Arpaatinik sisorarluni misiliineq, sangusaarneq, erinarsorneq, nipilersorneq, qaqqasiorneq, qalipaaneq, qaannamik allunaariarneq, qamuteralanneq, nerrivimmi arsaararneq, volleyballerneq allarpassuillu ulloq apriilip 21-ani innuttaasut kikkulluunniit misilissinnaassavaat.
- Qeqqata Kommunia Timersoqatigiit Kattuffialu (GIF) suleqatigiinnissamik isumaqatigiissutaanni piffinni peqatigiiffiit attaveqatigiinnissaat, suleqatigiinnissaat anguniagaqartumillu ineriartoqatigiinnissaat anguniagaavoq. Tassunga atatillugu peqatigiiffiit suleqatigiillutik naapittarnerminni peqatigiiffiit ulluat pilersippaat innuttaasunut tamanut ammasussatut. Taamaalilluni peqatigiiffiit sammisaannik innuttaasut kikkulluunniit misiliisinnaapput. Soqutiginnikkunillu ilaasortanngorsinnaallutik, Qeqqata Kommuniani Suliniutinut siunnersorti, Apollonie Kreutzmann oqarpoq.
Ilanngullugu Qeqqata Kommuniata GIF-ip 2030-mut takorluugaa ”Nunarsuarmi timimik aalatitsinerpaaq” tapersersorpaa, kissaatigalugu ullormi tassani innuttaasut aalanissaminnut periarfissinneqarumaartut.
Misiliineq siulleq
Peqatigiiffiit Ulloqartalernissaa ukioq manna siullermeerlugu Qeqqata Kommunia peqatigiiffiit suleqatigalugit aaqqissuusserngaalerput. Ukiut tamaasa peqatigiiffiit suleqatigiillutik taamatut arlaatigut aaqqissuussisoqartalernissaa anguniarneqartut ilagaat.
Qeqqata Kommuniani illoqarfiit nunaqarfiillu tamarmik taamatut aaqqissuussisalernissaat suliniutigineqarpoq. Sisimiuni ulloqartitsinissamut innuttaasut tamarmik; meeqqat, inuusuttut, inersimasut utoqqaallu peqataalluarnissaat Qeqqata Kommuniata neriuutigaa.
Peqatigiiffiit Ulluanut aaqqissuusseqataasut tamarmik nammineq kajumissusertik atorlugu aaqqissuussipput.