Siullertut atuartut takuniaatinneqassapput, kingornatigullu innuttaasut soqutiginnittut takuniaatinneqassallutik. Takuniaatitsinerit marlussuit ingerlanneqassapput, siulleq nal. 15.00 tullialu nal. 16.00. Takuniaatitsineq sukkanniuuffiup isaariaaniit aallartissaaq, tamanna Sermersuarmut aqqusinermiit Kangerlussuarmiit kangimut 20 km ungasitsigisumit aallartissalluni.
Takuniaatitsinerit maleruagassat sukannersut malillugit ingerlanneqassapput, Extreme E-mi aaqqissuisut innuttaasullu akornanni qanillisoqannginniassammat.
”Neriuppugut innuttaasut amerlasuut sukkanniuuffissamut takuniaatitsinermut peqataassasut, oqaluttuarisaanermi pisunut immikkuullarilluinnartunut pingaarutilinnullu innuttaasut qanimut malinnaanissamut periarfissaqassammata, ” Borgmesteri Malik Berthelsen oqarpoq.
Siusissukkut aallakaatitsinerit
Aaqqissuisut oqariartuutigaat, sukkanniuuttussat sukkanniuuffissatik tallimanngornikkut misilittarlugit ingerlavigiumaaraat. Arfininngornikkut piffissalersukkamik ingerlaartoqassaaq, sapaatikkullu semifinalit, crazyrace finalilu ingerlanneqassallutik.
Sukkanniuunnerit arfininngornikkut sapaatikkullu toqqaannartumik nunarsuaq tamakkerlugu aallakaatinneqassapput, sukkanniuunissallu piffissalersugaanerat Europami Nordamerikamilu aallakaatitsinermi piffissaq pitsaanerpaaq aallaavigalugu pilersaarusiorneqarsimapput. Taamaattumik toqqaannartumik sukkanniuunnissat malinnaaviginiaraanni makiaarnissaq pisariaqarpoq, tassami arfininngornermi sukkanniuunnerit 9.30 – 11.30 akornani aallakaatinneqassapput ualikkullu 14.00-16.00 aallakaatitsisoqaqqissalluni. Sapaatikkut sukkanniuunnerit aallakaatinneqarnerat pissaaq 8.00-09.30 kiisalu 12.00-14.00
Aaqqissuisut oqaluttuarput TV-kkut imaluunniit inuit attaveqatigiittarfianni takuneqarsinnaanera pisup ingerlanneqarnerata tunngavigaa. Unammiffiup eqqaanni najuukkaanni, malinnaaniarneq takunninniarnerlu ajornartorsiutaassapput. Sukkaniunneq KNR-TV-kkut toqqaannartumik aallakaatinneqassaaq.
Kajumissutsimik sulisussanik amingaateqarput
Visit Greenland, Arctic Circle Business aamma Qeqqata Kommunia kiisalu TeleGreenland nunatsinni kulturikkut ilisimaneqarluartut taamatullu inuit nuimasut pisussami immikkut aaqqissuussaasumi ”boble”-miissapput. (Allanut aaqqissuussamut attuumassuteqanngitsunut innuttaasunullu akuleruteqqusaanatik inissisimassapput.)
Taamatullu COVID-19 pissutigalugu nalornineq killilersuutillu pissutigalugit Extreme E-p aamma Qeqqata Kommuniata kajumissutsimik sulisussanut pilersaarutit saqqummiussinnaasimanngilaat. Maannakkullu ersarinnerusumik maleruagassanik nalunaaruteqartormat oqaatigineqarsinnaanngorpoq, kajumissutsimik suleqataaniartut tamakkiisumik akiuussutissamik kapineqarsimanissaat piumasaqaataasoq taamatullu ”eventboble”-miissallutik sisamanngornermiit sapaat ilanngullugu; imatut paasillugu innuttaasunut akuliussinnaanngikkallassapput. Kajumissutsimik suleqataaniartunut suli ataasiakkaanik inissaateqarpugut, taakkua pillugit attavigineqarsinnaavoq: kangerlussuaq@qeqqata.gl