Kommunalbestyrelsimit maanna Masanti A/S-ip siunnersuisuunissaanik toqqarpaa, taassumalu Atuarfik Kilaaseeqqap qanoq issusaanut naliliinermik suliaqarnissamik, illup iluata silaannaanik naliliinermik, atugassatut siunnersuummik, suliniutitut siunnersuummik aammalu Atuarfik Kilaaseeqqap nutarsarneqarnissaanut allilerneqarnissaanullu suliariumannittussarsiuussinissamut suliniummik suliaqassalluni.
Piffissami matumani Maniitsumi atuartut sumiiffinni assigiinngitsunut nuutsinneqarnikuupput, ilaatigut katersortarfimmi, nipilersornermut ilinniarfimmi aammalu inini allani atuartitsinermut atorneqartartuni. Atuarfimmik sanaartornermut ataatsimiititaliaq, Atuarfik Kilaaseeqqamit sinniisoqarfiusumit, atuarfiup siulersuisuanit kiisalu teknikkeqarnermut ingerlatsivimmit, atuarfiup nutarsarneqarnissaanut pilersaarut naapertorlugu ingerlanneqarnissaanut Kommunalbestyrelsimut innersuussuteqarput. Atuarfimmik sanaartornermut ataatsimiititaliamit suliniutip kinguarteqqinneqarnissaa kissaatigineqanngilaq, atuartummi ilinniartitsisullu atuarfiup silaannalunnera patsisaalluni sumiiffinnut assigiinngitsunut siammartiterneqarsimanerat naapertuutinngitsutut isigineqarpoq.
Taamaalilluni atuarfiup nutarsarneqarnissaa pilersaarut naapertorlugu ingerlaannassaaq, tamatumalu saniatigut atuarfiup allilerneqarnissaanut aningaasaateqarfinnut qinnuteqaateqartoqassalluni, soorlu eqaarsaartarfimmut nutaamut. Taamaaliornikkut immikkoortoq 2-mut suliamik ingerlatsisoqarsinnaassaaq, aningaasaliissutit apeqqutaallutik atuarfik nutarsagaq allilerneqarsinnaalluni. Oqaatigineqarpoq, aningaasaateqarfiit assersuutigalugu Danmarkimi atuarfiini eqaarsaartarfinnut tamatigoortunut atortorissaarutinullu allanut tapiissuteqartarsimasut.
Maniitsumi innuttaasut pingaartumik angajoqqaat nutaamik atuarfittaarnissamik aningaasaateqarfinnit aningaasaliiffigineqarsimasumik kissaateqarnerat kommunimi maluginiagaraarput. Atuarfik nutaaq atuarfimmik pioreersumik ingutserinermik kiisalu inigisaanut atuarfimmik nutaarluinnarmik sanaartornermik imaqassaaq. Ullutsinni sanaartornermut akit naapertorlugit meeqqat atuarfiannik nutaamik sanaartornissaq 200-250 mio. koruuninik naleqassaaq, tamatumalu saniatigut isaterinermut aningaasartuutit ilanngunneqassallutik.
Erseqqissaassutigineqassaaq piffissami matumani aningaasaateqarfimmit tapiiffigineqarnissamut neriorsuummik pigisaqartoqanngimmat, tamatumalu saniatigut meeqqat atuarfianut nutaamut aningaasaateqarfinnut qinnuteqartoqarnikuunani. Taamaattumik suliniutip piffissaligaanngitsumik kinguarteqqinneqarluni aningaasaateqarfinnit aningaasaliiffigineqarnermit, Atuarfik Kilaaseeqqamut nutarsaanissamut pilersaaruteqarnissaq Kommunalbestyrelsimit pingaarnerutinneqarpoq.
Kommunalbestyrelsi Atuarfik Kilaaseeqqap nutarsarneqarnissaanut 71 mio. koruuninik immikkoortitsinikuuvoq.
Paasissutissat sukumiinerusut
Gideon Lyberth
Borgmesterip tullia, viceborgmester
Mobil: +299 52 04 52