najukkanilu innuttaasunut inuutissarsiutilinnullu pitsaanerpaamik atugassaqartitsinissap qanoq pilersinneqarnissaa pineqarluni.

Aalajangiinissat innuttaasunut sunniuteqartussaatillugit, innuttaasut eqqugaasussat qanimut akuutinneqarunik pitsaanerpaamik innuttaasunik akuutitsisoqartussaasoq kikkunnit tamanit takuneqarsinnaassaaq. Tamanna aaqqissuussaanerup aaqqissuuteqqinneqarnissaani tunngaviuvoq. Illuatungaani kommunit ilaat naleqqussarlutik nunap immikkoortortaasa sullinneqarnissaanni nukissaqassuseq pisariaqartoq naammattoq pigivaat, ilutigalugulu kommunini najugaqarfinnut qanilaassuseq nukittorsartarlugu.

Aaqqissuussaanerup aaqqissuuteqqinneqarnissaani tunngavissanut sanilliullugu, oqarluaannaraanni killorluinnaanik pisoqartoq misigaarput. Ukiuni kingullerni qulini qitiusunngorsaanermi aatsaat taamak qitiusunngorsaatigisoqarpoq. Tamanna oqaaseqarfigissanagu akueriinnarsinnaajunnaarpaput. Ataatsimoorluta aalajangiiffigisagut takorluukkat pingaartitallu maanna piviusunngortinneqartaqariaqarput, utaqqisinnaajunnaarpugut. Illoqarfiit pingaarnersaata avataani nunap immikkoortortai naalliupput, pisariaqartumillu iliuusissat piaartumik iliuuserineqartariaqarlutik.

Nalunaarusiami matumani oqariartuutit ersaripput: Aaqqissuussaanerup aaqqissuuteqqinneqarnissaatamakkiisumik atuutilersinneqarli, ilutigalugulu pisortat suliffeqarfiutai illoqarfiit pingaarnersaannit nunap immikkoortortaannut siammarneqarlik!

Naligiimmik siunissaqarusuppugut!
Hermann Berthelsen, borgmesteri, Qeqqata Kommunia
Ole Dorph, borgmesteri, Qaasuitsup Kommunia
Jørgen Wæver Johansen, borgmesteri, Kommune Kujalleq

Eqikkaaneq 

Illoqarfiit pingaarnersaanni kommunip avataaneersugut siunnersuutigaarput, Namminersorlutik Oqartussat suliffeqarfiutaasa siammarterneqarneratigut, aaqqissuussaanerullu aaqqissuuteqqinneqarnissaata naammassineqarneratigut, inuiaqatigiinni naligiimmik atugassaqartitsineq pilersinneqaqqissasoq. Kalaallit Nunaat kingumut ataqatigiillunilu nunatut nukittuutut inisseqqittariaqarpoq.

Siunnersuutigaarput, Namminersorlutik Oqartussat suliffeqarfiutai illoqarfinni assigiinngitsuni ilinniarfinnut attuumassutillit, nalinginnaasumillu najukkani iluaqutaasussat najukkani inissinneqarneratigut annertuumik ingerlatsinermi iluaqutissanik sunniivigeqatigiinnissanillu pilersitsisoqassasoq.

Siunnersuutigaarput, pisortat suliassaqarfii qanilaassusermik ilisarnaateqassasut: suliassaq najukkami suliarineqarsinnaaguuni, sapinngisamik innuttaasut qaminut tikillugit najukkami suliarineqassaaq.

Siunnersuutigaarput, illoqarfiit pingaarnersaat massakkut allaffissornikkut sikkisaanngitsumik annertuumillu isumagisaqartutut inissisimajunnaarluni, inuussutissarsiutitigut ineriartortitsinermik qitiusunngorsaanermillu ingerlatsilluni, nunap sinnerata illoqarfiit pingaarnersaannut tatiginninnera upperinninneralu pilersinneqaqqissasoq.

Siunnersuutigaarput
, Namminersorlutik Oqartussat suliffiutaat 600-t Nuummit sinerissamut siammarterneqassasut. Namminersorlutik Oqartussat suliffiutaasa, suliffeqarfiutaasa, selskabillu namminneq pigisaasa 6 procentit missaat pineqarput.

Siunnersuutigaarput, Nukissiorfiit aktianik piginneqatigiiffinngortinneqassasoq, soorluttaaq pisortat aktianik piginneqatigiiffii arlallit allanngortinneqassasut/taamaatinneqassasut.

Siunnersuutigaarput, naalakkersuisoqarfimmi suliassat imaluunniit Namminersorlutik Oqartussani politikkikkut sullissinissat kisiisa pineqartillugit, naalagaaffiup Namminersorlutik Oqartussallu suliffiutaat nutaat Namminersorlutik Oqartussanut aatsaat inissinneqartassasut.

Siunnersuutigaarput, piaartumik suliffeqarfinnik siammarsaasoqarlunilu, aaqqissuussaanerup aaqqiissuuteqqinneqarnissaa ingerlanneqassasoq. Tamanna Namminersorlutik Oqartussat inatsisaat naapertorlugu suliassanik amerlanerusunik Danmark-imit tigusinissamut tunngavissiissaaq, matumanimi akisussaaffiit taakku arlaqartut naalakkersuisoqarfimmut tunngasuugamik, manna tikillugu immikkoortortat nuuttussat allaffeqarfiinut inississammata.

Nalunaarusiaq tamakkiisumik atuaruk