Avannaata Qimussersua Arctic Circle Racelu naammassilluarsimalerput.
Soorunami Borgmesteritut nuannaarutigaara aaqqissuussat angisuut ataatsikkut innuttaasut ikioqatigiinnermikkut kusanartumik ingerlanneqarsinnaanerat takutimmassuk.
Misigisanullu pikkunartunut ACR-imi Qimusseq Sisimiullu siulersuisunut ikiuuttunullu tamanut qujanarujussuaq!
Avannaata Qimussersua Sisimiunut nuuttussanngoriasaarmat piffissami sivikitsumi aaqqissuutipallapparsi, aamma Arctic Circle Racemi ikiuuttut illoqarfik atortulersuutillu qimallugit ilaatigut sinippiassanasi suliarujussuarmik suliaqartusi, immaqa suliassi qanoq annertutiginera eqqarsaatigivallaartanngikkaluarissi, ilumoorlunga ima oqarfigiumavassi, qummukujaarsuakkut qummukaqattaarlutik unammisuniilluunniit nersunarnerusarpusi!
Tassami akilerneqarnissamik eqqarsaateqarasi ullaarnganiit unnussuarmut tiimerpassuarni sulisarnisi eqqarsaatigalugit ilumut ajasoornaqaaq! Tamannalu aningaasanngorlugu nalilerneqarsinaanngilaq.
Taamaattumik siulersuisut ikiuuttullu, tupinnaqaasi, pikkoreqaasi aamma kakkaqaasi! Tamannalu Kalaallit Nunaat sinnerlugu ataqqinaatigaarsi! Oqaasiinnartigullu qujaffigissallusi amigaraluartoq, kommuni sinnerlugu ima oqarumavunga, tamassinnut QUJANARSUAQ!
Ikiuuttunullu tamanut tulluartillugu Tønnes Kreutzmannip taalliaa issuarusuppara,
”Qujavunga ajornanga iterluartitaagama,
makillutit suligit maani, tunissutaammat sulinerit”
Aaqqissuussat taamaattut sumiiffimmi aaqqissuussiffiusumi pitsaasumik innuttaasunut sunniuteqartarnerat aamma takuarput. Tassami Avannaata Qimussersuata Sisimiuni ingerlanneqarnerata kingorna, paasivarput meeqqat arlallit qimmeqalerusullutillu qimussertalernissaminnik pilerisulersimasut, soorluli ACR-ip ingerlanneqartalernerata kingorna inuppassuit sisorartanngikkaluarlutik ACR-imik misiliinissartik siunertaralugu sisorartalersimasut takusareerigut.
Aaqqissuussallu ataatsikkut ingerlanneqarnerisa qanoq alutornartiginerat nammineq ACR-imi arpaqataaninni misigivara. Tassami tammaarsimaarfiup tungaanut ingerlaarnitsinni qimussit siulliit kangimut qaqqarsuarnik avatangiiseqarlutik ingerlaartut isigalugit isigisaq ilumut pikkunaqaaq!
QUJANARSUAQ!