Meeqqanik inuusuttunillu suleqatigiinneq pingaarnerutillugu ingerlanniarlugu, Kanukokap septembarip 11-aniit 13-ianut nunatsinni kommunit sisamat Sisimiuni Taseralimmi isumasioqatigiissinniarpai.
Kommunini sisamaasuni ataatsimiititaliani siulittaasut kiisalu
isumaginninnermut atuartitaanermullu immikkoortuni pisortat peqataanissaannut
aggersarneqarsimapput, tamatumanilu aamma Namminersorlutik Oqartussat
sammisamullu atatillugu ilisimatusartut
saqqummiussisuussallutik.
Isumasioqatigiinnerup siunertarivaa, meeqqanut
inuusuttunullu tunngasutigut suliniutit malinnaaffiginissaat, tamatumani
pingaartillugu kommunini sullissiviit assigiinngitsut qanimut, kommunit kiisalu
kommunit Namminersorlutillu Oqartussat akornanni
suleqatigiinnissaat.
Isumasioqatigiinnerup ingerlanerani sammisaqartitsinerit
arlallit ingerlanneqartassapput, tamatumanilu peqataasut namminneq kommuniminni
pitsaasumik suliniuteqarfimminnik saqqummiussinissaannut periarfissaqassallutik,
ilaatigullu aamma oqallisissallutik taamalu misilittakkaminnik pisortaqarfiit
akimorlugit tunniusseqatigiillutik.
Qeqqata Kommuniani Ilinniartitaanermut Ilaqutariinnermullu Pisortaq, Vibeke
Møller Jensen, isumasioqatigiissitsinissamut qilanaarpoq.
- Ataatsimoorluni
isumasioqatigiissitsinerit taamatut ittut tamatigut soqutiginartuusarput,
ilutsinnimi immitsinnut kaammattoqatigiissinnaasaratta. Sunut tunngasutigut
qanoq iliuuseqarsimanerit tusarnissaat qilanaaraara, tassa kommunit allat
piffissami qaninnerusumi sutigut qanoq iliuuseqarsimanersut, aammattaarlumi
misissuisimanerit ilaasa saqqummiunneqarnissaat qilanaaralugu, tassa Kalaallit
Nunaanni meeqqanut inuusuttunullu tunngasutigut pingaartitsinerulernermik
kinguneqarsinnaasut.
- Qeqqata Kommuniani siunissaq eqqarsaatigalugu meeqqat inuusuttullu atugassaqartitaanerisigut pitsaanerulersitsinissaq tamatigut anguniagaraarput. Massakkorpiaq atuartitaanermut tunngasut pingaartillugit sammineqarput, ukiunilu aggersuni suli annertunerusumik iliuuseqartussaalluta, tassa meeqqat atuartitaanermikkut pitsaanerusumik angusaqarnissaat anguniarlugu. Tamatumani ilaatigut assersuutigalu, atuarfiit angajoqqaallu akornanni pitsaanerusumik suleqatigiinnissat anguniarneqassallutik, taamaalilluta meeqqap ikorfartorneqarnissaminik pisariaqartitai piaartumik maluginiarsinnaajummallugit.
- Suliffeqarfiit akimortumik suleqatigiinerat ineriartortipparput, tassa kommunimi inooqataanermut attuummassutillit eqqarsaatigalugit. Takusinnaavarpummi inooqataanermut tunngasutigut meeqqat inuusuttullu eqqarsaatigalugit akimortumik suleqatigiittariaqarnermik takunnissinnaasut arlaliummata, tamatumanilu siunertaalluni ataatsimoorluta piaartumik qanoq iliuuseqarnissaq qulakkeerniassagipput, tassa meeqqat ilaqutariillu inooqataanikkut arlaatigut ulorianartorsiortut iliuuseqarfiginissaat. Taamaattumik Qeqqata Kommuniani inulerisut, peqqissaasut, tarnip pissusaanik ilisimasallit, ilinniartitsisut allallumi ilisimasallit peqatigiillutik atortussanik suliaqarput, tassa akimortumik suleqatigiinnermi pitsanngutaasinnaasussamik.
Isumasioqatigiinnissami sammisassat pillugit Sisimiuni Kulturikkut
Illorsuarmi Taseralimmi ingerlariusississaq una
takusinnaavat.