Puigunngisaannarpara 2005-imi Siumup Sisimiuni ataatsimeersuarnerani Hans Enoksenimik siullerpaamik naapitsinera. Taamanikkut Hans Enokseni Naalakkersuisuni Siulittaasunngoreersimavoq, akulikitsumillu Sermitsiami annertuumik isornartorsiorneqartarluni. Taamanikkut Siumup ataatsimeersuarnerani tusarnaariarlunga isersimasunga Hansip ornillunga assammillunga qutsavigaanga, Hansimik ”serniginnillunga” Sermitsiami allaaserisaqarsimanera pillugu. Naalakkersuisut Siulittaasuanit taamanikkut inuttut ilisarisimanngisannit assamminneqarlunga qutsavigineqarnera angisuutut nuannersutullu misigivara. Sunaaffami kingusinnerusukkut Inatsisartuni, kommunalbsetyrelsemilu suleqatigilertussaallugu.
Hansi siullermik suleqatigilerpara 2009-imiit 2013-imut Inatsisartuni ilaasortaanerma nalaani, kingusinnerusukkullu kommunalbestyelsemi 2021-imiit-2025-imut. Ukiullu taakkua ingerlanerani politikkimi pisut, inuttullu ikinngutigiinneq pillugu oqarasuaatikkut arlaleriarluta nuannersumik oqaloqatigiittarsimavugut.
Tamanit naluneqanngitsutut Hansip politikkimi pingaartitami ilungersuutiginissaanut uteriitsuuvoq, anguniakkamilu ilungersuutiginerinut nipituuliornissaminut tunuarsimaartuunani. Hansillu ilisarnaataasa pingaarnerit ilagivaat inuppalaartuunini qanilaartuuninilu aammalu illarnissaminik nuannarisaqartuunera. Tamannalu pissutigalugu Inatsisartuni ilaasortaaqatiginerani malugisarpara Hansi sinerissamiit inuppassuarnik ullut tamaasa oqarasuaatikkut attavigineqartuartartoq.
Hansip politikkikkut qaffakkiartorsimanera eqqarsaatigalugu, tassa nunaqarfinni aqutsisuniit, Naalakkersuisuni Siulittaasutut kingusinnerusukkullu Inatsisartuni Siulittaasutut angusaqarsimanermigut, isumaqarpunga kalaaleqatiminut imminut tatiginissamik, sapiissuseqarnissamullu annertuumik maligassiuisimanini takutissimagaa. Minnerunngitsumik ukiuni 30-ini ataannartumik toqussi tikilluguIlugu Inatisartuni ilaasortaasimanera isumaqarpunga angusaq ajasoornarlunilu imaannaanngitsuusoq.
Hansip ilisarnaataasa ilagivaat peqqissaartunini torersuunissamillu pingaartitsuunini. Tamanna Itillimut tikilluni takuneqarsinnaavoq Itillip qanoq eqqiluitsigalunilu torertiginera.
Ukiuni kingullerni Hansip inuttut aqqusaakkani alianartut, peqqiilliulerninilu assut sanngiillissutigigai malunnarpoq. Hansillu nunarsuarmi maani inuunermi sivisugunnaarnera nalusimagunannginnamiuk aasap ingerlanerani sianerfigaavanga ukiuni taakkunani suleqatigalugulu oqaloqatigisarsimagakku qutsavigalunga.
Hansi, qujanaq ukiorpassuarni inuiaqatigiinnut qasusuillutit sullisseqataasimanerit pillugu. Tamannalu pissutigalugu nunatta oqaluttuarisaaneranut pingaarutilimmik ilaavutit, tamannalu qaqugorsuarmut eqqaamaneqaatigissavat.
Qujavungalu nuannersumik illaqatigiittarsimanitsinnut.
Eqqaaneqarnerit ataqqinartuuli.
Malik Berthelsen, borgmesteri
