Qeqqata Kommunia meeqqat siunissaannut aningaasaliivoq

Qeqqata Kommunalbestyrelsia 2027-mut missingersuutinik siullermeerinninnermini meeqqat atuarfiinni marlunnik ilinniartitsisoqartitsisarnerup MISI-milu sulianik nukittorsaanissaq pillugu siunnersuut tamanit isumaqatigineqarluni akuersissuteqarpoq. 2027-mut missingersuutinik aappasaaneerinninnermi novembarip 26-ni inaarutaasumik akuersissutigineqassaaq. Siunnersuut kommunip meerartaanut inuusuttaanullu ilikkagaqarnisssamut, ingerlalluarnissamut ineriartornissamullu pitsaanerpaanik sinaakkutinik pilersitsinissamut kommunip suliaqarnerani alloriarneq pingaaruteqartuuvoq.

Meeqqat tamarmik assigiinngillat. Assigiinngitsunik nukittuffeqarput, piginnaasaqarput naatsorsuuteqarlutillu, aamma assigiinngitsumik sukkassusilimmik ilikkartarlutillu ineriartortarput.    Taamaattumik atuarfik meeqqallu pillugit suliatigut neqeroorutit sinaakkutinik pilersitsissapput, tassani meeqqat tamarmik periarfissaminnik ineriatornissamut periarfissaqassallutik ataatsimoornermilu inissaqarneq misigissallugu.

Atuartitsinermi periarfissat amerlanerusut

Marlunnik ilinniartitsisoqartitsineq atuartunut 1.-3. klassinut kiisalu atuartitsissutini ataasiakkaani immikkut pisariaqartitsisunoortuuvoq. Meeqqat ilikkagaqaqqinnissaannut ukiut atuarfiusut siulliit pingaaruteqarput, atuartitsinermilu marlunnik ilinniartitsisoqartitsinikkut atuartut pisariaqartitaannut assigiinngitsunut atuartitsinerup tulluarsarnissaanut pitsaanerusunik periarfissaqalissaaq.

Aaqqiinerup ilaatigut atuartut atuarsinnaanermut, allassinnaanermut kisitsisinnaanermullu piginnaasaannik ineriartortitsinissamut tapertaassaaq. Ilutigitillugu atuartitsisut akornanni suleqatigiinneq suliatigut isumasioqatigiinnermut, atuartitsinerup allanngorsarnissaanut aamma ilikkagaqarnissami avatangiisinik toqqissisimanartunik akuutitsisunillu pitsaanerusumik periarfissiissaaq, tassani atuartut amerlanerusut peqataanerusinnaallutik iluatsitsinermillu misigisaqarlutik.

Marlunnik ilinniartitsisoqartitsineq atuartut sumiiffigisaanni naapinnissaannut pitsaanerusumik periarfissiissaaq. Meeqqat ilaat immikkut tapersersorneqarnissamut pisariaqartitsisarput ilaallu piginnaasaminnik ineriartortitsinissamut unammillernartunik nutaanik pisariaqartitsisarlutik.  Aalajangiisuusoq tassaavoq, meeqqat tamarmik takuneqarnissaat, klassip ataatsimoorneranut ilaasutut peqataanissaannut misigisimanissaannullu periarfissaqarneq.

MISI nukittorsarneqassaaq, taamaalillutik meeqqat eqqortumik tapersersorneqassallutik

Ilutigitillugu MISI nukittorsarneqassaaq, taamaalillutik meeqqat, ilaqutariit, meeqqeriviit atuarfiillu pitsaanerusumik siunnersorneqarsinnaassallutik, ilitsersorneqarsinnaassallutik akimortumillu tapersersorneqarsinnaassallutik.

Meeqqat ineriartornerminni, ilikkarniarnerminni, ingerlalluarnerminniluunniit ajornakusoortitsinermik misigisaqaraangamik, meeqqap eqqaanittut inersimasut suliatigut eqqortumik siunnersorneqarsinnaanissaat pingaaruteqarpoq. Siusissukkut anguniagalimmillu suliniuteqarneq unammillernarsinnaasut annertusiartornissaannut pinaveersaaqataasinnaapput aammalu meeqqat, ilaqutaasut, atuarfiup sulianillu suliaqartut attuumassuteqartut akornanni suleqatigiilluni aaqqiissutissanik nassaarnissamut pitsaanerusumik periarfissaannik pilersitsissaaq.

MISI-mik nukittorsaanneq meeqqat naatsorsuutigisaminnut pisariaqartitaminnullu assigiinngitsunut paasinnittumik naappinneqarsinnaanerannut tapertaassaaq. Meeqqat ilaat immikkut tapersersorneqarnissamut ingerlalluarnermulluunniit aamma ilikkagaqarnissamut sinaakkutinik allanik pisariaqartitsisarput. Anguniagaasoq tassaavoq, meeqqat tamarmik ineriartornissaminnut, ajugaasimaarnermik aamma toqqissisimanartumik akuutitsisumillu ataatsimoornermut ilaasutut misiginissamut periarfissaqarnissaat.

Meeqqavut siunissaraagut.

Borgmesteri Malik Berthelsen oqaaseqarpoq:

”Meeqqagut siunissaraagut. Meeqqat tamrmik tunniussassaqarput meeqqallu tamarmik ataatsimoorfinni inissaqarnissaq misigissavaat. Meeqqat assigiinngitsuupput, assigiinngitsunik nukittuffeqarlutillu piginnaasaqarput assigiinngitsumillu ilinniartarlutik ineriartortarput. Uagut akisussaaffipput tassaavoq, suliatigut, inooqataanikkut inuttullu meeqqat tamarmik immikkut iluatsinnissamut periarfissaannut sinaakkutinik pilersitsinissaq.

Marlunnik ilinniartitsisoqartitsisarnermik aamma MISI-p nukittorsarneratigut atuarfiit sulisullu meeqqat sumiiffiini  naapinnissaannut aammalu tapersersorneqarnissaanik tuninissaanut unammillernartitaanullu pitsaanerusumik periarfissamut aningaasaliivugut. Meeqqat tamarmik assigiinnissat pineqanngilaq kisianni meeqqat periarfissaminnik ineriartortitsinissaannut aammalu tassaniiffigigisaannik misigisimanissaannut periarfissaqarnissaat pineqarpoq.

Ilutigitillugu sulisunut meerartatsinnik ullut tamaasa suliaqartuusunut  suliatigut avatangiisinik nukittuunik pilersitsissaagut. Ilinniartitsisut sulisullu suleqatigiinnissamut pitsaasunik tunngaveqarunik periarfissaqarlutillu, meeqqanut pitsaasunik angusaqarsinnaanerannut pilersitsinissamut periarfissanik nukittorsaassaaguttaaq.

Marlunnik ilinniartitsisoqartitsisarnerup aamma MISI-p nukittorsaavigineqarneratigut meeqqat assigiinngitsunik piginnaasaannik pisariaqartitaanillu ataqqinnittumik naapitsiviusumik aammalu meeqqat tamarmik ilikkagaqarnissamut, ingerlalluarnissamut, ineriartornissamut ataatsimoornermilu inissaminnik nassaarnissaanut periarfissaqartumik meeqqat atuarfiannik sulissuteqarnermi kommunillu suliniuteqarnerani Qeqqata Kommunia pingaarutilimmik alloriarpoq. 

Annertunerusumik paasisaqarusukkuit attavigiuk

Malik Berthelsen

Qeqqata Kommuniani borgmesteri

Oqa.nr. 86 73 00