Sisimiut Kangerluarsuk Tulliulli akornanni ATV-nut aqqut 2022-imi Naalakkersuisuniit ASN-imut akuerineqarnermi kingorna sanaartorneqarluni aasaq manna nanginneqalerpoq, naatsorsuutigineqarporlu aappaagu 2024-imi naammassineqassasoq.
ATV-nut aqqummik inaarsaanissamut aningaasartuutit tamakkiisut minnerpaamik 20,7 millionit koruuninik aningaasartaqarmata, minnerpaamik 5,3 millionit koruuninik ilassutitut aningaasaliissuteqartoqarnissaa pisariaqartinneqarpoq.
Kommunalbestyrelsip ataatsimiinnermini ATV-nut aqqutip tamakkiisumik naammassinissaanut aqqusiniassaq kiserngoruttoq, tassa Sisimiut Kangerluarsuk Tulliullu akornanni aqqummik sanaartornissamut 5,3 mio. koruuninik ilassutitut aningaasaliissuteqarnissaa amerlanerussuteqartut akuersissutigaat.
ATV-nut aqqut tamakkiisumik naammassineqarnissaa ataatsimiinnermi qulakkeerneqarmat Qeqqata Kommuniani borgmesterip tullia siulliup Gideon Lyberthip nuannaarutigaa.
- Nuannaarutigaara inuttaasuniit utaqqikatanneqarsimasoq aappaagu 2024-imi naammassisusanngorlugu aasaq manna nangeqqissaanngoratsigu. Taamaasilluta innuttaasut ajornannginnerusumik asimukarsinnaalernissaannik aammalu takornarissanut pissanganartumik allaanerusumillu neqerooruteqarsinnaanermik pilersitsissaagut, tamatumunngalu isumalluaqaanga, borgmesterip tullia siulleq Gideon Lyberth oqarpoq.
Iluarsartuussinissaq
Kangerlussuup Kangerluarsuk Tulliullu akornanni ATV-nut aqqutip atorneqalertinnagu Kangerlussuarmit 16 kilometerit siulliit iluarsaanneqarnissaat pisariaqartinneqarpoq. Iluarsartuussinerup taassuma immikkoortua siulleq 2022-mi iluarsartuunneqarpoq, 2023-milu inaarsarneqarnissaa naatsorsuutigineqarluni.
Imeq illersorniarlugu piumasaqaatit sakkortunerusut
Sisimiut Kangerluarsuk Tulliullu akornanni ATV-nut imeqarfiup eqqaani aqqusinertaarsuarmik pioreersumik Sisimiunut attaviliinissamut imermik maqitsivimmut Nukissiorfiit aqqusiniutaata sioraasup ilaanik tigusinissamik imaqarpoq. Imerli illersorneqassaaq. Kangerluarsunnguup tungaanut kuussuup tungaanut naammattumik sivinganilimmik imermut kuuffissiornissamut aqquserngup toqqavia portusooq pisariaqarpoq, taamaalilluni aattortumit imeq aamma biilinit sinnerusuttuusinnaasoq imeqarfik taassumalu nunataa avaqqullugu kuutsinneqarsinnaassalluni.
ASN-imik akuersissummi piumasaqaataasoq malillugu imeqarfiup qanittuani qaartiterisoqaqqusaanngilaq, taamaattumik ujaqqanik qaartiternerlukunik assartukkanik aqqusinermut toqqavik suliarineqartariaqassaaq, aammalu aqquserngup imermullu kuussinerup ataani uuliamik pitarneqarsinnaanngitsumik ameraasalimik pilersitsisoqassalluni.
- Imeqarfik illesorniarlugu piumasaqaatit assigiinngitsut soorunami akisunerulersitsipput, kisianni tamatta soorunami soqutigisarivarput minguitsumik imeqarnissarput, taamaattumik akisunerulersitsisut avaqqussinnaanngilagut, taamak Malik Berthelsen naggasiivoq.
Taamaasilluni suliffeqarfik BJ Enteprise suliarinnittuussaaq.