Inuussutissarsiuteqaruit – soorlu neriniartarfimmik – tamanullu atugassanik aningaasanik akiliilluni pinnguaataateqaruit, pinnguaatit ataasiakkaarlugit akitsuutaat akilissavatit. Tassaavorlu akiliilluni pinnguaatinut akitsuut.
Akitsuut taanna taaneqartarpoq toqqaannanngitsumik akileraarut Nunattalu Karsianut akilerneqartarluni. Qaammatit pingasukkaarlugit aningaasanik ikisilluni pinnguaatinut akiligassanik nassiussisoqartarpoq.
Aningaasanik ikisilluni pinnguaatit marluinngorlugit immikkoortitaapput:
• Aningaasanik eqquiffiusinnaasut
• Aningaasanik eqquiffiusinnaanngitsut
Aningaasanik ikisilluni pinnguaatit qanoq ittut ikkussimaneritit qanorlu amerlatigisut pigineritit apeqqutaallutik, akitsuut annertussusilerneqartarpoq.
Aammattaaq aningaasanik ikisilluni pinnguaatit eqquiffiusinnaasuni qanoq amerlatigisunik atuiffiusimaneri nalunaarsortarneri immikkut malittarisassaqarput.
Pinnguaatit aningaasanik eqquiffiunngitsut
Akitsuummik akiliinissannut pinnguaatinik qanoq amerlatigisunik pigisaqarnerit apeqqutaavoq:
• Pinnguaatip siulliup ukiumut akitsuutigaa 16.000 kr.
• Pinnguaatip aappaannut ukiumut akitsuutigaa 17.500 kr.
• Pinnguaatinut sinneruttunut pingasuniit qummut, ukiumut akitsuutigaa 19.000 kr.
Pinnguaatinut aningaasanik eqquiffiusartunut akigitinneqartut
Akitsuummik akiliinissannut pinnguaatinik qanoq amerlatigisunik pigisaqarnerit apeqqutaavoq:
• Pinnguaammut siullermut ukiumut akitsuutaavoq 64.000 kr.
• Pinnguaatit aappaannut ukiumut akitsuutaavoq 70.000 kr.
• Pinnguaatit pingajuanniit amerliartorneri ilutigalugit ukiumut akitsuutaavoq 76.000 kr.
Akiliilluni pinnguaatinik aningaasanik eqquiffiusinnaasunik inuussutissarsiortutut pigisaqaruit, ullut tamaasa Akileraartarnermut Aqutsisoqarfiup immersugassiaanik aningaasanoorutit immikkuutitaarlugit qanoq amerlatigisunik aningaasanik atuiffiusimaneri nalunaarsortassavatit. Immersugassat taakku qaammatit pingasukkaarlugit naanerini nassiunneqartassapput, taamaattorli kingusinnerpaamik 31. Januar,30. April,31 juli aamma 31. oktober. Nassiussinerpit kinguninngua akiliilluni pinnguaatinut akitsuummik akiligassinneqartassaatit.
Qaammatit pingasukkaarlugit aningaasanik ikisilluni pinnguaatinut akiligassanik Akileraartarnermut Aqutsisoqarfimmit nassiussisoqartarpoq.
Aningaasanik eqquiffiunngitsunut aamma eqquiffiusunut akiligassap tiguneranit qaammatip tulliuttup ulluisa qulingat nallertinnagu akitsuut akilerneqartassaaq. Akilersimanngikkukku immikkut akiliisinneqassaatit, akiligassiissutigineqassaarlu pinnguaammut ataatsimut 400 kr.
Assersuutigalugu juni-p qaammataani pinnguaatinut akitsuutip akilernissaa kingusinnerpaamik 10. juli akilereersimassavat.
Akitsuut allakkerisarfikkoorlugu, aningaaserivikkoorlugu toqqaannartumilluunniit Akileraartarnermut Aqutsisoqarfimmut akilerneqarsinnaavoq. Akileraartarnermut Aqutsisoqarfimmi aningaasanik akiliisoqarsinnaanngilaq, taamaallaat korti atorneqartarpoq.