Aatsitassamik nutaamik anorthosit-imik Itillip kangerluata qinnguani Kangerlussuullu ilaani nassaartoqarneratigut aatsitsivimmik Maniitsup qeqertaani sanasoqarnissaanik aalajangertoqarnissa piffissaq qaniinerusoq eqqarsaatigalugu neriulersitsivoq. Qeqqata Kommuniani borgmesteri Hermann Berthelsen kiisalu Aatsitassanut Attaveqaqatigiinnermullu Ataatsimiititaliami siulittaasoq Gedion Lyberthip oqaatigaat, Hudson Resourcip taamaatut ittumik nalunaaruteqarneratigut neriullualerlutik.
Hermann Berthelsen oqarpoq aluminiuliornissamut periarfissatsialaasoq asseqanngitsoq Kangerlussuarmiit aatsitassamik pilersorneqartumik, tamatumalu aatsitsinermut aningaasartuutit annertuumik millisissagai. Aatsitassamik nunarsuup illuatungaanit pisumik pinnani taava nammineq nunatsinneersumik pilersorsinaalissavarput.
Gedion Lyberth nangilluni oqarpoq, aatsitsivissaq ernngup nukinganik pilersorneratigut taava nukissiorneq minguinnerusoq avatangiisinullu ajunnginnerusoq allanut nukissioriaatsinut sanilliullugu. Tamannalu pitsaaneroriarfissaqanngilaq tassami periarfissaqalerpugut aatsitsivissaq ernngup nukinganik minguitsumik aammalu aluminiuliassamik Kangerlussuarmeersumit pilersussallugu Maniitsumiit ungasinngitsumit.
Hudson Resources Inc. Canadamiunit pigineqartoq aatsitassanik misissueqqaartuuvoq 2003-imiilli Kangerlussuarmi aallartissimalluni. Aallarteqqaarami diamantisiorneq ingerlassimavaa kingornalu Sarfartumi aatsitassat qaqutigoortut misissulersimallugit, kisianni ukiuni kingullerni anorthosit Kangerlussuup saqqaaniittoq ukkatarilersimallugu. Tassani Naajaanik atilimmi anorthosit annertoorujussuaq nassaarisimavaat tuluttut taasaminnik “White Mountain” (qaqqaq qaqortoq). Anorthosit aluminamik, siliciumimik kiisalu calciummimik sananeqaateqarpoq minguitsorujussuaq.
Hudson Resourcip tusagassiutinut nalunaarutaani takuneqarsinnaavoq aatsitassaq anorthosit arlalillinnut atussallugu periarfissaqartoq: Aluminaliaralugu aluminiumut aatsitassatut, Nalinginnaasumik alumina aatsitassaq bauxit-imiit sananeqartaraluarpoq nunanit nunarsuatta illuatungaaneersuniit. Aamma glasfiberiliornermut qalipaasiornernut akuutissatut atorneqarsinnaasoq oqaatigineqarpoq.
Hudson Resources nalunaarpoq Aatsitassanut Aqutsisoqarfimmut piiaanissamut
akuersissummik qinnuteqarlutik. Piianissamut akuerineqassagunik taava
periarfissaqalissaaq aatsitassamik 2014 piaalernermik taannalu suliffissanik
25-inik pilersitsisinnaavoq taassumalu kinguneranik kommunimut akileraarutinik
isaatitsissutaalissalluni.
Naajaat, White Moutain,
Itillip kangerluarta qinnguani Kangerlussuarmiiittorlu
Annertunerusumik paasisaqarusukkuit attavigiuk
Peter Søren Olsen
Aluminiumskoordinator
Qeqqata Kommunia
Mobil:
(+299) 58 55 10