Qeqqata Kommuniata, Naalakkersuisut aamma Lumina Sustainable Materials A/S-ip (siusinnerusukkut Hudson Greenland A/S) akornanni IBA-mik isumaqatigiissutaat

Piginnittut nutaat

2020-p ukiaani Hudson Greenland A/S-imik aningaasaqarnikkut aaqqissuusseqqinnermik ingerlatsisoqarpoq, suliffeqarfimmi marlunnik nutaanik piginneqataasoqalernermik kinguneqartumik.

Nutaatut piginneqataalersut Cordiant Capital Inc, Montreal, Quebéc, Canadami qullersaqarfeqarluni aningaasaliinissamut piginneqatigiiffik kiisalu Apex Asset Management, Schweizimi, qullersaqarfeqarluni aningaasaliinissamut piginneqatigiiffik piginneqatigiilernissamut Hudson Resources Inc.-imik isumaqatigiissuteqarpoq. Tamatuma saniatigut Nuummi qullersaqarfeqarfittut pilersinneqarsimasumi pisortaanermik nutaamik atorfinitsitsisoqarpoq, Qaqortorsuup eqqaani Naajani piiaavimmik nakkutilliinermik ingerlatsinermillu aqutsisunit ingerlanneqarluni.

2022-mi jannuaarip aallaqqaataanni Hudson Greenland A/S-ip aqqa Lumina Sustainable Materials A/S-imut allanngortinneqarpoq. 2024-mi Hudson Resources Inc. pigineqataanermit tunuarpoq.

IBA-isumaqatigiissut tamakkiisoq kiisalu atsioqatigiinnermit assit uani takusinnaavatit

Najugaqavissut sulisartut

Isumaqatigiissutitigut sulisartut avataaneersunit kalaallit sulisartut pingaarnerutinneqartarnissaat qulakkeerneqarpoq. Sanaartornerup nalaani aammalu ingerlatsinerup nalaani sulisut qanoq amerlatiginissaannik naatsorsuuteqarnermik kiisalu taakkunannga kalaallit sulisartui minnerpaamik qassiussanersut aammalu avataanit suliartortitat annerpaamik qassiunissaannut isumaqatigiissut anguniagassanik imaqarpoq. Ilaatigut aquttutut, maskiinanik ingerlatsisutut, elektrikeritut, teknikeritut, eqqiaasutut, igaffimmiutut allatigullu sulisartutut suliffissaqarniarnissami periarfissiivoq.

Isumaqatigiissummittaaq kalaallit suliffeqarfiutaasa piniartarfissatut sapinngisamik Lumina Sustainable Materials A/S-ip atuinissaanut anguniagassartaqarpoq, taamaalilluni kalaallit inuussutissarsiortunut niuernermut periarfissanik pilersitsissalluni.

Kalaallit sulisartut piginnaasaannik ineriartortitsinissamut, taamaalillunilu suliffissaqartitsiniarnerup siuarsarnissaanut, illuatungeriit tamarmik ilinniartitaanermut pilersaarutinik siuarsaanissamut, tapersersuinissamut kiisalu inerisaanissamut pisussaaffilerneqarput.

Isumaginninnermut Kulturimullu konto kiisalu Ilinniartitaanermut konto

IBA-isumaqatigiissummut ilaalluni, Lumina Sustainable Materials A/S Kalaallit Nunaanni inuiaqatigiinnik kulturimillu siuarsaaqataassaaq. Tassunga tunngatillugu piiaanermik ingerlatsivik aningaasaateqarfinnik marlunnik pilersitsivoq, ilinniartitaanernik pilersitsiniarnernut kiisalu tamanut iluaqutaasussatut suliniutinut tapersersuinissamik siunertaqartunik. 2016-imili suliffeqarfik aningaasaateqarfinnut marlunnut aningaasanik immikkoortitsisarpoq, aningaasaateqarfinnullu innuttaasut aaqqissuussaqarfiillu ukiut tamaasa oktobarimi qinnuteqarsinnaallutik.

Malittarisassat qinnuteqarnissamilu ingerlariaatsit pillugit annertunerusumik uani atuakkit

Lumina Sustainable Materials A/S sunaava

Lumina Sustainable Materials A/S kalaallit piiaanermik ingerlatsiviuvoq, Canadami aammalu Schweizimi piginnittoqartoq. Piiaanermik suliniummik pilersitsinermut atatillugu Kangerlussuarmi 2003-mili aatsitassaasinnaasunik qulaajaanissaq siunertaralugu misissuinernik ingerlatsisoqarnikuuvoq. Tassunga tunngatillugu Qaqortorsuarmi, White Mountainimik aamma taaneqartartumi, suliffeqarfik anorthosit-inik annertuunik nassaartoqarpoq.

2015-imi Piiaanissamut akuersissut aammalu IBA atsiorneqarput, tamatumalu kingorna sanaartorneq aallartinneqarluni. 2018-imi piiaanermik suliniut nioqqusiornissaminut piareerpoq.

Anorthosit aqatsitassaavoq ilaatigut glasfiberinik, qalipaatinik, cementinik polymerinillu nioqqusiornermut ilaatigut atorneqarsinnaasuusoq. Kalaallit Nunaannut iluaqutaasinnaasumittaaq nunarsuaq tamakkerlugu mingutsitsinngitsumik ingerlalersinnaanermut atatillugu anorthosit-i pitsaasumik iluaqutaasinnaasunik piginnaasaqarpoq. 

Aatsitassarsiornermut immikkoortumut nalinginnaasumik paasissutissat pillugit Naalakkersuisut.gl aamma govmin.gl -ikkut Aatsitassarsiornermut aqutsisoqarfik, Aatsitassarsiornermut inatsit il.il. pillugit annertunerusumik atuarnissaannut innersuussutigaagut.

Lumina Sustainable Materials A/S pillugu paasissutissat atuarnissaannut luminamaterials.com innersuussutigaarput

Isumaginninnermut Kulturimullu qinnuteqarfissamut paasissutissat uani takusinnaavat.

Ilinniarnermi taperneqarnissamut qinnuteqarfissamut paasissutissat uani takusinnaavat. 

Qinnuteqarnermi immersugassaq uani takusinnaavat.