Nalunaaruteqarneq tassaavoq innuttaasumit pisortaniluunniit sulisumit, meeqqamik inuusuttumilluunniit 18-it ataallugit ukiulimmik atugarliortutut pasisaqarluni saaffiginninnera.
Saaffiginnissutit meeqqat inuusuttulluunniit ernumanartumik pissusilersuuteqarneranik, pissutissaqaratik atuanngitsoortarnerannik paarinerlunneqarsimanerannilluunniit imaqarsinnaapput.
Meeqqanik inuusuttunilluunniik sumiginnakkanik, nakuuserfigineqarsimanerannik allatigulluunniit atornerlunneqarsimanerannik (timikkut, tarnikkut kinguaassiutitigulluunniit).
Innuttaasut (inunnut ataasiakkaat) Qeqqata Kommunianut qanoq saaffiginnittassanersut aalajangersimanngilaq. Allakkatiguusinnaavoq, oqarasuaatikkuusinnaavoq namminerluunniit ornigulluni saaffiginninnikkut.
Pisortani sulisut pisussaatitaapput allakkatigut nalunaaruteqarnissaminnik.
Illit meeqqap inuusuttulluunniit inuuneranik, peqqissusaanik ineriartornerataluunniit navianartorsiorsinnaaneranik ernumagisaqaruit Qeqqata Kommunia nalunaarfigissavat.
Pisortani sulisut pasittaassaqarunik meeraq inuusuttorluunniit immikkut ittumik tapersersortariaqartoq, tamanna kommunimut nalunaarutigissuaat.
Nalunaarutiginninnerup kingorna susoqassava?
Nalunaarutiginnissutit kommunimi suliarineqassaaq. Nalunaarutiginninnerup tigunerata kingorna, sapaatip akunnera ataaseq qaangiutsinnagu, Kommunalbestyrelsimit nalunaarutiginninnerup tigusimaneranik allakkatigut uppernarsaaserneqassaaq. Nalunaarutiginnereeruit, nammineq meeraanngikkuit, suliamut tunngatillugu susoqassanersoq paasitinneqassanngilatit.