Silaannaap allanngoriartorneranut issittumi naleqqussarnissaq pillugu EU-mi pilersaarummut Clim-ATIC-imut Qeqqani Inuutissarsiutitigut siunnersuisooqatigiit Qeqqata kommunialu peqataanerminni angusatik siulliit ataatsimoorlutik saqqummiuppaat.
Saqqummersitsineq siullermik Sisimiuni kommunip allaffiani aasap ingerlanerani saqqummiunneqartumi Sisimiut Kangerlussuullu akornanni ukiuunerani aqqutissaq, aqqummilu angallannikkut unammillernarfiusut sammineqarput.
Pingaartumik Kangerluaarsuk Tulleq-mi kujataata-tungaani aqqutissaq ukiumiit ukiumut allanngorartumik quatsertartoq unammillernartuuvoq, tamannalu pillugu aqqutissaq qimmussinit, qamuteralannit ukiuuneranilu allatigut angallattunit angallavigiuminarsarniarlugu sivinganertaata nunagissarneqarnissaanut suleqatigiinnik pilersitsisoqarpoq.
Tamatuma saniatigut aqqutissami ajornartorsiutit allat aporfiusinnaasullu saqqummersitsinermi saqqummiunneqarput, aqqutissallu pitsanngorsaavigineqarsinnaanissaat pillugu qimussertartut peqatigiiffiat Qimusseq aamma Sisimiut Snescooter Forening peqatigalugit isumasioqatigiinnermi angusat nunap assingini marlunni titartaganngorlugit oqaaseqaatitigullu ersersinniarneqartut takuneqarsinnaapput.
Tamatuma saniatigut ukiuunerani aqqutissaq oqaluttuaralugu silaannaallu allanngoriartornera ilutigalugu Center for Arktisk Teknologi-p naatsorsuutai malillugit siunissami ajornartorsiutaasinnaasut ersarinnerusumik nassuiaatigalugit Qeqqani Inuutissarsiutitigut siunnersuisooqatigiit allatseqarfia saqqummersitsinermut nalunaarusiaqarpoq. Nalunaarusiaq kalaallisut qallunaatulluunniit atuarneqarsinnaavoq.
Pilersaarut pineqartoq pillugu aammali pilersaarutit allat Clim-ATIC-imut
tunngassuteqartut pillugit annertunerusumik paasisaqarusukkuit
inuutissarsiutitigut siunnersuisooqatigiit allatseqarfianni Mads Pihl attavigiuk
(uani annertunerusumik paasisaqarsinnaavutit http://www.qis.gl/ ).