Sulinerup nalaani nikotinimik atuinnginnissamik aalajangiinitsinnut atatillugu isertuutissanngilara uggorigakku nikotimik atuineq nunatsinni appartinneqaraluarpat iluaqutissartai sunniutissailu pitsaasut annertunerusumik sammineqanngimmata. Soorlu nunatsinni innuttaasut 52%-iisa pujortartarnerat affaannanngoraluarpat tamanna nunatsinnut qanormitaavami sunniuteqassagaluarpa? Imaluunniit inuiaqatigiinni nikotinimik atuiffiunngiivikkaluarutta inuuneqqortussuserput ukiunik qanormita amerlatigisunik qaffassagaluarpa? Imaluunniit aningaasat allanut pitsaanerusunut atorneqarsinnaagaluartut ukiumut qanormitaavami amerlatigisut iluaqutaanngitsumik maangaannaq pujoortinneqartarpat?
Tamatta ilisimavarput tupap qanoq ulorianartiginera. Aamma qularinngilara pujortartut amerlasuut pujortartarnerminnik unitsitserusukkaluarlutik tupat akuinik pinngitsuuisinnaajunnaarsimanertik pissutigalugu unitsitsinissartik ajornartorsiutigisaraat. Taannaavorlu sulinerup nalaani nikotininik atuinnginnissamik aalajangiinitsinnut pissutaasoq annerpaaq. Pissutigalugu kissaatiginnginnatsigu meerartatta nikotininik atuilinnginissaat. Tassami ilisimatuussutsikkut uppernarsaatissaqarpoq uagut inersimasutut ileqqugut pitsaanngitsut pitsaasullu kinguariit tulliinut ingerlaqqittarnerat. Soorlu tupamik atuineq aamma kinguaariit tulliinut ingerlaqqittarnera takuneqarsinnaasoq. Taamaattumik nunatsinni nikotinimik atuineq annikillisissagutsigu inersimasut uagut taakkuuvugut nikotininik atuinerup takussaannginnerulernissaanik maligassiuisutut siuttuusussat.
Kommunitsinni atuartut peqqissusaasa misissuiffigineqarneranni kingullermi takusinnaavarput 9.-10. klasseni atuartuartut 40%-ii snusink atuilereersimallutillu pujortartalereersimasut. Isumaqarpungalu kisitsik taamak qaffasitsigisoq inersimasuusugut tamatta ilungersunartutut tigusariaqaripput aammalu nikotininik atuilinnginnissaannut tamatta ilungersoqataasariaqalaraluarnitsinnik annertuumik takutitsisoq. Tassami ilisimatuussutsikkut oqaatigineqarpoq inuusuttut 18-inik ukioqaleraangamik suli pujortartalersimanatik, taava inuunermi sinnerani pujortartalinnginnissaat ilimanaateqarnerusartoq. Takorluulaariartigumi ullumikkut meerartagut ukiut 10-20-it qaangiuppata nunarsuarmi nikotinimik atuinnginnerpaanut ilaalersimanissaat angusinnaagaluarutsigu qanoq tulluusimaarnartigissagaluarnersoq.
Erseqqissaatigissavaralu Qeqqata Kommunia nunarsuarmi kisiartaanngimmat sulinerup nalaani pujortaqqusinnginnermik aalajangiussisimasoq. Tassami Qallunaat Nunaanni kommunini 98-iusuniit 80-it sinneqartut uagutsituulli aamma aalangersimapput. Qallunaat Nunaannut ilaarsiinnarnertut uparuarneqassagaluarpalluunniit, oqaatigissavara nikotonip inummut ajortumik sunniutigisartagai nunarsuarmi inunnut tamanut assigiimmata. Tassami nunarsuaq tamakkerlugu inuit 5 mio. missaat ukiumut tupa toqqutigisaraat FN-imiit siornatigut oqariartuutigineqarpoq.
Taamaattumik inersimasunut tamanut ilungersortumik kaammattuutigissavara meerartatta peqqissusaasa illersorneqarnissaannik sulineq tamatsinnit pingaartinneqarlunilu illersorneqassasoq. Tamannami inuunermi ajoqutiginatigu iluaqutigiinnartussaavarput.
All. Malik Berthelsen, borgmesteri.