Alumiiniumik pilersaarummut atatillugu tusagassiutit sapaatip akunnerata kingulliup ingerlanerani oqallinniarneq siutinngunarsiinnalerpoq, Qeqqata Kommuniani borgmesterip tullia Karl Lyberth aamma borgmesteri Hermann Berthelsen taamatut isumaqarput.
Illoqarfittut ikinnguterput Fjardabyggd ajunngitsuinnarnik misigisaqarpoq
”Illoqarfittut ikinngutitsinnik Fjardabyggd-imik Island-ip kangainittumik qanittumik suleqateqarpugut, tassanilu 2007-imiilli Alcoa nutaanerpaamik alumiiniumik aatsiteriffeqarpoq. Illoqarfittut ikin-ngutitsinniit Fjardabyggd Kommune nalunaarutigineqartarpoq, namminneq sanaartornerup nalaani ingerlatsinikkullu misigisatik naammagisimaarluinnarlugit. Avatangiisitigullu ajornartorsiutitut Ka-laallit Nunaanni tusagassiutitigut ullumikkut saqqumiussorneqartut, misigisimanngivillugit,” Her-mann Berthelsen taama oqarpoq.
Karl Lyberth-ip paasissutissiissutigivaa: ”Island-imi pilersaarummut atatillugu akerlilersuisut aam-ma illoqarfiit annersaanniit, Reykjavik-imiit ingerlanneqarsimanerat soqutiginarluinnarpoq. Ullu-mikkummi Kalaallit Nunatsinni pisut taamatut iusartuupput, Tassami soqutigisaqaqatigiit inuillu ataasiakkaat nunatsinni illoqarfiit annersaaneersut Nuummiit, sumiifimmi Maniitsumi inuuttaasugut qulaatiinnarluta oqaluttuuniarsarivaatigut, alumiiniumik pilersaarut qanoq ajoqutaalluinnartigisus-saasoq”.
Avataq-mut il.il. Maniitsumi oqallinnermik ingerlatsinissaannut kajumissaarinninneq
Qeqqata Kommuniani aatsitassanut attaveqaatitigullu ataatsimiititaliami siulittaasutut Karl Lyberth kajumissaariniarpoq, Avataq allallu avatangiisivut pillugit soqutigisaqaqatigiit Maniitsumut ornigullutik alumiiniumik pilersaarut pillugu illoqarfimmi innuttaasut oqallisigeqatigiartoqullugit. ”Uanga inuttut sumiiffimmi alumiiniumik pilersaarummut akerliusut sisamanngorpat Maniitsumi innuttaasunik ataatsimiititsinissami qanoq oqaaseqarniarnersut tusassallugit qilanaarilluinnarpara. Taakkumi pissusiviusunik tunngaveqarlutik oqalliseqatarusuppalummata,” Karl Lyberth taama oqarpoq.
Alcoa pitsaasumik oqalliseqatigisarparput
Borgmesterip Hermann Berthelsen-ip Alcoa-mik pisuutitsiniarnersuit aamma ingasagilluinnarpai. ”Alcoa-mik oqalliseqateqartarnitsinni taakku pisunut malinnaalluartutut suliassaminnullu tunniusimarpasillutik saqqummertarput, taamatullu aamma avatangiisit mianerilluinnarnissaannut tunngasutigut soqutiginnilluinnartuullutik. Tamannalu ima paasineqassanngivippoq, avatangiisivut pillugit akisussaaffik Alcoa-mut tunniuttariaqaripput”
”Naamik, soorunalimi Kalaallit Nunatsinni uagut alumiiniumik pilersaarummut atatillugu Alcoa-mut piumasaqaatissavut suliarissavavut, tamatumanilu ajornanngippat island-imi norge-milu pisortat suleqatigalugit ingerlattariaqarlugu, taakkumi tamakkununnga tunngasutigut ilisimasaqarluartuupput. Kisiannili Alcoa-mik pitsaasumik oqalliseqateqartarnivut ingerlatiinnassavavut, Alcoa-millu suleqatiginninnerput unitsinnagu, soorlu Avataq taama kajumissaarigaluartoq,” Hermann Berthelsen Karl Lyberth-ilu taama naggasiipput.