Avataaniit suliartortut atorfissaqartippagut

Avataaniit suliartortut ingammik kangiamiut ukiuni kingullerni amerliartornerat iluatigalugu kalaallit suliffissaraluinik arsaartuinerarlugit oqaatigineqartarnerat isumaqatigineq ajorpara.

Pissutigalugu isumaqarama tikisitat, ingammik kangiamiut inuiaqatigiinni suliffeqarfinnilu atorfissaqartinneqarnitik pissutigalugu tikisinneqartartut.

Kommunerput eqqarsaatigalugu isumaqarpunga sulerusuttut amerlanerpaat imaluunniit tamarluinnarmik suliffissaqarlutillu sullittut, tamanna innuttaasut akileraarutaasa qaffakkiartornerisugut qujanartumik takusinnaavarput.

Sulileriaannaasutullu suliffissarsiortut ima ikitsigipput allaat suliffeqarfiit sulisussanik pisariaqartitaat kommunitsinniit matussuserneqarsinnaannatik. 

Nammineerluta Sisimiuni meeqqerivinni 5-inik, Maniitsumilu utoqqaat angerlarsimaffianni 5-inik kangiamiunik tikisitsisariaqarsimavugut, pissutigalugu sulileriaannaasunik allanik aasassaqannginnatta.

Sumiiffinnilu pineqartuni pineqartut tallimaannaagaluarlutik sulisunut sullitanullu annertuumik oqilisaataallutillu iluaqutaanerat annertuumik unnersiutigineqarput.

Sullitallu isumassorneqartariaqartut sulisullu suli amigartuaannartut eqqarsaatigissagaanni avataaniit pisariaqartitsineq suli annertunerugaluartoq matumuuna naqissusissavara.

Allaammi sinerissami politeeqarfiit nunatta avataaneersuinnangajannik ullumikkut politeqalerput, pissutigalugu nunatta iluaniit nunaqavissunik aasassaqannginnamik.

Taamaattumik isumaqarpunga avataaniit suliartortut nunatsinni sulisartut peqatigalugit nunatsinni aningaasarsiornerup ingerlaannarnissaanut, isumassorneqartariaqartullu isumassorneqarnerinut qukakkeerinneqataammata qujamasuutigisariaqarigut.

Taamaasiunngikkuttami pisiniarfiit neriniattarfiillu pisisartut pisariaqartitaat aallaavigalugu ammasinnaanissaat imaluunniit aalisakkeriviit avammut tunisassiorsinnaanerisa tamakkiisumik ingerlanneqarsinnaanissaat qularaara.

Taamaattumik Inatsisartunut Naalakkersuisunullu kaammattuutigissavara inuit attaveqatigiittarfiini oqallinnerit kisiisa aallaaviginagit, suliffeqarfiilli sooq avataaniit tikisitsisariaqartarnersut pillugit oqaloqatigeqqullugit.

Tassami paasissallugu pingaaruteqarpoq nunatsinni sulisinnaasut amigarpugut, naatsorsuutigineqarporlu sulisinnaassusilittut ukiullit ukioq 2040-mi 2.200-inik ikilisimanissaat, tassa ukiut 14-nnguit qaangiuppata.

Taamaattumik ullumikkut aamma siunissami avataaniit tikisitsisarnissaq avaqqunneqarsinnaanngilaq.

Suliffeqarfinnummi sulisitsisunullu tamanut pingaarnerpaavoq pisariaqartinneqartunik ullut tamaasa sulisoqarnissaq.

Eqqaamassavarpullu nunarsuarmi nunarput kisiartaanngimmat avataaniit sulisussanik tikisitsisariaqartartoq.

Malik Berthelsen, borgmesteri.