Ukiaq manna Sisimiut eqqaani umimmaat takkuttartut pillugit kommunalbestyrelsip ataatsimiinnerani augustip 28-ani 2015 kommunalbestyrelsimut ilaasortat ilaat siunnersuuteqarpoq illoqarfiup qanittuani piniarfigeqqusaanngitsumik pilersitsisinnaaneq pillugu. Siunnersuutigineqartoq pillugu septemberip qaammataata ingerlanerani tusarniutigineqarnerani piffissaq sivikippallaarsorinarmat innuttaasunillu allakkatigut qisuariarfigineqanngimmat matumuuna nutaamik tusarniutigeqqinneqarpoq.
Siunnersuuteqartup tunngavilersuinermini siunnersuutigaa Kangerluarsuk tullermiit Sisimiut illoqarfiata tungaanut piniarfigeqqusaanngitsumik pilersitsisoqarsinnaanera pillugu, ilaatigullu siunnersuutigalugu umimmaat tuttullu piniarnagit takornariartitsinermi atorneqarsinnaasut assersuutigalugulu nunani allani pinngortitami qanittumi uumasut illersorneqartartut, uumasunik nujuartanik qanimut misigisaqartitsisinnaassagutta nuannissagaluartoq, taamaalilluni innuttaasut pissusissamisoortumik, toqugaaginnarnermit, uumasut inuunerinut pullaveqalissagaluartut, soorluttaaq illoqarfitsinnukartartunut misigisassarsiutigineqarsinnaagaluartut.
Siunnersuut Kommunalbestyrelsimi augustip 28-iani 2015 oqaluuserineqareerluni Pisussutit Uumassusillit pillugit ataatsimiititaliamut suliassanngorlugu ingerlateqqinneqarmat matumuuna Sisimiut aqutsiveqarfiani innuttaasut siunnersuut pillugu qanoq isumaqarnersut tusarniaavigineqarput.
Ilanngullugu ilisimatitsissutigineqassaaq siunnersuutigineqartoq pillugu Sisimiut aqutsiveqarfiani takornariartitsinermik ingerlatsisunut aamma aalisartut piniartullu peqatigiiffiinut qanoq isumaqarfigineqarnersoq tusarniutigineqarmat.
Suliap ingerlateqqinnissaa pissutigalugu matumuuna innuttaasut suliamut pineqartumut soqutiginnittut qinnuvigineqarput kingusinnerpaamik ulloq 15.11.2015 nallertinnagu qanoq isumaqarnerlutik allakkatigut siunnersuuteqaqqullugit. Isummersuutit aalisarnermut piniarmullu siunnersortimut tunniunneqarsinnaapput imaluunniit aamma nassiunneqarsinnaapput e-mail: otbe@qeqqata.gl.