2015-imi suliniutinut aqutsisutsialaat 200.000 kr.-inik pissarsitinneqarput

Atuilluartuuneq 2020-mut suliniutinut suliaqartut ingerlataqartullu akornanni Qeqqata Kommuniani akissarsititsisoqarpoq.
28. januar 2016

2020-mi Issittumi atuilluartuulluni inuiaqatigiinnut maligassiuinissaminut takorluugaraa 

2012-mili kommunalbestyrelsi Atuilluartuuneq 2020 anguniagassatut aalajangerneqarmalli suliniutit assigiinngitsut 34-t ilinniartitaanermut, inunnik sullissinermut avatangiisinullu tunngasunik aallartereerneqarsimapput.

Suliniutinut aqutsisutsialannut aappassaa pissarsisitsisoqarpoq, 2014-imilu suliniutinut marlunnut aqutsisuusut suleqatigiillutik meeqqeriveqarfinni angajoqqaat akisussaaqataanerat suleqatigiinnerallu pimoorullugu tunuliaquttat ataatsimiittarnerat kiisalu siumoortumik iliuuseqartarneq aqqutigalugit suliniuteqarfigisimavaat. Meeqqerivinni digitaliseriineq ingerlanneqarsimavoq iPads-ilu aqqutigalugu meeqqat atualernissaannut piareersartinneqartarsimallutik.

2016-imi pingasunngornermi januaarip 27-ani Qeqqata Kommuniata suliniutinut aqutsisutsialaat pissarsitippai. Suliniutinut aqutsisutsialaat marluk, illup iluani avataanilu suleqateqarluarsimanermikkut malunnaateqarluarsimasut, suliniutiminnullu atatillugu annertuumik unammillernartunik nalaassisarsimagaluarlutik ilungersuullugu ingerlatsisimasut pissarsitinneqarput.

Akissarsitinneqartut ukuupput:

  • Ole Thor Hermansen, Qeqqata Kommuniani Maniitsumi Teknikkimut Avatangiisinullu Immikkoortortami pisortaq, suliniummut Atuilluartumik nukissiornermut aqutsisoq, tamatumunnga atatillugu Maniitsumi Kilaaseeqqap atuarfiani kommunip allaffianilu seqinisaatinik ikkussuisitsisoqarnikuuvoq.
  • Ulrik Motzfeldt-Skovgaard, Qeqqata Kommuniani Sisimiuni qarasaasialerivimmi pisortaq, kommunimi tamarmi iPad-it atuutsilersinneqarnissaannut suliniummut aqutsisoq

Suliniutinut aqutsisutsialaat taakku marluk suliniutitik 2015-imi namminneq ingerlallugit, atuilluartumik nukissiornissaq, iPad-illu atuutsilersinneqarnissaat immikkut sammivaat. Suliniutinut aqutsisutsialaat taakku marluk pikkoreqisut, atuilluartuunissamik suliniutimi ingerlateqqinnissaanut tamarmik immikkut check-imik 100.000 koruuninik naleqartumik tunineqarput, ilutigalugulu eqqumiitsuliaq piniartoq unaalik tunissutisiaralugu.

Pissarsitinneqartut ukiumi suliniutinut aqutsisutsialattut toqqarneqarnertik nuannaarutigaat, akissarsiatillu atorlugit Atuilluartumik nukissiornermut aamma iPad-inut suliniutit ingerlateqqinneqarnissaannut qilanaarlutik.

- Akissarsinneqarninni siullertut suli misissorusuppara, atuartoq pilersitsisoralugu atuartitaaneq eqeersimaanerusumik qanoq ingerlanneqarsinnaanersoq, ilutigalugulu iPad-inut/qarasaasianut ”immikkut ilisimasalittut” ingerlasussanik atuartunik ilinniartitsisunillu inuttalerlugu ”suleqatigiissitaq”-mik pilersitsisoqarnissaanut periarfissat misissorusuppakka.

Ilutigalugu pinngortitalerinermi qarasaasiaq qanoq pissanganarnerusumik atorneqarsinnaanissaanut periarfissat misissorusuppakka. Matumani atuartitsineq soqutiginarnerulersillugu 3d printeriusinnaavoq, programmeeriinerusinnaavoq, fysik-imi atugassaasinnaapput, uumassusilerinermullu mikroskopit digitalit pineqarsinnaallutik, taamak oqarpoq iPad-inut sulimiummut aqutsisuusoq Ulrik Motzfeldt-Skovgaard.

- Misiligummik innaarsummi seqinisaatinik ikkussuisoqarsinnaanissaanut periarfissat misissuleruttorpavut. Ilisimasavut naapertorlugit Kalaallit Nunaanni taamatut misiliisoqarnikuunngilaq, nukissiuutinik atuilluarnissamut atorneqarluarsinnaasunik innaarsunnik kujammut sammisunik ulikkaarpoq. 100.000 koruunit taakku misiliinissamut qanilliallatsitsisorujussuussapput, taamak oqarpoq suliniummut Atuilluartumik nukissiornermut aqutsisoq Ole Thor Hermansen.

Ilaatigut atuilluartuunissamik pimoorussillutik suliniuteqartut nersorniarlugit, Qeqqata Kommuniatalu 2020-mi atuilluartuunissaminik suliniuteqarnera malunnartinniarlugu, ukiut tamaasa suliniutinut aqutsisutsialannik toqqaasoqartarpoq.

Assit ataatsimiinnermi 

Sisimiuniik peqataasut


Maniitsumi peqataasut

Akissarsitinneqartut Ulrik Sisimiuniit aamma Ole Maniitsumiik Skype-ikkut



Akissarsitinneqartut Ole Maniitsumiit, aamma Ulrik Sisimiuniit Skype-ikkutSkype