Ilaatigut tarnikkut pissutsitigut ineriartornermilu isumassuineq kiisalu paasinnittaatsimut sinaakkutit suut aallaavigineqarnersoq apeqqutaatillugu, kinguaassiuutit, pingaartumillu meeqqat atoqatigiinnermut tunngatillugu paasinnittariaasiat nassuiarneqarneralu assigiinngitsumik paasineqarsinnaavoq.
Ullumikkut nalinginnaasumik paasinnittariaaseq tassaavoq, meeqqat mikisuunerminniilli kinguaassiuutiminnik ilisimaarinnittarmata, allaallu mikisunnguunerminniilli kinguaassiuutiminnik ilisimaarinnilereertarlutik. Assersuutigalugu nukappiaqqat naalungiarsuit tissassinnaasarput, meeqqallu mikisut (2-3-inik ukiullit) nammineq suiaassutsiminnik attualaarnikkut iluarusuttarlutik.
Qaqugukkut kinguaassiuutinik atuineq, imaappoq nalinginnaanngitsumik kinguaassiuutinik atuinerup nalilerneqarnissaani, meeqqat suiaassutsikkut nalinginnaasumik kinguaassiuutitigullu ineriartornerat pillugu ilisimasaqarnissaq aallaavittut pingaaruteqarpoq.
Kinguaassiuutitigut kanngutsaatsuliorneq pineqartillugu, kinguaassiuutitigut innarliineq atornerluinerlu assigiinngissuseqarpoq. Inatsisilerinermi qanigivallaakkamik atoqateqarneq, kinguaassiuutitigullu kanngutsaasuliorneq immikkoortinneqartarput. Kinguaassiuutitigut kanngutsaatsuliornermi atoqatigiineq, atoqatigiinnermut sanilliullu allatigut kinguaassiuutitigut atoqateqarneq kanngutsaatsuliorfiginninnerlu pineqarpoq. Kinguaassiuutitigut kanngutsaatsuliornerit inersimasumit (aamma qanigisamit) meeqqamut iliuuserineqartut naatsumik nassuiarneqarnerat imaappoq:
Takussutissat – meeraaqqani:
- Pissusilersuutikkut allanngorneq
- Kinnguaassiutinut tunngasutigut pissusilersorneq
- Ingattajaartumik/pinngitsaaliisutut isukkulimmik attuualaarneq/tissassarneq
- Ukiuminut ineriartornerminullu naleqqiullugu annertunerusumik kinguaassiuutitigut nalinginnaanngitsumik soqutiginninneq ilisimasaqarnerlu.
- Inuusanik pinnguaneq, kinguaassiuutitigut kanngutsaatsuliornerit takutinneqarlutik
- Pissusilersuutitigut kinguariarneq, meeraaqqatut oqalunneq
- Avammut qisuariarneq, sakkortuumik pissusilersorneq, isimmittaaneq, annersaaneq, kimmaaneq
- Pequallassimaarujussuartarneq
- Neriuutaarunnermik kamammillu misigisaqarneq
- Inunnut imaluunniit sumiiffinnut aalajangersimasunut annilaangagisaqarneq iluarinninnginnerlu.
- Pissutissaqanngitsumik qissaserneq
- Pinnguarnermut allanillu peqateqarnermi aallussinissamik ajornartorsiuteqarneq.
- Nipaanneq
- Imminermut anniartitsineq, niaqoq arlaannut anaarlullugu, imminut nujaartorneq, timikkut imminut kilertiterneq imaluunniit assinik killuineq
Takussutissat – meeqqani anginerumaalaani:
- Ilinniarnissamik ajornartorsiuteqarneq, aallussisinnaannginneq.
- Inersimasutut kinguaassiutitigut pissusilersorneq, peqqusaartumik pisunneq, qaninniarujoorneq
- Takoqqusaartumik atisalersorneq
- Imminermut ajoqutaasinnaasumik pissusilersuleriartorneq
- Piginnaasanik annaasaqarneq
- Illersuutissatut periusissanik ineriartortitsilerneq
- Qinngasaarisarneq
- Imminornissamik eqqarsaateqaleriartorneq
Takussutissat – inuusuttuaqqani
- Imminut ajoqutaasumik pissusilersorneq, imminut kilertitertarneq, imminornissamik eqqarsaatersorneq misiliinerlu
- Nerisaqarnikkut ajornartorsiutit
- Imigassamik ikiaroornartumillu atornerluineq
- Eqqunngitsumik inerisimanermik takutitsineq
- Isertuussisoq, kanngusunneq
- Immikkuullarissumik timikkut oqariartuuteqarnissamik, timikkut pissusilersornermik, pisuusermik ineriartortitsineq.
Meeqqanut inuusuttuaqqanullu ulloq unnuarlu neqeroorutini sulisuullutit, meeqqamut inuusuttaqqamulluunniit 18-liineqanngitsumut kinguaassiuutitigut kanngutsaatsuliortoqarsimaneranik pasitsaassaqartumut innersuussaavoq.
- Ilisimalikkatit pillugit pisortarisannik oqaloqateqarit nalilersuillutillu.
- Pasitsaassinerit imaluunniit kinguaassiuutitigut kangutsaatsoliornerit ingerlaannarpata, upalungaarsimasuni sinniisoq aqutsisumit attavigineqassaaq.
- Allakkatigut Ilaqutariinnermut immikkoortortamut nalunaarutiginninneq.
- Angajoqqaap aappaanut marluutillugilluunniit pasitsaassineruppat - EQQAAMASSAVAT, tamanna pillugu angajoqqaanik oqaloqatiginnissannginavit.
- Qaninnertut pisortarisap oqaloqatigereerneratigut politiinut nalunaarutiginnittoqassaaq.
- Meeqqamut/inuusuttuaqqamulluunniit isiginninnerit attatiinnasavat.
- Eqqaamallugu nipangiussimasussaatitaagavit!
”Sakkortusisamik nalunaartussaatitaaneq”
Inunnik isumaginnittoqarfimmut nalunaaruteqarneq imminermini naammaneq ajorpoq.
Pisortap imaluunniit inunnik isumaginnittoqarfimmit aalajangiussamut sulisoq isumaqataanngikkuni, nammineq naliliisinnaaneq aallaavigalugu sulisup inuttut/suliamut iliuuseqarnissaminut akisussaaffeqarpoq.
EQQAAMALLUGU: Nalornissuteqarneq pillugu upalungaarsimasussaatitaasunut tamanna ingerlatissallugu pingaaruteqarmat.
Pasitsaassaqarnermi ernummateqarneq kisimi pinneqanngilaq.
Pasitsaassaqarnermi meeqqap inersimasumit meeqqamilluunniit allamit kinguaassiuutitigut killissamik qaangiiffigitissimaneranik pasitsaassaqarneq pineqarpoq, assersuutigalugu piffimmi sivisuumi meeqqamik nakkutiginninnermi, meeqqap nammineq pisimasut sumi ilisimasaaluunniit arlaatigut paasisimasat tunngavigalugit pisinnaavoq.
Sulisut nakkutilliinermi pasitsaassaqarnermiluunniit piaartumik qaninnertut pisortarisaq akuutinneqassaaq.
Alaatsinaassimasat allattornissaat pingaaruteqarpoq. Alaatsinaassimasat tamaasa ullulersornissaat eqqaamassavat.
Meeqqamut inuusuttuaqqamulluunniit nakuuserneq kinguaassiuutitigulluunniit atornerluinermik pasitsaassaqarnermi illit/pisortarisalluunnit upalungaarsimanissamut suleqatigiisitat ATTAVIGIUAANNASSAGAKKIT eqqaamassavat.
Inunnut ataasiakkaanut paasissutissanik mianersuutigisassanik avitseqatigiinneq
Meeqqat inuusuttuaqqallu eqqugaasimasut kingumut eqqugaanissaat pinngitsoortinniarlugu, politiit pisortallu suliamik inummut tunngassuteqartunik paasissutissanik mianernartunik avitseqatigiissinnaatitaanerat pillugu inatsisitigut periarfissaavoq.
Meeqqamut kinguaassiuutitigut kanngutsaatsuliornermik nakuusernermilluunniit pasitsaassisoqarsimatillugu, pinerit tamaasa upalungaarsimatitat SAAFFIGINEQARTASSAPPUT.
Kinaluunniit meeqqamik paarinerlunneqartumik sumiginnagaanermilluunniit, imaluunniit peqqissutsimigut ineriartorneranulluunniiit navianartorsiortinneqarluni atugaqartinneqartumik paasisaqaruni, kommunimut nalunaartusaatitaanermik inuttut pisussaaffeqarpoq. Pisortani atorfillit kiisalu paaqqinniffinni namminersortuni aammalu namminersorlutik oqartussat pigisaanni atorfeqartut, pisortanut sullissisunut sakkortusisamik nalunaartussaatitaapput.
Sakkortusisamik nalunaartussaatitaaneq inuttut namminermut pisussaaffiuvoq, pisortanilu atorfilinnit, aammalu namminersortuni suliffeqarfinnilu imminut pigisuni atorfilinnut, pisortanut sullissisunut atuuppoq. Meeraq ulluinnarni avatangiisimigut, atuarfimmi imaluunniit inuiaqatigiinni, allatigullunniit pissutsinik naammaginanngitsumik inuuneqartumut, imaluunniit timikkut tarnikkut piginnaasaqassutikkulluunniit nammineq aaqqissinnaanngisamik ajornartorsiuteqartunut nalunaartussaatitaaneq atuuppoq.
Nalunaaruteqarnermi pissutsit eqqortut, misissuinerilluunniit piviusut oqaaseqaatillu kisimik tunngaviussapput. Nassuiaasersuutit tunngvilersuutigineqartut, nalunaaruteqarnermi ilanngunneqassanngillat. Nassuiaasersuisoqartillugu taakku paasissutissanut piviusunut immikkoortinneqarluinnassapput.
Suliami pissutsit ima ingasatsigisimappata iliuuseqartussaatitaallutit:Upalungaarsimasuutitat attavigikkit.
- Meeqqanut Ilaqutariinnullu immikkoortortami Isumaginninnermut siunnersorti attavigiuk, suliamullu tunngasumik paasissutissiivigalugu, taamatullu nalunaarummik uunga nassiussillutit: sis.familie@qeqqata.gl
NB: Nalunaaruteqarnermi angajoqqaat pineqartillugit, nalunaaruteqarneq pillugu taakku ilisimatinneqassapput.
Meeraq pillugu suleqatigiit
Isumaginninnermut siunnersorti suliamik nalunaaruteqarnermik tunngasumik tigusaqartillugu, akunnerit 24-t iluini qitiusumik nalunaarsorneqarlunilu nalilersorneqassaaq. Naliliinermi meeqqap inuusuttulluunniit peqqissusaanut ineriartorneranulluunniit annertuumik ajoquserneqarsimasinnaanera kiisalu akunnerit 24-t iluani meeqqap peqqissusia naalaarneqassanersoq isummerfigineqassaaq.
Tamatuma kingorna Meeqqanut Ilaqutariinullu immikkoortortami aqutsisoq, meeraq pillugu suliamut attuumassuteqartunut ataatsimiinnissanik piaartumik iliuuseqassaaq (meeraq pillugu suleqatigiit).
Ilaqutariinnermut pisortaq upalungaarsimasunut attaveqassaaq, suleqatigiillu naapinnissaat isumaqatigiissutigineqassalluni.
Meeqqamik oqaloqateqarneq
Atornerluinermik unnerluutiginninnermi meeqqamik oqaloqatiginnittoqassaaq. Oqaloqatiginninneq sioqqullugu, qaqugukkut oqaloqatiginnittoqaruni pitsaanerussanersoq, Isumaginninnermut siunnersortimit nalilerneqaqqaassaaq. Politiit suliamik misissuissappata, misissuinissaannut naleqqussaalluni oqaloqatiginninnissaq pilersaarusiorneqassaaq. Taamaattumik videokkut apersuisoqarniartillugu oqaloqatiginninneq kinguartinneqarsinnaavoq.
Angajoqqaanut pasitsaassisoqartillugu, angajoqqaat akuersiteqqaartinnagit peqataatinnagillu oqaloqatiginninnerit ingerlanneqartassapput.
Pinerluttuliortoqarneranik ilisimasaqalersimagaanni, taava tamanna politiinut nalunaarutigisariaqarpoq.
Politiinut unnerluutiginnittoqartinnagu ataqatigiissaarisut attavigineqaqqaassapput.
Ilaqutariinut immikkoortortami Ilaqutariinnut pisortaq/tullersorti imaluunniit Meeqqanut Ilaqutariinnullu immikkoortortami aqutsisoq politiinut unnerluutiginnittoqassanersoq naliliisarput. Pinerluuteqarsimanermut inatsit naapertorlugu, pinerluttuliornerit tamarmik politiinut unnerluutigineqartassapput.