Sapaassuarmi ammartakkap aappaat

Meeraaninni juulleriartornera aamma juulli qanoq eqqaammasaqarfigaagit?

Meeraaninni juulleriartortarnera malugeqqaartarparput Adventip sapaassuisa siullianni, illoqarfiup orpiata ikinneqarnerani. Kingornalu ilaqutariit tamarrassuulluta utoqqartatsinni aanaakkut aataakkut illunnguanni Jaakunnguup Aqqusernaniittumi ataatsimoorluta nerrikkaangatta.
Ilaqutariit amerlasoorsuugaluarluta tattorliuttoqarani nerisassaaleqisoqaranilu ataatsimoorneq illarpalaaq tusarsaasarpoq. Meeqqaniit utoqqarnut tamarmik Juullip pilluarnartuanit sunnerneqarsimallutik ataatsimoornerat nuannersoq puigugassaanngitsorlu misigisarparput.

Juullip qalliartornerani anaanama assigiingitsunik juullisunnissinnaasunik sammisaqarterujooraanga nuannivissumik eqqaammasarpara. Mamakujuttuliorneq, juullerpaluttunik qiortaaneq juullerpaluttunillu kaageeraliorneq juullimut qilanaartuutigalugit sanasarpagut.

Juulliaqqap aqagunnerani innarluni iterfissamut pissangalluni immaqalu sininneq ajulilaarluni, ullaakkut sallaatsunnguamik itersartilluni juullermat. Allamik taama iterluarnartigisoqarunanngilaq. Angerlarsimaffimmi ataatsimuulaariarluni aanaa aataakkunnut ullaakkorsioriarluni. Tupinnaqaarlu illoorariit amerlagaluarluta, meerartaasugut tamavitta aanaakkunni poortugarsiassaqartinneqartarnerput minitaasortaqarata.
Ullaakkorsiornerup ingerlarujoornerani inersimasut tunisassaminnik tigooqqaassimallutik tunioraatillattaartut illartarlutik, ah nuan!

Unnukkut nereqatigiinnerup kingorna Jaakunnguup Aqqutaani silatangiaasaqattaarneq, ilaatigut allatut ajornartumik illoorariit/illuusaarariit avilluta amerlavallaannginnerussagatta pinnanneruniassagattalu. Ilumut meeraninni juulli eqqarsaatigalugu qujamasunnartuaannarpoq utoqqartatta pilluarnartumik ataatsimoorneq pingaartillugu juullisiortittarsimammatigut, paasitillugulu juullip pilluarnartua sunaanersoq.

Ullumikkut juulli qanoq atortarpiuk?

Ukioq manna juulli allatorluinnaq atortussagatsigu pissangavunga ilaatigullu nangiaammersutut ittarlunga. Meeraaninniit Sisimiut avataani juullisiorsimananga, maanna qallunaat nunaanni juulli misilittussanngoratsigu. Qujanaqaarli qilanaarnarlunilu ilaquttat amerlasuut juullisioqatigissagatsigit.

Soorunami juullimi pinngitsoorsinnaanngisatsinnik juullimi nerisassatsinnik tuttup quttoraanik nassiussereernikuuvugut, juullerujussuarmilu ataata kalaaliminertortitsisarami maqaasinarpallaannginnerussammat kalaalimininnguanik ilalaarnikuullutigit.


Inoqatinnut siunnersuutitsialaat pingasut suut tunniukkusuppigit?

• Meerannguit eqqaasittuarsigit juulli poortugaannaanngimmat, juullimilu ataatsimoorneq pilluarnartoq misigitissiuk utoqqaat peqatigalugit.
• Juullimut tunissutissaqanngikkuit nuanniilliutigeqinagu, juullimummi tunissutini annerpaaq akeqanngimmat nungussaananilu, tassalu asanninneq.
• Juulli annertuumik naneruutinik pinnersaatinillu ikuallajasunik atuiffiusarpoq, taamaattumik tamakkua eqqumaffigisigit mianersuullugillu. Putsumut malussarniutip ikiorluarsinnaavaasi.