Kalaallit Nunaata oqaluttuarisaanerani nutaanerusumi aqutsisoq malunnaateqarluartoq toqukkut qimaguppoq. Toqunera aliatsaatigeqaarput. Kingulerulluta angut ilisimasaqarluartoq aammalu nunaminut innuttaanullu tunniusimangaarsimasoq eqqarsaatigalugu qujamasuuteqarfigeqaarput.
Juntaat ukiorpassuarni siuttuusimanermini inunnik isiginnittaaseqarpoq immikkoortitsinermik inissaqartitsinngitsoq, inoqatinili qaffasissumi appasissumiluunniit inissisimappata naligiittut isiginiartarpai.
Kommunit politikkilu eqqarsaatigigaanni suleqatitut aaqqiiniartartutut sorsuutiginnikkusuttartutullu eqqaamavarput. Ilisimasarpassuani ajornartorsiutinillu sammivinnit assigiinngitsunit takunnissinnaanini aallaavigalugit silatuumik siunnersuisarlunilu aqqutissiuisarpoq. Suleqatikkuminarnermigut Kalaallit Nunaannilu najukkanik tamanik ilisimasaqarluarnermigut kommunit politikkikkut inerisaaniarnerini tapersersuilluartartuuvoq.
Inuiaqatigiinni ineriartortitseqataaffigisimasamini inuunermilu iluarujussuani tunniusimaffigisimasamini ineriartorfiusinnaasunik pitsaasunik tikkuussisarsimavoq, aamma nuiamasutut inuunini qimakkaluaramiulluunniit.
Siuttutut malunnaateqarluartutut pileruttorami Kalaallit Nunaata avammut kiinnernera angusaqarluartissimavaa. Kalaallit Nunaanni siuttut siulliit ilaattut nunanik allanik siuttuinillu ikinnguteqalersitsivoq.
Minnerunngitsumik Juntaat inuunermik nuannarisalittut akunnattoorfeqanngitsutullu eqqaamassavarput. Juntaap nipaa immikkuullarissoq, politikkikkuuppat, upperisarsiorneruppat imaluunniit inuppalaartuuppat uatsinni innuttaasunilumi qaratsatsinni ikkusimavoq. Inuk taama sunniuteqartigisoq annaagatsigu aliasuutigeqaarput. Juntaat, nunatsinnut innuttaanullu suliniuteqangaarsimaninnut qujaniarnerput oqaasissaaleqissupparput!
Ilaqutaasut annaasaqarlutik aliasungaarneranni eqqarsaatitsigut najorlugit misiginneqatigingaarpagut.
Jonathan Motzfeldtip eqqaaneqarnera ataqqinartuuli!
Borgmesteri Asii Chemnitz Narup
Borgmesteri Simon Simonsen
Borgmesteri Jess Svane
Borgmesteri Hermann Berthelsen