Piginnaasat pigiinnarumallugit sungiusarneq

Piginnaasat pigiinnarumallugit sungiusarnerup siunertaa tassaavoq piginnaasanik annaasaqarnissap pinngitsoortinnissaa aammalu piginnaasanik attatiinnartitsinissaq, pingaartumik utoqqarnut inunnullu innarluutilinnut napparsimmavimmi sungiusaqqinnermik ingerlatsinikuusimasunut.

Innuttaasoq napparsimmavimmi sungiusaqqinnikuusimasoq, piumasaqaatigineqartuni tulliuttuni ataaseq amerlanerilluunniit atuutsillugit  kommunip piginnaasat pigiinnarumallugit sungiusarnissamut neqeroorutaanut innersuunneqarsinnaavoq:

1. Innuttaasoq pisariaqartitsineq naapertorlugu imaluunniit napparsimmavimmi pilatsissimareernermi kingorna napparsimavimmi timimik sungiusaasumit piginnaasat pigiinnarumallugit sungiusarnissamut innersuunneqarsimassaaq.
2. Innuttaasoq utoqqalisimalluni imaluunniit innarluuteqarneq tunngavigalugu ilaannakortumik imaluunniit ataavartumik aalanissamik pisariaqartitsisuussaaq.
3. Innuttaasoq utoqqalilluni imaluunniit siusinaartumik pensionisiaqarpat, napparsimmavimmit innersuussutitaqanngitsumik neqeroorummut peqataatinneqarnissaa eqqarsaatigineqarsinnaavoq.
4. Napparsimmavimmit innuttaasut innersuunneqartartut pingaarnertut makkuusarput:
   1. Anigorsinnaanngisamik innarluuteqarnermut atatillugu aalanissamik pisariaqartitsisoq
   2. Uummalluttut
   3. Qaratsamikkut aanaartoorsimasut aammalu milikartoorsimasut
   4. Innuttaasut ADHD-mik & autisme-mik innarluutillit
   5. Innuttaasut sukkornermit nappaatillit
5. Neqeroorummut peqataanissaq sioqqullugu, peqqinnikkut unamminarsinnaasunik takutitsisumik imaluunniit anigorneqarsinnaanngitsumik nappaateqarnermik takussutissiisumik nakorsamit uppernarsaat piumasarineqarsinnaavoq.

Inuit tulliuttut neqeroorummut innersuunneqarsinnaanngillat:

1. Innuttaasut siuliani piumasaqaatinik naammassinnigatik sanigorniaannarlutik neqeroorummik atuerusuttut.
2. Innuttaasut inoqatinik allanik peqateqarniaannarlutik neqeroorummik atuinissamik kissaateqartut. Utoqqarnut ataatsimoorlutik cafe-rtarnerat innersuussutigineqarsinnaavoq
3. Innuttaasut ersiuteqanngitsut aammalu innuttaasut inuttut ajornartorsiuteqarnerminnut atatillugu atuiunnaarsarneqartut.

Innuttaasoq nammineq angerlarsimaffimmi timersortarfimmisut sungiusartalersimappat, timersortarfimmi piginnaasat pigiinnarumallugit sungiusarnermik neqeroorut taamaatinneqassaaq.

Tamassuma saniatigut innuttaasoq qaammammi ataatsimi peqquteqanngitsumik peqataanngivissorpat, sungiusarnermut neqeroorutigineqartoq aamma taamaatiinnarneqassaaq.

Innuttaasut napparsimmavimmit innersuunneqarsimasunut sungiusarnermut aningaasartuutit kommunimit akilerneqartassapput.