Qeqqata Kommuniani ukioq manna 2024-mi Suleqatitsialannik toqqaaneq

Qeqqata Kommuniata pisortat suliffeqarfiutaattut atuilluartuunissamik kiisalu suliffeqarfiup peqqinnartuunissaanik immikkut sammisaqarpoq kajumissuseq, akisussaaqataaneq, ataatsimoorneq, pisinnaasatigut ineriartortitseqatigiinneq, oqaloqatigiinnerlu pingaartitaralugit.

Ukiut tamaasa Qeqqata Kommuniani suleqatitsialannik toqqaasoqartarpoq, Kommunimi qitiusumik allaffissuanit aamma toqqaasoqartarluni kommunip ataani suliffeqarfinnit soorlu atuarfinniit, meeqqerivinniit suliffiillu assigisaanniit.

Allaffissuup avataani ukioq manna 2024-mi suleqatitsialattut toqqarneqarput:

Neriusaaq Maniitsoq, Malu Karlsen Kreutzmann:
Suleqatit ineqartullu ilisimaarilluarlugit, suliassanik immikkoortitsisinnaalluarluni akisussaaffilersuillunilu illorsuup iluani pitsaanerpaamik ingerlasoqarnissaa pingaartitarimmagu. Illorsuup iluani immikkoortortat assigiingitsut suliassallu ammaa assigiinngeqisut ilisimalluarmagit, immikkortortani aqutsisut sulisullu suliassaat ataqatigiissaqqissaartarmagit pitsaassuseq qitiutillugu. Ineqartut, sulisut avataaniillu takkuttut tamaasa assigiimik ikiorusuttarpai, pisariaqartissuaarparput tamattalu pinngitsoorsinnaanngilarput. Kajumissuseqalersilluta ikiuilluarsinnaanngorlutalu siunnersortarmatigut. Tamatigoortuuvoq ammasuulluni, aalajaatsumik sullissinera suleqataaneralu ersarittaqaat tatiginartuulluni tunniussassaqartuaannarluni piffissaqartuaannarpoq.

Qupanuk Sisimiut, Paninnguaq Brandt:
Sulineq pitsaasumik nuannersumik qulakkeerinnittumik ingerlanissaanut aqqutissiuussilluartoq, siunnersuutinik tunioraajuartoq, qiimasoq saaffikkuminartoq. Suliffik tamaat isigalugu ataqatigiissaarilluartoq, suliassanik agguataarisinnaalluartoq. Aalajaatsumik nikerartumik ikiuisinnaavoq, ikiuerusussusilik, suleqatinik kaammattuilluartoq. Apeqqusersuinani suliassanik assigiinngitsunik tigooraasoq. Killiliisinnaassusilik, sullarillunilu aalajaatsoq.

Qitiusumik allaffeqarfinnii ukioq manna 2024-mi suleqatitsialattut toqqarneqarput:

Akissarsialerivik Sisimiut, Ane Lyberth Olsen:
Uummaarittuaannarpoq sapiissuseqarluni, suleqatinilu qinngasaalaassallugit nuannarisarlugu. Ikiuersuttuaannarpoq ilinniartiterusuttuaannarlunilu, napparsimavinngikkaangami suliuaannarpoq naatsorsuutigineqarsinnaajuaannarluni.

Atugarissaarnermut immikkoortortaqarfimmi Maniitsoq, Mette Heilmann:
Ullut tamaasa qiimmisaartoq, sulinermini uummaarissoq suleqatiminullu nuannersunik oqaaseqartuartoq. Ataqatigiissitsilluarsinnaasoq neriulluaateqartarluni. Suleqateqarluarsinnaasoq suleqatiminillu ikiuiuartoq, ulapaarfiugaluarpalluunniit piffissaq eqqorlugu suliartortuaannartoq.


Pisortaqatigiit Ukioq manna suleqatillatsialammik toqqaanissaminnut toqqammavissanik sisamanik aallaaveqarput, tassaallutik:

* Suliffimmi pitsaasumik atugassaqartitsineq
* Ataqatigiissitsisinnaassuseq
* Ikiuisinnaassuseq kajumissaarisinnaassuserlu
* Aalajaatsumik suleqataassusilik