Malene Brobergip meeqqat inuusuttullu ilinniarneri qanoq pingaaruteqartigineri eqqumaariffigilluinnarpai.
- Meeqqat inuusuttullu, aammalumi inuuneq naallugu ilinniarneq qanoq pingaaruteqartigineri eqqumaariffigilluinnarpakka, qilanaarivaralu Qeqqata Kommuniani pissutsinut pulaffiginninnissara, Malene Broberg meeqqat ulluanni, juunip aallaqqaataani pisortaaninngortussaq oqarpoq.
Aningaasaqarnermut aqutsinermut misilittagalerujussuummat aammalu ilaatigut Pisiffimmi aningaasaqarnermut aqutsissummik annertungaatsiartumik taarsersuinermut siuttuunikuummat, Qeqqata Kommuniata atorfinitsissallugu ilaatigut toqqarpaat. Melene Broberg kommunip aningaasaqarnermik aqutsissutaanik ataqatigiissikkiartuaanerani qulakkeerinneqataassaaq.
- Qeqqata Kommunia ilisimavara nutaaliorusuttutut ineriartorusuttutullu. Qilanaarivaralu aqutsisunut akuulernissara qulakkeerinnissinnaallunga aningaasaqarnikkut aqutaalluakkamik, politikkikkut anguniakkanik aqqutissiueqataasinnaanissannut. Minnerunngitsumik ukiuni makkunani pisortat aningaasanik atuisinnaanerat killeqarnerutillugit eqqarsaatigalugu, Malene Broberg oqarpoq.
Malene aningaasaqarnermik aqutsinermi ilisimasaqarpoq, Mittarfeqarfinni Pisiffimmilu Naatsorsuuserinermut pisortatut aamma Aningaasaqarnermut pisortatut sulinikuunera kommunip aningaasaqarnermik aqutsineranik nukittorsaanissamut qulakkeerinneqataassaaq, taamatullu kommunimi aningaasatigut aqutsinermik nukittorsaassalluni. Minnerunngitsumik kommunip aningaasalersuinissamut tunngassutilinnik suliaqarnerani suliat pitsaasumik naammassineqarnissai isumaginneqataaffigissavai.
- Suleqatissakka kommunalbestyrelselu qanimut suleqatigilernissai qilanaarivara, Malene Broberg naggasiivoq.
Qeqqata Kommuniani pisortaanerup Juliane Henningsen Heilmannip Malene Broberg suleqatigilernissaanut qilanaarpoq.
- Nuannaarutigaara Aningaasaqarnermut Ilinniartitaanermullu Pisortaanermik pikkorissumik piukkunnarluinnartumillu atorfinitsitsigatta, Malenep Qeqqata Kommuniani ineriartortitsinitsinni suleqatiginissaa qilanaaraarput.
Atorfinitsitsinermut ataatsimiititaliap atorfinitsitsinissamut toqqaaniarnerminnut maluginiarsimavaat Malene Broberg aningaasaqarnermut aqutsinermi suliassanut tunngatillugu aqutsinermillu misilittagaqarluartoq. Kiisalu pisortartut atorfeqarnermini pikkorillunilu ilikkarusussuseqarluartoq.
Malene Broberg Syddansk Universitetimi aningaasaqarnermut tunngasunik aningaasaqarnermullu aqutsinermut ilinniarnikuuvoq, kingornali pisortat suliffeqarfiutaanni namminersortunilu suliffeqarfinni aningaasaqarnermut aqutsinermut tunngasunik suliaqarsimalluni.