Kangerlussuarmi takornariaqarneq qanoq annertutigaa?

Arctic Circle Business-imit, Qeqqata Kommmunianit aamma Visit Greenland-imit tamanna akissuteqarfigerusullu ataatsimoorussamik suiliniuteqarput, taamaalillutillu Kangerlussuarmi takornariaqarneq kisitsisinngortissinnaallugu. Suliniut marlunnik ersarissunik siunertaqarpoq: siullertut Kangerlussuarmi takornariaqarneq Kalaallit Nunaanni inuiaqatigiinnut aningaasaqarnikkut qanoq naleqartiginersoq, aappaattut ornitassami takornariaqarnerup naleqassusaanik qulaajaanissamut ilusiliamik ineriartortitsinissaq, Kangerlussuaq misiliutitut suliniutigalugu.
24. februar 2017


Misissuinerup inerneraa, Kangerlussuaq ornitassatut Kalaallit Nunaanni takornariaqarnermut pingaaruteqartuusoq, 27.000-it sinnerlugit unnuiffigineqartartoq, 2016-imilu 70 mio. koruunit sinnerlugit takornariaqarnikkut kaaviiaartitsisoq.

Ukiumut takornarissat qanoq amerlatigisut Kalaallit Nunaannut tikittarnersut, ullumikkut eqqortumik nalunaarsorneqartarput, nunanilu suminngaanneerneri. Hotelini unnuisarnernut Kalaallit Nunaanni Naatsorsueqqissaartarfimmi kisitsisinik pingaarnernik pitsaasunik tunniussaqarpoq, unnuisarfinnili minnerusuni kiisalu nunaannarmi camps-ini unnuisarnerit naatsorsuinernut ilaanngillat. Takornarissat akiliillutik unnuisarnerisa amerlassusaat eqqortumik pissarsiariniarnerini, unnuisarnerit tamakku ilanngunneqarnissaat pingaaruteqarluinnarpoq. Tamatuma saniatigut ornitassani ingerlatsisut ataatsimut kaaviiaartitsinerat aamma ilisimasariaqarpavut. Siuliini pineqartut akissutaat pigilerutsigit, taava ornitassami takornariaqarnerup toqqaannartumik naleqassusivia nassuiarsinnaalissavarput.

Suleqatigiinnermi periusiuvoq, 2016-imi takornariartitsisartut Kangerlussuarmi ingerlatsisartut tamarmik attavigineqarlutik kaaviiaartitaannik (angallassinermi, unnuinerit, nerisaqartitsineq, assartuineq kiisalu kiffartuussinernik nioqqutinillu allanik tunisineq) kiisalu tikeraanut Kalaallit Nunaata avataani najugaqartunut unnuinernik qassinik tunisaqarsimanerinik apeqquteqarfigalugit. Takornariartitsisartut amerlanerpaat paasissutissanik avitseqatigiinnermut peqataapput, tamanna imminermi pitsaasuuvoq Kangerlussuarmilu takornariaqarnermi kaaviiaartitanik piviusorsiorluinnartunik missiliuussisinnaalerlutik. Sumiiffimmi ingerlatsisunit paasissutissiissutit tunngavigalugit, 2016-imi Kangerlussuarmi takornarialerinikkut minnerpaamik katillugit 70 mio. koruunit kaaviiaartinneqarput.
2016-imi Kalaallit Nunaanni Naatsorsueqqissaartarfimmi takornarissat unnuineri 17.268-it nalunaarsorneqarsimapput. Tamatuma saniatigut unnuisarfinni minnerusuni, Kalaallit Nunaanni Naatsorsueqqissaartarfimmut nalunaarutigineqanngitsut, unnuinerit 10.179-it sinnerpai. Unnuinerit taakku 40 procentii sinnerlugit takornarissanit nammineerlutik angalanerminnut atatillugu Kangerlussuarmiinnerminni imaluunniit sumiiffimmi takornarialerisunit aaqqissuussanut peqataasunit unnuinerupput. Missiliutit nutaat takutippaat, Kangerlussuup Sisimiullu akornanni Arctic Circle Trail ingerlaarfigalugu takornarissat pisuinnaat 1.300 missarluinnaaniittut. Kangerlussuup pinngortitaani aaqqissuussamik angallassinerit ilaatigut nassuiaasulerlutik ullut arlallit Sermersuarmut angallassinerit, umimmannik imaluunniit tuttunik tammajuitsussarsiniarlutik piniarnernik aammalu eqalunniartarfinniinnernik imaqartarput.

Unnuinerit 10.179-iusuni nalunaarsorneqanngitsuni affai sinnerlugit ilisimatusarnermut attuumassuteqarput. Nunani allaniit akissarsiaqarlutik ilisimatusartut, World Tourism Organization-imeerlutik takornarissatut isigineqartarput. Taamaalilluni 2016-imi Kangerlussuarmi takornarissat unnuisut 27.000-init sinneqarput. Kangerlussuarmi takornarialerisut ataatsimut paasissutissiissutaat 2016-imi takornarialerinermi 70 mio. koruunit sinnerlugit kaaviiaartitsisimanermik takutitsipput.

Periuseq ineriartortitaq tunngavigalugu, Arctic Circle Business, Qeqqata Kommunia aamma Visit Greenland Qeqqata Kommunianut tamarmut misissuinermik ingerlatsiniarput kiisalu nunap immikkoortuani Arctic Circle Trail-ip takornariaqarnermut pingaarutaanik tamat isiginninnerulernermik pilersitsiniarluni. Kommunit allat suleqatigalugit, Kalaallit Nunaanni takornariaqarnermut immikkoortunut tamanut assingusumik misissuinermik ingerlatsisoqarnissaa neriuutigineqarpoq, taamaalilluta takornariaqarnerup Kalaallit Nunaata aningaasaqarneranut qanoq annertutigisumik sunniuteqartarneranut annertunerusumik paasissutissaateqalissalluta.