Imminut toqunnissamik piareersaateqartoq Tik Tokimut ikkussivoq, kingornalu imminut toqulluni. Tamannalu tupinnanngitsunik inuppassuarnut aalassatitsivoq. Meeqqallu arlallit Tik Tokimik atuisuummata, TikTokip qanoq atornissaanik qanorlu atunnginnissaanik angajoqqaat meeqqaminnik oqaloqatiginninnissaat Qeqqata Kommuniata kaammattuutigaa.
TikTok sunaana?
TikTokimi filmiliaaqqanik nammineq isumassarsiorluni nutaaliaasunik naatsunik sanasoqarsinnaavoq, tassani nipilersuut atorlugu ussersorluni qitilluniluunniit imminut filmiliorsinnaalluni. Filmiliaaqqap sivisussusaa nalinginnaasunik minutsit pingasuniit 15-inut takitigisarpoq. Filmiliaaqqat nuannarinnittuniit malinnaasuniillu oqaaseqarfigineqarsinnaapput like-rneqarsinnaallutillu.TikTokimik atuisuuniaraanni 13-inik ukioqalereersimanissaq piumasaqaataavoq, taamaakkaluartorlu suli 13-liineqanngitsut angajoqqaaminniit akuerineqarlutik atuisuupput.
Qeqqata Kommuniata siunnersuutaa
TikTok nunatsinni meeqqat 13-liineqanngitsunit 13-leereersimasuniillu nuannarineqarluarpoq. Atuisullu nunarsuaq tamakkerlugu amerlapput, tassami atuisut 800 millionit missaaniittut nittartakkami nutaarsiassaqartitsiviit arlallit allaaseraat, nuannarineqaleraluttuinnarmallu atuisut suli amerliartorlutik, allaat inersimasut TikTokimik atuisuullutik. Angajoqqaanullu atuisuutilinnut uku siunnersuutigerusuppagut.
1. Malittarisassat
TikTok atuisunut assigiinngitsorpassuarnik malittarisassaqarpoq, assersuutigalugu ilaatigut inunnik qinngasaarinermut nakkarsaanermullu atoqqusaanngilaq, aamma inunnik naalliutsitsinermut tunngasunik filmiliaaqqanik ikkussusisoqaqqusaanngilaq. Imminut toqunnissamut tunngasunik aamma siammarterineq inerteqqutaasoq malittarisassanik allaqqavoq. TikTokimik atuineq nuannersuussasoq siunertarineqarpoq. Qitornat oqaloqatigiuk arlaannik nuanniilliuuteqaruni nanertuuteqaruniluunniit TikTokkikkut saqqummiunnagu inersimasumut saaffiginnissasoq, taamaaliornikkut ikiorneqarnissaq qulakkeerluarneqarsinnaammat. Qitornat aamma malittarisassat pillugit oqaloqatigilluaruk, paasitillugulu TikTokimi eqqunngitsunik, nuanniitsunik pissusissamisuunngitsunillu naammattuuiguni piaartumik inersimasunut oqartassasoq.
Malittarisassat uani atuarneqarsinnaapput: https://www.tiktok.com/community-guidelines?lang=en
2. Kikkut tamarmik takusinnaassavaat imaluunniit naamik?
TikTokimi atisuugaanni nammineq aalajangerneqarsinnaavoq filmiliaaqqat nammineq ikkussat nunarsuaq tamakkerlugu takuneqarsinnaassanersut imaluunniit nalunngisat kisimik takusinnaassaneraat. Qitornat isumaqatigiissuteqarfigiuk filmiliaaqqat ikkussani kikkunnit takuneqarsinnaassanersut. Nalunngisat kisimi filmiliaaqqat takusinnaagaat aaqqissinnaavarsi.
3. Qinngasaarneqalersinnaaneq
Filmiliaaqqat inunnit isummerfigineqarlutik allaffigineqarsinnaapput, aamma siammarterneqarsinnaapput. Naak TikTokip qinngasaarisanerit akiorniarlugit iliuuseqartaraluartoq inuit ilaat qinngasaarillutik nakkarsaallutik illaruaatiginnillutillu allassinnaapput. Qitornat ilitsersuutiguk qinngasaarinernik naammattuuigaangami inersimasunut oqartaqqullugu, qanorlu qinngasaarinerit eqqunngitsumillu pissusilersornerit TikTokikkut unnerluutigineqarsinnaanersut.
4. TikTok peerneqarsinnaanngilaq
TikTokimi atuisunngorsimagaanni peerneqarsinnaanngilaq. Meeqqat paasitiguk TikTokimi filmiliaaqqat ikkussat ilaatigut internetsimiit peerneqarsinnaajunnaarsinnaammata, allaninngaanniit mobilimut qarasaasiamulluunniit toqqorneqarsinnaasarmata. Taamaattumik sissuigassaavoq TikTokimut suut ikkunnerlugit. Eqqumaffigisiulli TikTokkip malittarisassai unioqqutinneqarnerani filmiliaaqqat TikTokip kisimi peersinnaammagit.
Oqaloqatissaaleqivit?:
Meeqqat inuusuttut, inersimasut utoqqaallu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaammassuk, aamma kinaassutsimik isertuussilluni saaffiginnittoqarsinnaavoq. Ajornartorsiutit suugaluarunilluunniit annikikkaluarunik annertuppataluunniit siunnersuisartut ikiuinissaminnut piareersimapput. Imminut toqunnissamik eqqarsaateqaruit aamma Tusaanngamut sianersinnaavutit allallutillu.
Oqarasuaat: 80 11 80
SMS: 1899
Tusaannga ullut tamaasa nal. 16:00-imiit 22:00 tungaanut ammasarpoq.
Meeqqat aamma tassunga attaveqarsinnaapput.