Kalaallit Nunaanni nunat eqqissisimatitat aappaat
Bormesterit marluusut Ane Hansen aamma Malik Bertelsen oqaluttuarput, nunamik eqqissisimatitamik isumaq qulakkeerniarneqartoq, pinngortitamut tunngassuteqartut pingaartitat siunissami allanngortinnginneqarnissaat aammalu immikkoortumi pinngortitamut pissutsinik nalissaqanngitsunik sumiiffimmi najugallit takornarissallu takusaqarsinnaanissaat.
WILD Nature Foundationimi pinngortitamik assiliisartut aappariit Uri aamma Helle Løvevild Golmann nunarsuarmi tamarmi nunani eqqissisimatitani amerlasuuni assiliisarput, tassunga ilanngullugu Kalaallit Nunaanni Tunup Avannaarsuani nunarsuarmi nunani eqqissimatitani annerpaajusumi assiliineq.
Uri aamma Helle Løvevild Golman tupigusuutigivaat, Kalaallit Nunaa nunatarujussuaqarluni pinngortitamik kusanarluinnartumik uumasunillu nalissaqanngitsunik peqarluni ataasiinnarmik nunamik eqqissisimatitaqarmat. Aamma nuna eqqissimatitaasoq nunap inuttaanut takornarissanullu tikikkuminaatsuusoq. Nunat amerlasuut arlalinnik nunanik eqqissisimatitaqartarput aammalu uumasunut, innuttaasunut takornarissanullu nuannaarutaasumik nunanik eqqissimatitanik nutaanik pilersitsisoqarnissaa ingerlaavartumik sulissutigisarlugu. Taamatut iliornissaq Kalaallit Nunaannut tulluarpoq, WILD Nature Foundationimut siulersuisuni siulittaasoq Uri Løvevild Golman oqarpoq.
Masarloqarfeqareerpoq
Suleqatigiit pingasuusut Eqalummiut Nunaat aamma Nassuttuup Nunaani masarloqarfik pioreersoq Kalaallit Nunaanni nunatut eqqissisimatitatut tullinnguussinnaanersoq siulliullugu misissorniarpaat.
Masarloqarfik nunat tamaalaat 1971-imi isumaqatigiissutiginikuuvaat, masarloqarfimmik taassumalu timmiaanik illersuisuusoq. Naalagaaffeqatigiit 1977-imi isumaqatigissummut ilanngupput, aammalu Kalaallit Nunaanni immikkoortut aqqanillit Masarloqarfinngortinneqarnissaat pillugu 1987-imi Namminersornerullutik Oqartussat qinnuteqaateqarput. Ukioq ataaseq qaanngiutsoq akuersissutigineqarput.
Kommune Qeqertalimmi sisamanik Masarloqarfeqartoq, taamaalilluni Kalaallit Nunaanni amerlanerpaanik Masarloqarfiusoq, Borgmester Ane Hansen oqaluttuarpoq. Kalaallit Nunaanni Masarloqarfiit annersaat 5.795 km2-mik angissuseqartoq nuna eqqissisimatitaanngortinneqassappat, Ane Hansenip neriuutigivaa, Kommune Qeqertalik inissisimasunut pinngortitanik pingaarutitalinnut timmissanullu nunarsuarmioqatigiit isiginiarnerulissasut. Nunat eqqissisimatitat immikkuullarissuusut tamatta nalunngilarput, ikitsuinnaallu masarloqarfinnut isumaqatigiissummut ilisimasaqarlutik, taamaattumillu nunat amerlasuut masarloqarfiit nunallu eqqissisimatitat ataatsimoortilernikuuvaat Ane Hansen oqarpoq.
Tuttut aamma UNESCO nunarsuarmi kingornussassaqarfik
Nuna eqqissisimatitaalersussaagunartoq masarloqarfimmik imaqaannarani aamma timmiaqarpoq tupinnaannartunik. Nunaminertaq aamma Kalaallit Nunaanni tuttoqarfiit annersaannut angerlarsimaffiuvoq kiisalu nunami annerpaamik pingaarnerpaamillu tuttunik piaqqiorfiulluni.
Borgmester Malik Berthelsen oqaluttuarpoq, nuna eqqissisimatitaalerumaartussaq ilaatigut Qeqqata Kommuniani UNESCO-mik nunarsuarmioqatigiit kingornussassaqarfiannik Aasivissuit-Nipisat imminnut ataqatigiikkumaartut, taakkununnga ilanngullugu Aasivissuarni tuttunut aasaanerani piniartarfittut pingaarnersaarlunilu Kalaallit Nunaanni ilisimaneqarnerpaajusoq. Tuttut ukiuni tusindtilikkaani Sermersuarmut qanittumi pinngortitamik silamillu pitsaasumik iluaquteqarnikuupput. Kingullertigut aamma umimmaat pineqarput.
Qeqqata Kommunianut pingaaruteqarpoq, nunami eqqissisimatitaalerumaartussami tuttunik umimmannillu pitsaasunik peqqissunillu paarinniinnarnissarput. Piniarnermut ileqqutut kulturimut taamaallunilu UNESCO nunataanik aallaaviusoq, Malik Berthelsenip paasissutissiissutigivaa.
Illuatungeriit pingasut isumaqatigiipput, nunaminertami nungusaataanngitsumik piniarneq ileqquusoq ingerlaannassasoq, ilutigitillugu pinngortitamik ingerlatitseqqiissut / suliffiit nutaat pilersinneqassasut.
Suleriaqqinnissaq
Innuttaasunik ataatsimiititsinerni pilersaarutit saqqummiunnissai borgmesteriusut marluk qilanaarivaat aammalu innuttaasunit, piniartunit nunamullu eqqissisimatitassamut isummamut ilisimatusartunit pissarsiaqarnissartik qilanaarutigalugu. Periarfissat misissorneqarnissaanut WILD Nature Foundation suleqatiginissaanut aallaqqaammut Kommune Qeqertalimmit Qeqqata Kommunianiillu kommunalbestyrelsit marluusut akuersaarnikuupput.
Ileqqutoqqamik piniarnermi kulturip pinngortitamullu takornariaqarnerup nukittorsarnissaanut suleqatigiinnissamik aallartitsinissamut borgmester Ane Hansen aamma borgmester Malik Berthelsen qilanaarput. Innuttaasuni pilersaarutinut tapersersuisoqarpat, 2021-imi Ukiaanerani ataatsimiinnermi nunamik eqqissisimatitamik pilersitsisoqarnissaanut Naalakkersuisut Inatsisartullu akuersissutigissagaat neriutaavoq, Ane Hansen aamma Malik Berthelsen naggasiipput.
Paasissutissat amerlanerit:
Kommune Qeqertalimmi borgmesteri Ane Hansen: oqarasuaat (+299) 587661
Qeqqata Kommuniani borgmesteri Malik Berthelsen: oqarasuaat (+299) 525500
WILD Nature Foundations Pisortat Irene Greve: oqarasuaat (+45) 40107242
