Akisussaaqatigiitta

Akimortumik suleqatigiinnermik sunniuteqarluarnermillu qulakkeerisumik ataqatigiissaakkamik suliniutikkut Qeqqata Kommuniani innuttaasunut tamanut peqqinnermik atugarissaarnermillu siuarsaanissaq. Ukiut nukissallu akimorlugit innuttaasut pisariaqartitaannik naammassisinnaajumallugit, paasissutissat pioreersut uppernarsaatitaqartut aallaavigalugit suliniuteqarfissanik suliniut pingaarnersiuissaaq.

Kommunimi innuttaasut tamat ulluinnaminni ingerlalluarnissaannut peqqinnartumik eqeersimaartumillu ataatsimoorffeqarnissaat Akisussaaqatigiittami takorluugaavoq. Atuarfinnit suliffeqarfinnut aammalu sunngiffimmi sammisaqarfinni inuunermi sumiikkaluaraanniluunniit peqqissuseq atugarissaarnerlu atuutsinneqartumik piorsarsimassutsimik pilersitserusuppugut. Ingerlatsisut tamarmik akornanni suleqatigiinnikkut akuutitsinikkullu innuttaasut pisariaqartitaannik kissaataannillu naammassinnissinnaasunik nutaaliortunik atuilluartunillu aaqqiissutinik ineriartortitsinissarput pimoorupparput.

Timimik aalatitsinermik, eqqarsartaatsikkut inuulluataarnermik aammalu inooqataanikkut atassuteqarluarnermik siuarsaasunik nukissanik tapersersuinernillu tamanit pissarsiffiusinnaasumik kommunimik pilersitsinissaq takorluugaraarput. Aporfiit isaternissaat aammalu peqqissumik inuuneqalernissamut ataatsimoornissamullu isumassarsisitsisumik avatangiisinik akuutitsisunik pilersitsinissaq anguniagaraarput. Qanorluunniit tunuliaquteqartoqaraluarpat imaluunniit inuunermi qanoq inissisimasoqaraluarpat, tamanut inuunermik oqimaaqatigiissaartumik nuannaarnermillu tunniusseqataanissap qulakkeernissaanut, periusissiat suliniutillu atuutilersinnerisigut ataavartumik nalilersuissaagut ingerlariaatsigullu nalimmassartarlugit.

Innuttaasut tamarmik ataasiakkaarlutik takuneqartutut, tusaaneqartutut naleqartinneqartutullu misigisimatillugit ulluinnarni atugarissaarnerup nalinginnaasuutinnissaanut ataatsimoorluta siunissamut peqqissumut tunngavileeqataassaagut.

Akisussaaqatigiitta pingaarnertut pingasunik ukkataqarfeqarpoq, tassani ataavartumik suliniutit aammalu taakkunani sammisaqartitsinerit ilaallutik. Ukkataqarfiit pingasuusut tassaapput:​

1.       Inuunermi atugassarititaasut pitsaasut

Innuttaasunut tamanut pitsaasumik inuuneqarnissamut atugarissaarnerup qanilaassutsillu tunngaviliisoralugit angerlarsimaffimmi ilaqutariinnilu sinaakkutit toqqissisimanartut tapersersuisullu pilersinneqarnissaanik ukkataqarneq.

2.       Sunngiffik peqqinnartoq susassaqarfiulluartorlu 

Sunngiffimmi sammisaqartitsinerni, peqatigiiffilerinerni aammalu nammineq kajumissutsimik suliaqartarnerni, inooqataanikkut ataatsimoornernik nukittorsaasuni peqataanikkut timikkut eqqarsartaatsikkullu peqqinnermik siuarsaaneq.

3.       Najukkami inuiaqatigiit nukittuut

Inuiaqatigiit akimorlugit inooqataanikkut ataqatigiinnermik atugarissaarnermillu tapertaasumik, atuarfinni, paaqqinniffinni aammalu najukkami pilersitani pimoorussinikkut ataatsimoornermik misigititsinermik pilersitsineq.

Ulluinnarni inuunermi sutigut tamatigut kommunimi innuttaasunut peqqinnerulernermik atugarissaarnermillu qanoq suliniuteqartoqartarneranik ersarissaanissamik suliniuteqarfinni pingasuusuni ukkatarineqartuni siunertaavoq. Suleqatigiinnissamut isumaqatigiissummi, Pilersaarusiornermi periusissiami, Peqqinnermut pinaveersaartitsinermullu politikkimi, Meeqqanut inuusuttunullu politikkimi, Innarluutilinnut politikkimi, Inuunerissaarneq - Det gode liv-imi, Qeqqata Modelimi aammalu Timersoqatigiiffiit Kattuffiannik suleqatigiinnissamik isumaqatigiissummi takorluukkat anguniakkallu ataatsimut tunngavigalugit pilersinneqartuni, ukkataqarfinni tamani tigussaasumik anguniakkatigut tamanna takuneqarsinnaavoq.
​

Peqqinnissamut atugarissaanermillu tamat isiginnittumik ingerlatseriarnissap qulakkeernisaanut Qeqqata Kommuniani akimortumik suliniutit pingaaruteqarluinnarput. Suliniuteqarfinni sammisat assigiinngitsut atuutilersinneratigut, ataatsimoorussamik anguniakkamik suliniuteqarnissamut periarfissiisumik sinaakkutinik ataqatigiittunik pilersitsisoqassaaq. Atuilluartunik inernernik angusaqarnissamut suliniutit pioreersut sammiveqatigiisillugit ingerlatiinnarnagit aammalu imminnut tapertaqatigiisillugit nukittorsarlugillu ingerlatinnissaannut ataqatigiissaakkamik ingerlatseriaaseqarluni qulakkeerinninnissaq pingaaruteqarluinnarpoq.

Sunniuteqarluarnerusumik aaqqiissuteqarsinnaasunik akimortumik suliniutit immikkoortortat assigiinngitsut akornanni sunniivigeqatigiinnermik pilersitsinissamut periarfissiissapput. Sammisat imminnut sunniivigeqatigiinnerisigut tapertariinnerisigullu, immikkut ingerlanneqarnerinut sanilliullugu suliniuteqarfiit annertunerusumik sunniuteqarnissaannik periarfissaqarluarnerulissapput. Inuiaqatigiinni unamminartuvinnut naleqarnerunermik qisuariarnerunermillu pilersitsisinnaasunik sammisanik nutaanik nalimmassaanissamut eqaannerulersitsisoqassaaq.

Tamatuma saniatigut illuatungeriit akuusut akornanni ataatsimoorussamik akisussaanermik akimortumik suliniutit siuarsaasuupput. Tamanna innuttaasunik, sulisunik aammalu soqutigisaqaqatigiinnik ataatsimut anguniakkamik suliniuteqarnissamut, suleqatigiinnermik tunniusimanermillu piorsarsimassutsimik pilersitsissaaq. Taamatut ingerlatsineq suliniummut nukittorsaataaginnarani najukkami inuiaqatigiinnik ataqatigiilersitsissaaq.

Takorluukkat anguniakkallu piviusunngortinnissaannut, anguniakkanik angusinissamut pisariaqartitsisunik suliniuteqarfinni sammisatigut anguniakkanut ataasiakkaanut immikkuullarissumik iliuuseqartitsipput.

Suliniummi suliniutit aallartinneqartut periutsit tullinnguuttut malillugit salliutinneqassapput:

Uppernarsaatinik aallaavilimmik ingerlariarneq: Peqqissuunissamut suliniummi suliniutit aallartinneqartut uppernarsaatinik ilisimasanillu aallaaveqassapput.

Paasissutissanik aallaavilimmik ingerlariarneq: Suliniummi suliniutaasut aammattaaq ilaatigut Meeqqat atuartut misissuiffigineqarnerannit aamma Innuttaasunik misissuinermit najukkami paasissutissanik aallaaveqassapput. Paasissutissat sumi akulerutissanerluni aamma suliniutinik sorlernik suliaqarnissatsinnik isumaqarnerpaaffianiittumik paasisaqarnissamut sakkussatut atorneqassapput.

Nukittussuseq aamma naleqartitanik aallaavilimmik ingerlariarneq: Najukkami nukittoqqutinik naleqartitanillu suliniutit aallaaveqassapput. Najukkami nukittuffiit naleqartitallu najukkami inuiaqatigiinni ingerlalluartunut pisunut tunngassuteqarpoq. Immikkoortuupput innuttaasut peqqissusaannut atugarissaarnerannullu isumalerujussuit.