Asasakka arnat nukittuut.
Siullermik tamassi Sisimiunut tikilluaritsi.
Qeqqata Kommuniani Kommunalbestyrelsip sinnerlugu tikilluaqqusinnaagassi tulluusimaarlungalu nuannaarpunga maaniinnissarsi aaliangersimagassiuk, arnat taamak nukittutigisut akornanni tikilluaqqusineq assaa qamuuna pissatsinnaq.
Eqqartugassat ullut tulliuttut sakkortusinnaapput, misigissutsikkut oqimaassinnaasut piviusulli ulluinnarni aqusaartakkat eqqartorneqartariaqartulli. Taamaakkaluartoq misilittakkagut, oqaluttuarpullu siunissamut neriullualersippaanga.
Ullaaq manna iterama assut eqqarsaatersuutigivara qanoq tikilluaqqusissanerlunga, siullertut eqqavakka siulilkka nukissamik uannut annertuumik tunniussallit. Ullaarlu unalu annoraaq atugara sanallugu aallartillugu. Qalipaataa aappalaartuutippara, takutinniarlugu akilinermi/Canadami arnat tammaannartartut eqqaaniarlugit, aamma taakku maani puigorneqanngimmata eqqaaneqartarmatalu.
Sisimiuni Arnat Ulluanni (8.marts) arnarpassuit ataatsimoortarpugut ilaatigut maani Taseralimmi, ataatsimoornerit ilaanni aappalaartumik atoqqusivugut takutinniarlugu Canadami inoqatigut arnat tammartartut eqqaaniarlugit.
Arnaavugut nunap issittuani peqqarniittumi inuusut, issittumut allanullu akiuussinnaasut naleqqussallaqqissullu. Piujuaannartitsinermut pingaartitsisut siunissamut ungasinnermut eqqarsartartut.
Kaammattorusuppassi misilittakkasi, oqaluttuasi neriuuteqarnersi oqaluttuarissagissi ulluni tulliuttuni ammallusi tapersersoqatigiillusilu immissinnullu ilinniarlusi. Taakkuussappummi siunissami isumassarsiorfiusussat nukittorsaasussallu.
Tikilluaqqigitsi neriuppunga Sisimiuniinnersi pissarsiffiullunilu angusaqarfiulluarumaartoq.