Isumaginninnermut pisortaaneq nutaaq naapiguk
Charlotte Petersen-Markhøj
Charlothep inuttut suliatigullu tunuliaqutaa
Charlothe-mik ateqarpunga, Sisimiormiuuvunga, 42-nillu ukioqarlunga. Katrinep Nukallu (Jens og Katrine Petersen) panigivaannga. Erneqarpunga pingasut taakku tamarmik Qallunaat Nunaanni najugaqarput, marluk 20 aamma 21-inik ukioqarput nukarlerlu 12-inik ukioqarluni.
Ilinniariarlunga aallaramali Sisimiut qimappara. Tassa Inunnik Isumaginninnermi siunnersortinngorniarluni ilinniarfimmi 2007-mi atualerpunga, 2011-mi Inunnik Isumaginninnermi Siunnersortitut allagartartaarlunga. Ilinniarnerma ingerlanerani Sanami A1-mi praktik ingerlallugu.
2011-mi naammassigama Kommuneqarfik Sermersuup iluani atorfineqqaarpunga meeqqanut inuusuttunullu sullissisunngorlunga. Suliarisarnikuuakka underretninginut tunngasut tigoorarneri, meeqqanik inuusuttunillu angerlarsimaffiup avataanut inissiinerit/inissiinaveersaarnernik suliaqarnerit, kingornalu aaqqissuusseqqittoqarmat innarluutilinnut suliat qaavatigut aamma suliarilerlugit.
Tamatuma kingorna atuarfinni socialrådgivereqalerneq aallarnisarneqarmat Atuarfik Hans Lyngemi atorfinippunga socialrådgiveritut. 2015-lu tikillugu atuarfeqarfimmi socialrådgiveritut atorfeqarlunga. Tassani atuartunik oqaloqatigininnerit, angajoqqaanik oqaloqatiginninnerit, tværfaglig-mik suleqateqarnerit underretningiliornerit ataatsimiisitsinerit, sulisunut atuarfiullu pisortaanut siunnersortaasarlunga sulianut tunngatillugu aamma.
Allatuulli aamma takorluugaqarnikuugama ineriartorusullunga aaliangernikuuvunga Kandidat i socialt arbejde Aalborg Universitetimi ingerlanneqartoq ilinniarfiginiarlugu. Tassungalu atatillugu 2025-mi Aalborgimut nuuppugut. Cand.Soc. naammassimavara januar 2018-mi Ilinniarnittalu ingerlanerani aamma Kofoeds Skolemi Aalbogimi praktikkerluta atuaqatigalu nunatsiinneersoq peqatigalugu, tassami nunaqqatigut qallunaat nunaanni najugallit atugaat qanimut paasisaqarfigalugit aamma.
Cand. Soc. Naammassigakku Fyn-imi kalaallit Illuanni Odensemi atorfinippunga 2018-mi tassanilu atorfeqarlunga ukiut sisamat. Kalaallit Illuanni Socilakonsulentitut atorfeqarninni ilaatigut Syddansk kommunemi (Fyn aamma sønderJylland) kalaaleqatigut sullittarpagut, siunnersorlugit allatigullu saaffiginnissutaat kommunenut suliassaqartunullu allanut ingerlatitseqqittarlugit. Bisidderitut atuuttarpugut, taakkulu saniatigut aamma Vejlemut suliartortarpunga Kirkens Korshærimiittartut kalaaleqatigut oqaloqateqarnissaannut periarfissittarlugit. Kalaallit illuani suliat siammasipput: meeqqanut ilaqutariinnullu tunngasut, utoqqalinersiallit kiisalu siusinaartumik utoqqalinersiallit aammalu kontantmodtagere aamma sullittarlugit. Taamaasillunga aamma meeqqanut ukkatarinniinnarnanga aamma inersimasut utoqqaallu sullillugit qanimut misilittagaqarfigillualerlugu.
2022-mi nunatsinnut uterpunga, tassa Ilisimatusarfimmi Inunnik Isumaginnermik Siunnersortinngorniarfimmi ilinniartitsisutit (studieadjunktitut) atorfinillunga. Ilaatigut ilinniartitsisutigisarlugit semesterini tamaginni fagit socialt arbejdemut tunnganerusut: Indføring i socialt arbejde, metoder i praksis, projektilerititsinerit semesterini tamani (imarineqartarlutik: nunatsinni ineriartorneq, arbejdsmarked, inersimasunut tunngasut, meeqqanut ilaqutariinnut kiisalu atugarissaarnermut tunngasut), Børn og unge og familier, Vejlederiusarlungalu misilitsissutissani assigiinngitsuni kiisalu inaarutaasumik projektimi (Bacheloriliornermi) allaaserinnittunut aqqutissiuussisarlunga aamma. Sulininni ilinniagaraara aamma (Uni.pæd.) Universitets pædagogikum tassani universitetini inersimasunik atuartitsinermut tunngasut ilinniarniarnikuullugit, tassani ilisimatuussutsikkut misissukkat aallaavigalugit atuartitsinermut sakkussat assigiinngitsut ilisimasaqarfiginerulerlugit.
1. Oktober 2025 immikkoortortami aqutsisunngorpunga maangalu Sisimiunut nuunnissama tungaanut tassani atuullunga aqutsisutut. Tassungalu atatillugu Aqutsisut ilisimatusarfimmi aamma Aqutsisutut ilinniagaqarlunga. Ilaatigut Sulisunik aqutsineq, ingerlatsinermi aqutsineq, aaliangigassanut assigiinngitsunut tunngasut, inuttut ineriartorneq, sulisut ukiui aallaavigalugit ineriartortitsisinnaaneq, aqutsisutut kinaassutsima paasinera allallu samminikuullugit. Tassani ilaatigut paasivara aqutsinermi typit assigiinngitsut ataatsikkut pingasut pigalugit.
Atorfimmut atatillugu takorluugai siunissamilu anguniagai
Atugarissaarnermut pisortaanertut qilanaaraaraa inulerinermut tunngatillugu kommunitsinni sullissinerup iluani ineriartortitsinerup ingerlannissaa, suleriutsinik allannguiartuaartitsineq imaluunniit ineriartortitsineq. Pingaartikkakku sullitat eqqarsaatigalugit kommunellu offentlig institutionitut inissisimanerani maleruagassat atuutsinneqarnissaata aamma qulakkeernissaa. Socialrådgiverinngornianut atuartitsisarsimaninni periutsit pingaarutillit ilisimasakka, sulisut piginnaasaqarfigisariaqagaannik qaammarsaaneq siuarsaanerlu ingerlateqqikkusullugit.
Suliassat ukkatarisakka maanna ukuupput: sulisut piginnaasaannik qaffassaaneq qaammatikkaartumik ingerlasussaaq aallartisassallugu, tassani siunertaralugu serviceniveau pitsanngornissaata qulakkeerneqarnissaanut sakkussanik tuniorarneqassapput sulisut. Soorlu ukununnga tunngasinnaasut – oqaloqatiginnittariaatsinut tunngasut saqqummiinerit (kommunikationsformer), ileqqorissaarnermut tunngasut (etik), systemilimmik sullissinerup pitsanngornissaa systematisk sagsarbejde), sullissinermi nalilersueriaatsit (socialfaglig skøn), inatsisit atornissaat, immikkoortortakkaarlutik sulianut tunngatillugu qaammarsaaneq, periutsinik atuilluni sulinermik nutarsaaneq (metodeanvendelse). - Kiisalu aaqqissuussaanerup eqaannerulernissaanik qulakkeerinninniarneq. Allallu pisariallit aamma aaqqissuussaanerup aqqani ingerlatsineq eqqarsaatigalugu takorluugaqarpunga aamma.
Qeqqata Kommuniani sulisunut oqaatigisinnaasara unaavoq, qilanaarpunga qanimut ilisareeqatigilernissarput qilanaarpungalu suleqatigiittarnissatsinnut. Nalunngilara inunnik sullissineq pikkunarsinnaasoq, tassami inatsisit atukkagut ilaanni nunatsinnut tulluarsagaavallaanngitsut ilaannilu naakkittaappalaarsinnaasunik imallit sinnerluta innuttaasunik qanimut sullissineq ingerlammassuk sulisutta nersorusupakka. Sullissinermi paatsoorneqartarneq piulersarmat ilaannilu naakkittaattutut allaat inississorneqartarlutik sakkortuunik oqaatsinik aamma tuniorarneqartamata ulluinnarni. Qujanartumillu aamma iluatsittunik imaqarpoq. Tamakkulu amernerulersikkusunnarput.
Ineriartortitseqataarusunneralu kommunitsinni Atugarissaarnermi immikkoortortatsinni neriullunga tigulluarumaaraat, tatigeqatigiinnerlu toqqammavigalugu sulineq aamma ingerlassasoq neriullunga. Pingaartitaraaralu pissuserissaarnermik aallaaveqartumik kikkunut tamanut pissuseqarnissaq, neriuppunga sulisut tamanna aamma sinnerluta ingerlakkumaaraat.
Charlotte Petersen-Markhøj