Politikkit

Suleqatigiit pingaartippaat meeqqerivinniit utoqqarnut sullissineq pitsaasoq, inuiaqatigiit peqqissut imminnullu napatittut, aningaasarsiornikkut inuussutissarsiornikkullu siuariartorneq

Suleqatigiit qulequttat tulliuttut pingaartillugit qinigaaffimmi assigiinngitsunik anguniagaqarput:

• Inuiaqatigiit atuarfiillu ingerlalluarnissaannut meeqqeriviit pinngitsoorneqarsinnaanatillu pingaarutilimmik aalajangiisooqataapput.
• Meeqqat atuarfii meeqqat siunissaannut imminullu napatinnissaannut atorfiillu ilinniarsimasunik pisariaqartitsiviusut nammineq nunatta inuinit inuttaqalernissaannut pingaarutilerujussuarmik inissisimapput.
• Meeqqat amerlanerpaat angerlarsimaffimmi toqqissillutik angerlarsimasalernissaat anguneqassappat angajoqqaat siunnersorneqarnissaminnik pisariaqartitsisut immikkut annertusisamik sammineqartariaqarput.
• Timersorneq kulturilu tassaapput inuiaqatigiinnik tamanik annertunerpaamik ataatsimoortitsisut aammalu aanngajaarniutinik atuilinnginnissamut pinaveersaartitsisutit annerpaat. Taamaattumik timersornerup kulturilerinerullu suli annertuumik tapersersorneqarnissaat isumaqatigiissutigivarput.
• Aalisarneq piniarnerlu tassaapput aningaasarsiornitsinni imminullu pilersornermi pingaaruteqarnerpaat.
• Suliffeqarfiit namminersortut ingerlalluartut tassaapput innuttaasut atugarissaarnissaannut kommunillu ineriartornissaanut pingaarutilimmik aningaasalersueqataasut.
• Innuttaasut sullinneqarneranni kommunimi sulisut pinngitsoorneqarsinnaanngillat. Taamaattumik sulisunut atugassarititaasut pitsaasuunissaat aammalu sullissinerup pitsaasuunissaa qulakkeerniarlugu sulisut ineriartoqqinnissaminnut periarfissaqartuaannarnissaat pingaaruteqarpoq.

Suleqatigiinnissamik isumaqatigiissut tamakkiisumik atuaruk

Qeqqata Kommuniani innarluutilinnut politikkimi pingaarnertut sammineqarput: Tikikkuminassuseq, Paasissutissiineq, Ilinniarneq aamma Suliffeqarneq, Inuuneq pitsaasorlu.
Ilaatigut imaappoq, inuiaqatigiinni pisunut peqataanissaminut allatuulli pisinnaatitaaffeqarlutik innarluutillit innuttaaqataasutut naleqqatitut isigineqassasut.

Innarluutilinnut politikki tamakkiisumik atuaruk

Qeqqata Kommuniata meeqqanut isiginneriaasia aallaaveqarpoq, meeqqat inuusuttullu inuit inuunerat peqqilluni ajunngitsumillu inersimatutut inuulernissamut tunngaviunerat.

Meeqqap peqqinnartumik ineriartorfiusumillu meeraanissamut inuusuttuunissamullu qulakkeerunnissaa meeqqanut inuusuttunullu politikkip sunneeqataaffigissavaa, tamatumani ilikkagaqarnissamik, sunngiffimmi sammisassanik kultureqarnikkullu neqeroorutit pingaarnertut aallaaviussallutik. 

Meeqqanut inuusuttunullu politikki tamakkiisumik atuaruk

Sulisoqarnermi politikki Qeqqata Kommuniani anguniakkanik ataqqinnittuuvoq, sulisunillu ataasiakkaanik innarliinaveersaartuulluni. Sulisut kommunimi nukiupput pingaaruteqarnerpaat, taamaattumillu sulisoqarnermi politikkikkut kommuni Kalaallit Nunaanni siuttut ilaattut inissisimassalluni.

Sulisoqarnermi politikki tamakkiisumik atuaruk

Sillimmasiinermi tunngasutigut politikki immikkoortunut tamanut sulisunullu tamanut atuuppoq. Kommunip immkkoortortaani suliffeqarfiinilu tamani aamma suliffeqarfinni imminut ingerlattuni ingerlatsimi isumaqatigiissuteqarfiusuni, ataatsimut maleruaqqusaqarluni sillimmasiinermut tunngasunik suliaqartarnissaq sillimmasiinermi tunngasutigut politikkeqarnissami siunertaavoq. 

Sillimmasiisarnermut politikki tamakkiisumik atuaruk

Oqaatsinut politikki tassaavoq inuiaqatigiinni oqaatsitigut pissutsinik siunertaqartumik aqutsineq. Kalaallit oqaasii tassaapput Kalaallit Nunaanni pisortatigoortumik oqaasiusut pisortatigullu ingerlatsinermi atugaasut im.§3. Kommunip iluani oqaatsitigut pissutsinik aqutsineq Qeqqata Kommuniani oqaatsinut politikkimik maleruagassiornikkut malittarisassiornikkullu maana ivertinneqarpoq.

Oqaatsinut politikki tamakkiisumik atuaruk 

Peqqinnerulersitsinissaq pinaveersaartitsinissarlu, Qeqqata Kommuniani inuiaqatigiit ingerlalluarnissaanni tunngavissatut isigaagut. Innuttaasutta atugarissaarlutik, peqqinnartumillu inuuneqarnissaat kissaatigaarput, taamaattumillu kommunimi illoqarfinni nunaqarfinnilu tamani peqqinnarnerusumik inuuneqalernissamut siuarsaaqataasussamik, peqqinnissaq pinaveersaartitsinissarlu pillugit politikkiliorluta.

Peqqinnissaq pinaveersaartitsinissarlu pillugit politikki

Pinaveersaartitsinissamut periusissiap siunertaraa angerlarsimaffiup avataanut inissiinissap pinaveersaartinneqarnissaanut kommuni qanoq ilaqutariinnut ataasiakkaanut ilaqutariinnulluunniit tamarmiusunut ikiorsiinissamut tapersersuinissamullu aallartitsinissaa erseqqissassallugu. 

Meeqqanik inuusuttunillu inissiisarnerup pinaveersaartinneqarnissaannut, inissisimasullu angerlartinnissaanut periusissiaq atuaruk

Innimiilliornermut politikki suliarineqarpoq pinaveersaartitsinernik malittarisassaqarnissaq siunertaralugu, suliffimmi kinguaassiutitigut innimiilliornernut nikanarsaasumillu pissusilersuuteqarnermut pinaveersaartitsiniarluni. Qeqqata Kommunia suliffeqarfiusoq kikkut tamarmik toqqissisimallutik nuannaarlutillu suliffigisinnaasaat, kikkullu tamarmik suliffiup avatangiisaanik peqqinnartumik kultureqarnissamik tapersersuisuussasut kissaatigaarput.

Innimiilliornermut politikki atuaruk