Kommunip pilersaarusiorfigineqarnerani tapiliussaq 2017-imi novembarip 24-aniit 2018-imi februaarip 14-ata tungaanut tamanut saqqummiunneqarpoq.
Kommunip pilersaarusiorneqarnerani tapiliussakkut matumuunakkut siunertaavoq, inissiaqarfimmik assigiinngiiaartumik orniginartumik pilersitsinissaq, tamatumani kommunip pilersaarusiornermi periusissiaani atuuttumut naapertuuttumik atugassarititaasunik orniginartunik ataatsimoorussallu ilanngunneqareerlutik.
Uani inissianik ilaqutariinnut meerartalinnut, inuusuttunut, piginneqatigiinnut, attartortakkanut aamma piginnittunut, najugaqartunut nutaanut pilersitsisoqarsinnaavoq, illoqarfimmi innuttaasunut siammasissuunissaat naatsorsuutigineqartoq.
Pilersaarummik matuminnga aammattaaq siunertaavoq, isikkivimmik inissisimaffimmillu orniginartumik taassuminnga nuannaariartarfittut aamma siunissami arfernik alakkarterisarnissamut, illoqarfimmi innuttaasut periarfissamik taassuminnga atuiinnarnissaat.
Sanaartorfissat ilaat ataaseq siunertanut ataatsimoorussanut immikkoortinneqarpoq, soorlu assersuutigalugu hotellenut, ataatsimeersuartarfinnut assigisaannulluunniit, illoqarfiup tamarmiusup pisariaqartitaanut atorneqarsinnaasoq.
Sanaartorneq illoqarfimmi ilisarnaatitut annertuumik malunnaatilimmik inissisimasussaammat, immikkut piumasaqaateqartussaavoq aammalu sanaartukkat silatimikkut isikkussaannut ilusissaannullu atortussatigullu toqqaanermut aalajangersaqartussaavoq.
Pilersaarutip matuma kalaallit immikkuullarissuunerannut aammalu pioreersunut ataqqinnittumik ilallugu nutaamik eqqarsarluni illuliortaasermut kajumissaataallunilu tapertaassaaq.
Maannakkut sanaartoriaaseq aammalu siusinnerusukkut pitsaassuseq, misilittakkat ileqqullu pitsaasut mianersornikkut akuleeriisinneqarsinnaapput.Immikkoortup ilaa ullumikkut.
Illoqarfiup kitaani mittarfiup nutaap pilersinneqarnissaata tungaanut, immikkoortup ilaa ukiorpassuani Maniitsup illoqarfianut Heliportitut atorneqarnikuuvoq.
Nunaminertat ullumikkut qaqqap qaani ammalortutut, nunaminertap qeqqani mittarfimmik asfaltigaasumik suli isikkoqarput. Nunaminertaq qaqqamik attorneqarpianngitsumik, ilaqutariinnut illunik inuinnarnit pigineqartunit kaajallallugu avatangiiseqarpoq. Kujammut kimmut illunik nutaanngitsoqarpoq, avannamullu kangimut ilaqutariinnut illunik ileqqoq malillugu sanaartukkanik nutaanerulaartunik illoqarluni.
Immikkoortup ilaanut aqqusineqarnikkut appakaaffik qaqqap sinaani avannamut kimmut (maanna Tikaasaq) Mittarfik sivingasuukkut pioreersukkut pisarpoq.
Qatsissup qaavani nunaminertani sanaartorfioreersut saniatigut, Ivissuaateralaa sinerlugu "hylde"-mik 20 m missaani nerututigisumik, illoqarfiup ilaata ataani aqqusineq qulaallugu 10 m missaani portunerusumik aamma inissisimasoqarpoq. Sanaartorfissat taakku tikikkuminaatsuupput, qaqqarlu tikivillugu sanaartortoqassalluni, tassanilu inissialiortoqassappat imaanuinnaq isikkiveqassalluni.
Tusarniaanermi akissuteqaatit uunga nassiunneqassapput:
Qeqqata Kommunia
Kuutartoq, Postboks 100
3912 Maniitsoq
Email qeqqata@qeqqata.gl
Oqarasuaat: 70 21 00
Kommunip pilersaarusiorfigineqarneranut tapiliussat nr. 34 tamaat uani atuarsinnaavat