Qeqqata Kommuniata Timersoqatigiit Kattuffiat suleqatigalugu suleqatigiinnissamik isumaqatigiissutaanni kajumissutsimik suliaqarnerup annertusarneqarnissaa anguniagaasa ilagaat.
Timersoqatigiit Kattuffiata 2020-mi Idrættens Analyseinstitut (IDAN) suleqatigalugu nunatsinni timersorneq pillugu assigiinngitsunik misissuititsinerani ersersinneqarpoq misissuinermi peqataasut 59%-ii kajumissutsimik suliaqarnissamut ikiuunnissamut aperineqarunik imlt. suliassat soqutiginarpata kajumissutsimik suliaqarusussinnaasut. Taamaattumik tassunga atatillugu kommunimi innuttaasut soqutigisaat aallaavigalugit kajumissutsimik sulerusuttut aammalu peqatigiiffiit ikiuuttussanik pisariaqartitsisut periarfissanik ersarissaaffigerusuppagut.
Tamannalu pissaaq kommunimi Suliniutinut Siunnersorti Apollonie Kreutzmann saaffigineratigut. Saaffiginnittut suliaqarfigerusutaat aammalu peqatigiiffiit imlt. suliffeqarfiit ikiuuffiusinnaasunik amigaatigisaat allattorneqarlutik katiterneqassapput ataqatigiissarneqarlutillu. Periarfissat aamma ilagaat innuttaasut arlaatigut peqatigiiffimmik susassaqartitsinermilluunniit aallartitsinissamut nalornissuteqarunik aqqutissiorneqarsinnaanissaat.
Kajumissutsimik suliaqarneq timersornerinnarmiinngilaq aammali inooriaatsini allani inuiaqatigiinnut iluaqutaasinnaasuni ingerlanneqarsinnaalluni, soorlu innuttaasunik kiserliortunik ataatsimoortitsineq, utoqqarnik ikiuunneq imlt. nammineq soqutigeqqissaakkamik eqimattani ingerlatsineq.
Suliniutinut Siunnersortip 2022-mi Kandidatitut ilinniarnermini inaarutaasumik kajumissutsimik suliaqarneq pillugu immikkut allaaseraa. Tassani paasisat makku ilagaat:
• Inuiaqatigiinni sumiiffinni kajumissutsimik suliaqarnerup ukkatarineqarluarnerani pinerliinerit inuaqatigiinnilu ajornartorsiutit annikillisaaqataaffigisarpai.
• Innuttaasut kajumissutsimik suliaqarnissamut nukissaqarnerminnut pissutigigajuttagaasa ilagaat:
1) Suliffimmi ulaperulunnginneruneq
2) Aningaasarsiat naammaginartumik annertussuseqarpata
3) Angajoqqaat sunngiffimmi sammisassaqartartunik meerallit
• Kajumissutsimik suliaqartarnermi inuttut piginnaasatigullu ineriartorneq annertusisarpoq aammalu sumiiffinni inuttut atukkat pitsaanerulertarput periarfissanullu nutaanut ammaassisarlutik. Soorlu suliffissaqarnikkut allatigullu atorfissaqartitsinermi ikiortissaqarnerulerneq saaffissaqarnerulernerlu.
• Peqatigiiffinni sungiusartarnerit saniatigut ataatsimut sammisaqartitsisarnerit ingerlasarpata inuttullu atugassarititaasut pitsaagaangata kajumissutsimik suliaqartut amerliartulersarput
• Politikkikkut suliaqartunut, suliffeqarfinnut allatigullu ingerlatsisunut kajumissutsimik suliaqartunik amerlisaaniarnissaannut makku ilaatigut eqqumaffissaapput:
1) Kajumissutsimik suliaqartut assigiinngitsutigut nersorniarnissai
2) Piginnaasanik pikkorissaaneq ineriartortitsinerlu
3) Suliassaasinnaasunik periarfissaqartillugu tigussaasumik ersarissaaneq, soorlu piffissaq, sumiiffissaq aammalu suliassaqarfiit allattorneratigut
Qeqqata Kommunia Timersoqatigiit Kattuffiatalu suleqatigiinnerminni kajumissutsimik suliaqartut allatigut aamma suliniutigineqarfigaat, ilaatigut peqatigiiffiit qaammatikkaartumik naapisinneratigut ulluinnarni sunngiffimmi sammisaqartunut pissutsit pitsanngorsarnissaat, kommuni peqatigiiffiillu kiisalu peqatigiiffiit akimut suleqatigiinnerat annertusarneqarnissaat ukkatarineqarlutik.
Kommunimut saaffiginnigit soqutigisatillu aallaavigalugit kajumissutsinnik suliaqarneq aallartillugu.
Saaffissaq:
E-mail: apol@qeqqata.gl
Oqarasuaat: 86 73 13