Inatsisartunut qinerseqataasinnaassagaanni qinersisussat allassimaffianni ilanngunneqarsimasariaqarpoq. Qinersisussat allassimaffianni ilanngunneqarnissamut piumasaqaataapput:
a) qallunaatut innuttaassuseqarneq,
b) kingusinnerpaamik ulloq qinersivimmi 18-inik ukioqalersimanissaq,
c) ulloq qinersivimmi aalajangersimasumik Kalaallit Nunaanni najugaqarsimanissaq, aamma ulloq qinersivissaq sioqqullugu sivikinnerpaamik qaammatini arfinilinni aalajangersimasumik Kalaallit Nunaanni najugaqarsimanissaq, aamma
d) nammineersinnaajunnaarsitaasimannginnissaq.
Taamaattoq immikkut piumasaqartoqarneratigut qinersinermut siulersuisut inuit ilaat qinersisussat allassimaffiannut ilanngutititsisinnaapput. Tamatumani pineqarput inuit aalajangersimasumik najugaqarnissamik c)-mi piumasaqaammik eqquutsitsisimanngitsut qinersisussat, tak. § 22. Matumani pineqarput inuit, taakkulu inooqatitut aapparisaat piumasaqaatinik siuliini taaneqartunik eqquutsitsisimappata, pigallartumik Kalaallit Nunaata avataani najugaqartut a)-d):
1. Inuit ilinniagaqarlutik Kalaallit Nunaata avataaniittut
2. Inuit peqqinnissamut tunngasunik pissuteqarlutik Kalaallit Nunaata avataaniittut
3. Inuit Kalaallit Nunaanni qinigaallutik folketingimi ilaasortatut suliaqarnerminnut atatillugu Danmarkimiittut
4. Inuit Namminersorlutik Oqartussanut sinniisuullutik Kalaallit Nunaata avataaniittut
5. Inuit Kalaallit Nunaata avataaniittut aammalu Kalaallit Nunaannut attuumassuteqarnikkut 1)-4)-mi taaneqartunut sanilliunneqarsinnaalluinnartut.
Taamaattoq inuit inooqatitullu aapparisat taaneqartut qinersisussat allassimaffianni aatsaat ilanngunneqarsinnaapput nuunnginnerminni sivikinnerpaamik katillugit ukiuni marlunni Kalaallit Nunaanni inuit aqqisa nalunaarsorsimaffiini allassimasimagunik. Katissimanatik inooqatigiittut aappariillutik inooqatigiittunut sanilliunneqassapput aallannginnerminni aappariinnermut assingusumik inooqatigiilersimagunik.
Erseqqissaatigineqassaaq qinersisartut utaqqiisaasumik Kalaallit Nunaata avataaniittut,
Qinersisussat allassimaffii
Qinersinissaq nalunaarutigineqarpat qinersisussat allassimaffiat qinersinermik siulersuisut suliarissavaat. Qinersisussat allassimaffii innuttaasunik, qinersinermi qinersisinnaatitaasut atiinik tamanik imaqarput.
Kinaluunniit qinersisinnaatitaanngilaq qinersisussat allassimaffianni ilanngunneqarsimanngikkuni, t.i. kommunimi pineqartumi qinersisartut eqquutsissimassavaat piumasaqaatit makku:
1. ulloq qinersivissaq kingusinnerpaamik sapaatit akunneri arfinilinnik sioqqullugu kommunimut nuussimanissaq kingusinnerpaamillu ullormi tassani nuunnermik kommunip inuit aqqinik nalunaarsuiffianut nalunaarsimanissaq,
2. ulloq qinersivissaq kingusinnerpaamik sapaatit akunneri arfinilinnik sioqqullugu kommunip iluani nuussimasut kingusinnerpaamillu ullormi tassani nuunnermik kommunimi inuit aqqisa nalunaarsorsimaffiannut nalunaarsimasut najugarilikkaminni nutaami allassimallutik qinersisussat allassimaffianni ilanngunneqassapput,
3. ulloq qinersivissaq kingusinnerpaamik sapaatit akunnerisa arfinillit iluanni kommunimut allamut imaluunniit kommunip iluani nuussimasut imaluunniit ullormit tassannga kingusinnerusumik nuunnerminnik nalunaaruteqarsimasut najugarisimasaminni najugalittut qinersisussat allassimaffianni nalunaarsorneqarsimassapput, aamma
4. Kalaallit Nunaata avataanni najugaqarallartut § 2-milu piumasaqaatinik eqquutsitsisut ulloq qinersivissaq sapaatit akunneri pingasut sioqqullugu aalajangiifigineqarsimappata qinersisussat allassimaffimmut ilanngunneqassapput.
Qinersisussat allassimaffiisa saqqumitinneqarneri
Qinersisussat allassimaffii kingusinnerpaamik sapaatit akunnerinik pingasunik sioqqullugu ulluinnarni marlunni kommunimi kikkunnit tamanit takuneqarsinnaasunngorlugit saqqumitinneqassapput. Tassa imaappoq, qinersisussat allassimaffii kingusinnerpaamik marlunngorneq 18. februar 2025-imi ammarneranit pingasunngorneq 19. februar 2025-imi matunissap tungaanut saqqumitinneqassapput. Qinersisussat allassimaffii kommunip iluani taasiartorfinnut ataasiakkaanut tamakkerlugit suliarineqarput tamarmik kikkunnilluunniit takuneqarsinnaasunngorlugit saqqumitinneqassapput, kommunimilu taasiartorfinni tamani sumiiffimmut qinersivissamut pineqartumut qinersisussat allassimaffiata assilinera saqqumitinneqassalluni.
Qinersisussat allassimaffiat qaqugu sumilu saqqumitinneqassanersoq qinersinermi siulersuisut aalajangissavaat.
Ullup taassuma qinersinermut inatsimmi § 26, imm. 1 malillugu qinersisussat allassimaffiisa saqqummitinneqarnissaannut qaqugukkut sumilu saqqummiunneqassasoq qinersinermi siulersuisut aalajangissavaat, killigitinneqartoq ulluinnaat marluk nallertinnagu.
Inoqarfinni kommunit aggornerisa avataanniittuni qinersisussat allassimaffiata sumiiffimmut pineqartumut atuuttup assilinera saqqumitinneqassaaq. Saqqumititsineq pissaaq piffissami qinersisussanngortitsisoqarnerata qinersinerullu ingerlanneqarnissaata akornanni.
Qinersisussat allassimaffii pillugit naammagittaalliuutit
Kinaluunniit isumaqartoq nammineq imaluunniit inuk alla pissutissaqanngitsumik allassimaffimmi ilanngunneqarsimanngitsoq imaluunniit ilanngunneqarsimasoq qinersisussat allassimaffiisa saqqumitinneqarfissaata naanerata kingorna kingusinnerpaamik ulluinnaat marluk qaangiutsinnagit pissutaasut naatsumik taallugit allakkatigut qinersinermik siulersuisunut naammagittaalliuuteqarsinnaavoq.
Qinersisussat allassimaffiini iluarsiinerit
Qinersisussat allassimaffii pillugit naammagittaalliuutit sapinngisamik piaarnerpaamik qinersinermik siulersuisunit aalajangiiffigineqassapput. Qinersisussat allassimaffii tamatuma kingorna iluarsineqarsimasut qinersinermik siulersuisut siulittaasuannit atsiorneqassapput.
Kinaluunniit qinersisussat allassimaffiannit peerneqarsimasoq, imaluunniit nammineq inuulluunniit allap ilanngunneqarsimannginneranik naammagittaalliuutini pillugu isumaqatigineqanngitsoq, qinersinermut siulersuisunit allakkatigut nalunaarfigineqassaaq.
Inuup qinersisinnaatitaannginnerminik naammagittaalliuuteqartup qinersisussat allassimaffiata iluarsineqarnerata kingorna ullut marluk qaangiutsinnagit Qinersinermut Ataatsimiititaliamut inaarutaasumik aalajangiisussamut apeqqut allakkatigut saqqummiussinnaavaa. Qinersinermut Ataatsimiititaliap naammagittaalliortoq qinersinermillu siulersuisut attuumassuteqartut aalajangiinerminik nalunaarfigissavai, tamatumalu kingorna qinersisussat allassimaffianni iluarsisassat qinersinermik siulersuisunit iluarsineqassapput.
Tamatuma saniatigut qinersisussat allassimaffiat qinersinermik siulersuisunit iluarsineqareeruni allanngortinneqarsinnaanngilaq.
Inuk qinersisussat allassimaffianni ilanngunneqarsimanngitsoq naammagittaalliuuteqarnissamullu piffissarititaasup naannginnerani nammineerluni allaluunniit aqqutigalugu qinersinermik siulersuisunut naammagittaalliuuteqarsimanngitsoq qinersisussat allassimaffianni ilanngunneqarsimannginneq pillugu apeqqummik kingusinnerusukkut qinersinermik siulersuisunut imaluunniit Qinersinermut Ataatsimiititaliamut saqqummiussisinnaanngilaq.
Inatsisartunut qinigaasinnaatitaassagaanni taassumunnga qinersisinnaatitaanermut piumasaqaatit eqquutsinneqarsimassapput. Kiisalu pineqartoq inaarutaasumik eqqartuussinikkut akiliisitsissutissamilluunniit akuersinikkut pinerluttulerinermi inatsisit tunngavigalugit pineqaatissinneqarsimassanngilaq nalinginnaasumik isigineqarnermi inatsisartunut ilaasortaanissamut naleqqukkunnaarsitsisumik.
Taamaattoq qinigassanngortittoq qinersinissamut qinigassanngortinnissaminut mattunneqareersinnaanngilaq pineqartup pinerluttulerinermi inatsisit tunngavigalugit pineqaatissinneqarsimanera innersuutigalugu, tassami Inatsisartut kisimik aalajangertussaammassuk qinigassanngortitaq qinigaasimasoq Inatsisartunut ilaasortaanissamut naleqqukkunnaarsimanersoq.
Qinigassanngortissinnaatitaasut
Inatsisartunut qinersinermi qinigassanngortissinnaatitaapput partiit kingullermik inatsisartunut qinersineqarmat inatsisartunut ilaasortaatitaqalersimasut sulilu Inatsisartuni ilaasortaatitaqartut.
Aammattaaq qinigassanngortissinnaatitaapput partiit qinersinerup ingerlanneqarnissaa kingusinnerpaamik sapaatit akunnerinik tallimanik sioqqullugu Qinersinermut Ataatsimiititaliamut nalunaarutigineqarsimasut. Qinersinermut Ataatsimiititaliap partiimik akuersissutiginninnera atuuttassaaq inatsisartunut qinersereernerup tungaanut, taamaattoq sivikinnerpaamik ukiumi ataatsimi. Partiip qinigassanngortissinnaaneranut piumasaqaataavoq qinersisartut ima amerlatigisut, kingusinnerpaami inatsisartunut qinersinermi taasinerit atorsinnaatitaasut minnerpaamik 1/31-iinut naapertuuttut, partii nalunaarutigisimappassuk. Taamaattumik inatsisartunut qinersinermi matumani partiimik nalunaarutiginnittut 942-nik amerlassuseqassapput.
Qinigassanngortitat sassarsinnaapput
- partiip qinigassanngortissinnaatitaasup qinigassanngortitaatut
- kisimiillutik qinigassanngortittutut
- kattusseqatigiinni kisimiillutik qinigassanngortittutut
Qinigassanngortitanik nalunaaruteqarneq
Partiit qinigassanngortitaannut nalunaarsuiffissatut allaffissiat
Partii sinnerlugu qinigassanngortitanik nalunaaruteqarneq pissaaq Qinersinermut Ataatsimiititaliap partiit qinigassanngortitaannut nalunaarsuiffissatut allaffissiaatigut .
Nalunaarutit kommunimi qinersinermi siulersuisunut (sumiiffimmi taaguinermi siulersuisumuunngitsoq) kingusinnerpaamik qinersineq sioqqullugu sapaatit akunneri pingasut sioqqullugu nal. 12:00, tassa kingusinnerpaamik marlunngorneq 18. februar 2025 nal. 12:00 tunniunneqarsimassapput. Qinigassanngortitanut nalunaarsuiffiit qarasaasiakkut suliarineqassapput emailikkullu qinersinermi siulersuisunut nassiunneqarlutik.
Qinigassanngortitaq partiimut ataasiinnarmut qinigassanngortitaasinnaavoq qinigassanngortitarlu partiimit qinigassanngortitaajutigaluni kisimiilluni qinigassanngortissinnaanngilaq.
Qinigassanngortitat inatsisartunut qinerneqartussat amerlanerpaamik marloriaataat partiip ataatsip sassartissinnaavai. Imaappoq partiip ataatsip taamaallaat 62-inik qinigassanngortitsisinnaammat.
Partiip qinigassanngortitanut nalunaarutaa partiimi oqartussaasunit, partiip malittarisassai malillugit inatsisartunut qinersinermut qinigassanngortitatut sassartitanik akuersissutiginnittussaatitaanit atsiorneqarsimassaaq. Partiip qinigassanngortitatut sassartitaanik akuersissutiginninneq pisinnaavoq partiip qinigassanngortitanut nalunaarutaata nuutinnerata qulaani taaneqartutut atsiorneqarsimasup Qinersinermut Ataatsimiititaliamut nassiunneqarneratigut.
Partiit qinigassanngortitaannut nalunaarsuiffissatut allaffissiat uani nassaarisinnaavatit
Kisimiillutik qinigassanngortittut
Qinigassanngortittunik partiit avataatigut sassartunik nalunaarutiginninneq pissaaq Qinersinermut Ataatsimiititaliap qinigassanngortittut pillugit allaffissiaasigut,
Qinigassanngortittunik nalunaarutiginninneq kommunimi qinersinermi siulersuisunut tunniunneqareersimassallutik qinersinissaq kingusinnerpaamik sapaatit akunnerinik pingasunik sioqqullugu nal. 12:00. Nalunaarutit qinersinermi siulersuisunut (sumiiffimmi taaguinermi siulersuisumuunngitsoq) kingusinnerpaamik qinersineq sioqqullugu sapaatit akunneri pingasut sioqqullugu nal. 12:00 tunniunneqarsimassapput, tassa, kingusinnerpaamik marlunngorneq
18. februar 2025 nal. 12:00.
Partiit avataatigut sassartunik nalunaarutiginninnissamut allaffissiaq uani nassaarisinnaavat
Kattusseqatigiit
Partiit avataanni qinigassanngortittut marluk amerlanerusulluunniit kattusseqatigiinnikkut tapersersoqatigiinniarlutik isumaqatigiissinnaapput.
Qinigassanngortittut kattusseqatigiinniarunik kattusseqatigiinni qinigassanngortittut tamarmik kattusseqatigiinnertik akuersissutigalugu atsiussapput. Atsiornerit pisinnaapput qinigassanngorteqatigisat nalunaarutaasigut taakkuluunniit assilinerisigut.
Kattusseqatigiinni qinigassanngortittup ataatsip kattusseqatigisami allat tamarmik atsiorneri pissarsiarinngippagit qinigassanngortittoq kisimiilluni qinigassanngortittutut isigineqassaaq.
Qinigassanngortittoq kattusseqatigiinni ataatsimit amerlanerusuni qinigassanngorteqataasinnaanngilaq qinigassanngortittorlu partii sinnerlugu qinigassanngortittoq qinigassanngortittunik allanik kattusseqateqarsinnaanngilaq.
Qinigassanngortitsisut
Kisimiillutik qinigassanngortittut nalunaarutaat qinersisartunit ikinnerpaamik 40-nit qinigassanngortitsisutut atsiorneqarsimassaaq. Kinaluunniit qinigassanngortittumut ataatsimit amerlanerusunut qinigassanngortitsisuusinnaanngilaq, tak. § 18. Kisianni qinersisartup partiimik nalunaarutiginnittuujutigaluni kisimiilluni qinigassanngortittumut qinigassanngortitsisuunissaa akornutissaqartinneqanngilaq, taamaattoq § 12, imm. 7 malillugu qinersisartoq partiimik ataatsimit amerlanerusunik nalunaarutiginnittuusinnaanngilaq.
Atsiornerit pisinnaapput nalunaarummi namminermi imaluunniit taassuma assilinerani. Nalunaarutit imarissavaat qinigassanngortitsisut ataasiakkaat aqqi, inuuia, atorfia najugaalu.
Qinigassanngortitsisut ilaat qinigassanngortitsisut tamarmiusut sinnerlugit nalunaarut pillugu saaffiginnissutinik tigusisarnissaminut piginnaatitaassaaq.
Tamatuminnga piumasaqartoqarneratigut qinigassanngortitsisut aqqi qinersinermik siulersuisut qinersisartumut kimulluunniit nalunaarutigisinnaavaat.
Qinigassanngortitat nalunaarutigineqartut ikippallaarnerat
Qinigassanngortitanik nalunaaruteqarnissamut piffissaliussap naanerani inatsisartunut ilaasortassatut qinerneqartussaniit ikinnerusut nalunaarutigineqarsimappata Qinersinermut Ataatsimiititaliap qinersisartut kajumissaassavai piffissap erseqqinnerusumik taasap iluani qinigassanngortitanik amerlanerusunik nalunaarutiginneqqullugit.
Qinigassanngortitat akuersissutigineqarnerat
Qinigassanngortitanik nalunaaruteqarnissamut piffissaliussaq naaniariarpat marlunngorneq
18. februar 2025 nal. 12:00, kommunimi qinersinermik siulersuisut pilertornerpaamik e-mail-ikkut, imaluunniit allatut iliornikkut allakkatigut qinigassanngortitanik nalunaarutit tigusimasatik Nuummi Qinersinermut Ataatsimiititaliamut nalunaarutigissavaat. Nalunaarutip aamma imarissavai qinigassanngortitsisut akuerineqartut amerlassusii aammalu qinersinermik siulersuisut isumaat malillugu nalunaarutit inatsisini piumasaqaatinik eqquutsitsinersut. Qinigassanngortitanik nalunaarutit ilanngullugit nassiunneqassapput. Qinersinermut Ataatsimiititaliap nalunaarutit qinersinermik siulersuisuniit tigoreerunigit nalunaarutit tiguneqarsimasut atorsinnaasutut akuerineqarsinnaanersut Qinersinermut Ataatsimiititaliap inaarutaasumik aalajangiiffigissavai. Qinigassanngortitap pinerluttulerinermi inatsisit tunngavigalugit pineqaatissinneqarsimanera pissutigalugu qinigassanngortitat allattorsimaffianniit Qinersinermut Ataatsimiititaliap piiarsinnaanngilaa.
Kukkunernik iluarsiinissamut piffissaliussaq
Qinigassanngortitamik nalunaarut kukkuneqarpat Qinersinermut Ataatsimiititaliap pineqartoq kukkunerup aaqqinneqarnissaanut ullunik marlunnik piffissalissavaa.
Qinigassanngortitatut sassartitat saqqummiunneqarnerat
Qinigassanngortitatut sassartitat aqqi sapinngisamik piaarnerpaamik Qinersinermut Ataatsimiititaliamit tamanut saqqummiunneqassapput. Qinigassanngortitatut sassartitanik nalunaarutit nassiunneqassapput kommunimi qinersinermik siulersuisunut, taakkulu piaartumik taaguinermik siulersuisunut ilisimatitsissutigineqassapput.
Qinigassanngortitat aqqi allagarsiinikkut qinersinermillu siulersuisut aalajangiinerat malillugu nalunaarutigineqassapput.
