Kangerlussuarmiit ATV-nut aqqutip affaata siulliup ammarneqarnera

2024-mi oktobarip tallimaanni arfininngornermi Sisimiut Kangerlussuullu akornanni ATV-nut aqqutip affaa siulleq Qeqqata Kommunianit ammarneqarpoq, sinneratali Sisimiuniit ingerlasup ammarneqarnissaa aasap tullianut kinguartinneqarpoq.

Sisimiuni kinguartitsineq
Sisimiut Kangerlussuullu akornanni ATV-nut aqqutip tamarmiusup ammarneqarnissaa 2025-mi aasaaneranut kinguartinneqartariaqarpoq. Tamanna septembarimi imeqarfiup qanittuani aqquserngup qulakkeerneqarnissaanut naatsorsuutiginngisanik unamminartunik nalaataqarnermik patsiseqarpoq. Sisimiuni erngup pitsaassusaata qaffasissuujuarnissaa qulakkeerniarlugu, imeqarfik sinerlugu aqqusinivimmik sinaakkusersukkamik kiisalu pakkersimaartitsisumik kuussinilimmik sanaartortoqassaaq.
Ajoraluartumik imeqarfik sinerlugu aqqutissiami naatsumi qaqqamik navianaallisaanissamut unamminarsinnaasunik nalaassisoqarsimavoq. Taamaattoqarneranilu unamminartut misissuataarneqarneranni septembarimi sanaartorneq unitsinneqarsimalluni. Maannakkullu 2024-p sinnerani qaqqamik navianaallisaanermik ingerlatsisoqarnissaa aammalu 2025-mi maajimi juunimilu aqqusinermik naammassiniaanerup ingerlanissaa pilersaarutaavoq, taamaalionikkullu 2025-mi juulip aallaqqaataata missaani aqqusineq ammarneqarsinnaassalluni.
Erseqqissaatigineqassaaq imeqarfimmi aqqusinikkut aammalu Sisimiut eqqaani ATV-nik aqqutikkut angallanneq suli inerteqqutaammat. Apisimaleriarpat ukiut siuliitulli imeqarfiup killeqarfiani aqqutissiatigut qamuteralannik angalasinnaaneq periarfissaaqqissaaq.

Kangerlussuup eqqaani ammaaneq
ATV-nut aqqutip affaata siulliup Qeqqata Kommunianit maannakkut ammaasinnaaneranut Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit akuerineqarpoq. Taamaattumillu Kangerlussuup qanittuani Kellyville-mit ATV-nut aqqummit 84 km. siulliit ammarneqalerput.
84 km.-it kingorna ukiuunerani aqqutissiat marluusut aqqutigalugit Kangerlussuup tungaanut ingerlavigineqarsinnaapput, taakkulu Tasersuaq aammalu Amitsorsuaq aqqusaarpaat. Apinissaata kiisalu tatsit sikunissaata tungaannut 84 km.-iusutigut uteqattaarluni angalasarnissaq nammagineqartariaqarput.

Tasersuup qooruatigut illerngit illuarfiusut
2024-mi arfininngorneq oktobarip tallimaanni Tasersuup qooruani ATV-nut aqqutit illerngit illuarfiusut marluk aamma ammarneqassapput. Illerngit illuarfiusut marluusut 2 km.-isut aammalu 4 km.-isut takitigisut Qorlortumut Tasersuarmullu ingerlaviusuupput. Qorlortumit nunarsuarmioqatigiinnut kingornussassamut Aasivissuarnut pisuttoqarsinnaavoq, qajartortoqarsinnaavoq imaluunniit ukiup qanoq ilinera apeqqutaalluni sisoraartoqarsinnaalluni . Tasersuarmit Itinnermut, Sarfannguanut aammalu Sisimiunut umiatsiarluni ingerlaqqittoqarsinnaavoq. Illerngit illuarfiusut Kellyville-mit 22 km.-inik 24 km.-inillu ungasissuseqartumik inissisimapput.
Illerngit illuarfiusut tungaanut ATV-nut aqqut siulleq 24 km-iusoq sinneranut sanilliullugu, ATV-nut aqqut pitsaanerusumik suliaavoq. Taamaalilluni aqqummi 24 km.-isut takitigisut siulliit ukioq naallugu ingerlaviusinnaanissaat Qeqqata Kommunianit neriuutigineqarpoq, aqqutimmi sinnera upernaakkut aputip aattulernerani kiisalu siallernerani ingerlavigineqarnissaasa ajornakusoornissaa naatsorsuutigineqarmat.
Borgmesterip tullersortaata aappaa Anna Karen Hoffmann-ip oktobarip tallimaanni Kangerlussuarmi ATV-nut aqqutip ammarnissaanut qilanaarpoq aammalu Kangerlussuup eqqaani pinngortitamut innuttaasut, piniartut takornarialerisullu appakaaffissaqarluarnerulernissaanut qilanaarluni.

Paasissutissaqqissut:
ATV-nut aqqummi angallannermi angallannermut inatsit atuuttuusoq Qeqqata Kommunianit erseqqissaatigineqarpoq. ATV-nut aqqutitsigut angallannermi, imaatigut imaluunniit qamuteralannik angallannermituulli arlaliusoqartariaqaraluarpoq. Taamatuttaarlu oqarasuaatit satellitsikkoortut aamma/imaluunniit in-reach-it nassarneqartariaqaraluarput, taamaalilluni attaviit ajoquserneratigut imaluunniit kinguartoornermi ilaqutaasunut attaveqartoqarsinnaassalluni aammalu ikiortissarsiortoqarsinnaassalluni.
ATV-nut aqqutikkut taamaallaat angallattoqartarnissaa aammalu ATV-nut aqqutip avataatigut angallattoqartannginnissaa Qeqqata Kommunianit erseqqissaatigineqarpoq. Angallanneq nunakkoorutinik taamaallaat pissaaq, soorlu ATV-t UTV-llu.
ATV-nut aqqutip siulliup affaata ammarnissaanut Borgmester Malik Berthelsen Naalakkersuisoq Kalistat Lund-imik atorfilittaanillu suleqateqarneq nuannaarutigaa, aammalu aasaqqippat ATV-nut aqqutip tamarmiusup ammarneqarnissaanut qilanaarluni.