Aningaasaqarnermut ilinniartitaanermullu pisortaaneq nutaaq naapiguk
Dorthe Løvstrøm Mathiesen
Dorthep inuttut suliatigullu tunuliaqutaa
Dorthe-mik ateqarpunga, 56-nillu ukioqarlunga, ueqarpunga Leif-mik atilik. Meeraqarpugut tamarmik inersimasuupput, ernutaqarlutalu ineqaunarluinnartut asanangaartunik sisamanik.
Sisimiuni peroriartorpunga. Atuarlunga ukiut peqanngittarfikka eqqaassanngikkaanni.
Aningaasaqarneq pillugu ilinniagaraara ukiunilu 30-t sinnerlugit ukkataralugu suliffimmi pisortatut sulqataasarlunga.
"Katillugit ukiut 17-nit Ilulissani najugaqareerluta Sisimiunut angerlaqqippugut"
Ukiorpaaluit pisortaqarfinni sulivunga, taamaattumillu toqqammaviusumik inatisit Kommuunit ingerlanneqarneranut ilisimaarilluarlugit. Ukiut ilaanni Pisiniarfissuit ilaanni qullersaqarfimmi aningaaserivimmilu aamma sulinikuuvunga aningaasaqarneq toqqammaviusumik ukkataralugu.
Inuttut pingaartitaraara unneqarissuuneq, tamatigoortuuneq, patajaatsuunissarlu. Pingaarnerpaatullu ilaqutariittut inuunitsinni toqqissisimanartumik inuunissarput.
Pisortatut sulisarninni, naleqartitatut pingaartumik politikkikkut sullissiviusumik pingartuutippara tamatigoortuuneq, akuutitsineq, pissuserissaarneq, unneqarissuunerlu. Suleqatigiinnermi assigiinngitsuunerput aammalu naleqartitagut aallaavigalugit suleqatigiilluta ineriartortitsinissaq pingaartituuara, toqqisisimaneq suliffimmi suleqatigiit akornanni pingaartitama aamma ilagilluinnarpaat. Taamaakkaannimi tunniussarsaq anginerusarmat.
Qeqqata Kommuniani Aningaasaqarnermut Ilinniartitaanermullu pisortaanertut aggustip aallaqqaataani ukioq manna atorfinippoq
Toqqaannartumik Ilinniartitaanermut ingerlatsivik siornatigut tigummisarinngilara, inatsisilli nunattalu ilinniartitaanikkut ineriartornera malernaavigiuarsimavara, pingaaruteqartutullu isigiuaannarlugu, pingaartumik aamma inuussutissarsiornikkut pitsaasumik ineriartornissaa peqataaffigerusuttarlugu.
Qeqqata Kommuniani atorfeqalerninnut qilanaarisama ilagaat Qeqqata Kommuniani ineriartornissamut ineriartuutaasunullu akuulernissara suleqataaffigissallugu.
Ukkatarissassanni pingaartutut isigaara, innuttaasut, meeqqaniik utoqqaarnut Qeqqata Kommuniani periarfissaarissaarnissaannut suleqataassallunga, pingaartumik periarfissat maannamut atuuttut eqqarsaatigalugit pitsanngorsaaqataaffigissallugit aammalu sullilluarneqarnissaat anguniarlugu kivitseqataanissannut.
Nunatsinni siunissarput pingaartumik nunaqavissut eqqarsaatigalugit siunissarissaarnissaanut ukkataqarnissami peqataanissara pingaartitaraara sunneeqataarusullungalu. Sulimi tunniussassaqaqigama ilisimalikkannik aammalu suli ilisimalluagariligassatsinnut.
Maanna qaammatit marluk sinnerlugit sulisimalerpunga Qeqqata Kommuniani aammalu nuannareqaara, tikilluaqqusaasutullu uigalu misigisimaqaagut. Suleqatitaakka aamma nuannareqaakka pikkorissut angusaqarusuttut tunniusimallutillu sullissinerat takusinnaallugu. Nunatsinni unammilligassat annertupput aamma Kommuunini, taamaattumik maannamut qujamasunnartarpoq takunnissinnaanera naapertorlugu amerlasuut taamatut tunniusimanikkut aporfissarsiornatik angusaqarusuttut suleqatigissallugit. Suleqatigiilluarnissaq pingaartuutikkakku.
Angerlaqqilluni nuanneqaaq inuit qiimasut ilassiortut, uagutsinnut isumaqaqaat.
Qujanaq tamassinnut