Toqukkut qimagunneq – Toqusup pigisaanik suliarinninneq

Nalinginnaasumik paasissutissiineq

Nalinginnaasumik paasissutissiineq

Qanigisavit ilaata toqunerani qanoq iliussanerlutit, aamma toqusup pigisai qanoq suliarineqartarnersut uani atuarsinnaavatit.

Toqusup pigisai suuppat?

Toqusup pigisai suuppat?

Toqusup pigisai suuppat?
Toqusup pigisai nalillit, pigisai allat akiitsuilu ataatsimut toqusup pigisaanik taaneqartarput. Toqusup pigisaanik agguaassineq eqqartuussisoqarfimmi toqusup najugaqarfigisimasaani suliarineqassaaq. Toqusup pigisaanik agguaassinermi siunertarineqarpoq toqusup pigisaanik agguaassinermut malittarisassat kingornussisarnermullu inatsit malinneqarnissaat, toqusup akiitsui akiligassaalu naatsorsorneqarlutillu akilerneqarnissaat, pigisat nalillit kingornussisussanut eqqortunut agguaanneqarnissaat kiisalu testamentiusinnaasut ataqqineqarnissaat.

Inatsit nutaaq
Novembarip 15-iani 2026-mi toqusup pigisaanik agguaanermullu kingornussisarnermut inatsit nutaaq Kalaallit Nunaanni atuutilerpoq. Inatsit nutaaq eqqartuussiviup toqusup pigisaanik maannamut suliarinnittarneranik allanngortitsipput.

Kingornussisarnermut toqusup pigisaanik agguaanermullu inatsisit nutaat malillugit toqusup pigisaanik agguaaneq ima ingerlanneqartarpoq:

Kingornussisarnermut toqusup pigisaanik agguaanermullu inatsisit nutaat malillugit toqusup pigisaanik agguaaneq ima ingerlanneqartarpoq:

1. Toqukkut qimaguttoqarneranik nalunaarut
Inuk toqugaangat palasi toqusoqarneranik nalunaarusiortarpoq, taannalu eqqartuussisoqarfimmut toqusup attuumassuteqarfigisaanut nassiuttarpaa.

2. Eqqartuussisoqarfiup toqusup pigisaanik agguaanissamik suliaq aallartittarpaa
Eqqartuussisoqarfik inummik toqusoqarneranik nalunaarfigineqaraangat, attaveqaataasussaq (oqarasuaatikkut) ataatsimiigiaqqusarpaa, suliamilu iliuusissat tullii pillugit paasissutissittarlugu. Attaveqaataasussaq nalinginnaasumik tassaavoq kingornussisussaq, qanigisat arlaat imaluunniit kingornussisussat isumaqatigiissuteqarlutik toqqagaat. Suliassaq nammineq piumassutsimik tiguneqartarpoq, toqusup pigisaasa pisussaaffiinut nammineq akiliisussaatitaanermik nassataqartitsinngilaq.

3. Eqqartuussisoqarfimmik ataatsimeeqateqarnissannut qanoq piareersarsinnaavit
Eqqartuussisoqarfimmik ataatsimeeqateqarnissat sioqqullugu makku pillugit paasissutissanik katersinikkut piareersarsinnaavutit:

o Kingornussisussat aqqi – ajornanngippat najugaat aamma inuup normui
o Ilisinermi aningaasartuutit
o Toqusimasoq katisimava?
o Toqukkut qimagussimasoq qitornaqarpa / qitornavissiaqarpa?
o Testamenteqarsimappat aamma/imaluunniit aappariit isumaqatigiissuteqarsimappata
o Bankkontinut aamma pappiaqqanut aningaasanut nalilinnut kontop assilinera
o Toqusup pigisaasa biilit, piginneqatigiilluni inissiat, boligstøtte aqqutigalugu illuliat, nammineq illuutit, illuaqqat, umiatsiat il.il. nalingi, toqusoq katissimasuuppallu taassuma aappaata pigisaasa nalingi ilanngullugit. Pigisaat aningaasanik nalillit — tassa tunineqarsinnaasut allattorsinnaavatit
o Akiitsut pillugit paasissutissat

Toqusimasup pigisaasa paarilluarnissai isumagiuk.

4. Toqusup pigisaanik agguaassinermi periutsimik toqqaaneq
Toqusup pigisai iliuutsit assigiinngitsut atorlugit suliarineqarsinnaapput. Toqusup katisimasuunera, qitornaqarsimanera pigisaasalu nalingisa annertussusaat tunngavigalugit, toqusup pigisaasa qanoq suliarineqarnissaat aalajangerneqartarpoq. Tamanna agguaassinermi periutsimik taaneqartarpoq. Agguaassinermi periutsit assigiinngitsut 6-iupput.

Toqusup pigisaanik tunniussineq
Toqusup pigisaasa nalingat, ilaatigut ilisinermut aningaasartuutit ilanngaatigereerlugit, 55.000 koruunit (2026-mi) annikinneruppat, toqusup pigisai tunniussinertut suliarineqassapput. Tunniussinermi pigisat nalillit toqusup qimagaasa akornanni qaninnerpaamut imaluunniit ilisaanermut akiliisimasumut tunniunneqartarput.

Pigisat nikisinnagit pigiinnarneri
Aapparisaq qimagaasoq toqusup pigisaanik tamanik aqutsisinnaatitaaginnassaaq, kingornussassanillu agguaaneq (pigisat agguaanneqarnerat) kingusinnerusumut kinguartinneqassalluni.

Kingornussassanik nammineerluni agguaaneq
Kingornussisussat toqusup pigisaanik namminneq suliarinnittarput, akiitsullu akilerneqarnissaannut kingornussassallu agguarneqarnissaannut akisussaallutik. Toqusup pigisaanik suliarinninneq naammassineqartarpoq, eqqartuussisoqarfiup toqusup pigisaasa nalingat kingornussassallu agguarneqarnerat pillugit naatsorsuusiaq akuerereeraangagu.

Kingornussassanik pisariinnerusumik nammineerluni agguaaneq
Toqusup pigisaanik ikittunik isumagiuminartunillu namminerisamik agguaassinermi periuseq ajornannginnerusoq sukkanerusorlu.

Aapparisamut pigisanik tunniussineq
Toqusimasoq aapparminik qimataqarpat, aappariit ataatsimut pigisaasa nalingat (ataatsimoorussamik pigisat immikkullu pigisat) aningaasanit aalajangersimasumit annikinneruppat (950.000 koruunit 2026-mi.), aapparlu qimataasoq toqusup akiitsuisa akilernissaannut pisussaaffimmik tigusippat, toqusup pigisaanik agguaasseriaaseq manna periarfissaasinnaavoq.

Toqusup pigisaanik suliarinnittoq
Kalaallit Nunaanni Eqqartuussivik toqusup pigisaanik aqutsisussamik akuerisaasumik (advokatimik) toqqaasarpoq, taassumalu toqusup pigisaanik naatsorsuusiornissaq suliarinninnerullu naammassineqarnissaat isumagisarpai.

Toqusup pigisaanik agguaasseriaaseq sorleq toqqarneqarnersoq apeqqutaatillugu malittarisassat piumasaqaatillu assigiinngitsuupput. Eqqartuussisoqarfiup toqusup pigisaanik agguaasseriaaseq sorleq ilissi atugarisassinnut naleqquttuunersoq pillugu ilitsersuissaaq.


domstol.gl-imi toqusup pigisaanik agguaasseriaatsit pillugit annertunerusumik atuarsinnaavutit. Toqusup pigisaanik agguaasseriaatsinut assigiinngitsunut immersugassat uani nassaarisinnaavatit: https://www.domstol.dk/groenlandskredsretter/vejledninger-og-blanketter/

5. Aggeqqusissut
Proklama aggeqqusissut tassaavoq nalunaarut inunnik, suliffeqarfinnik oqartussaasunillu toqusup akiitsoqarfigisaanik ujartuisoq. Proklama tamanut saqqummiunneqareeraangat, toqusumit aningaasanik pisassaqarsinnaasut piumasaqaatitik proklamami taaneqartumut attaveqarfigisassamut imaluunniit toqusup pigisaanik aqutsisumut nassiunnissaannut sapaatit akunnerinik 12-inik piffissaqarput.
Proklama Statstidendemi tamanut saqqummiunneqartarpoq. Inuit ataasiakkaat, suliffeqarfiit oqartussaasullu Statstidendemi proklamanut malinnaanissaminnut akisussaaffeqarput. Aningaasanik pisassaqartut piumasaqaatitik piffissarititaasup iluani nassiutinngikkunikkit, toqusup pigisaanit aningaasanik pissarsinissamut pisinnaatitaaffitsik annaassavaat. Taamaattorli piffissarititaasoq taanna Akileraartarnermut Aqutsisoqarfimmut akiitsunut akiitsunullu qularnaveeqqusiussinikkut isumannaallisakkanut atuutinngilaq.

Statstidendemut linki:
Proklamaer i Kujalleq Kredsret
Proklamaer i Sermersooq Kredsret
Proklamaer i Qeqqa Kredsret
Proklamaer i Qaasuitsoq Kredsret
Proklamer i hele Grønland

6. Pigisat suliarinerisa naammassineri agguaanerlu
Toqusup pigisai nalillit akiitsuilu pillugit ataatsimut naatsorsuusiortoqartarpoq. Aningaasartuutit tamarmik akileraarutillu akilerneqareeraangata, toqusup pigisaanik suliarinninneq agguaasseriaaseq pineqartoq naapertorlugu naammassineqartarpoq. Tamatuma kingorna kingornussassaqarpat, taakku kingornussisussanut akilerneqarsinnaapput.

Paasissutissat allat
Toqusup pigisaanik suliarinninneq pillugu annerusumik uani atuarsinnaavutit https://www.domstol.dk/groenland/