Kanaartaq

Ataasinngorneq - Tallimanngorneq

Nal. 06:45 - 17:00

 

Meeraaqqerivimmi meeqqanut 24-it inissat ininut marlunnut agguataaqqapput. Meeraaqqat 0-1½-inik ukiullit, aappaanilu 1½-3-inik ukiullit inissaqarput. Meeqqerivittaani meeqqanut 40-inut inissaqarpoq, inip aappaani 3-4½-inik ukiullit aappaanilu 4½-atualertussanngornissamik tungaanut ineqartarlutik, tamarmik meeqqanut 20-inut agguataarsimallutik.

Meeraateqarfik innarluutilinnut naleqqussagaavoq, meeraq innarluutilik meeqqatut marluttut naleqartinneqartarpoq.

Ullaakkut 09:30-ip kingorna meeqqat ukioqatitik peqatigalugit meeqqamut ineriartuutaasunik sammisaqartinneqartarput. Nal.11:00-ip kingorna meeqqerivittaani init sammisaqarfiit ullup sinneranut ammarneqartarput, ini assassortarfik, ini pinnguartarfik, silamilu aneerusuttut aneersinnaasarlutik.

Meeqqanik aggiussisarneq kingusinnerpaamik nalunaaqutaq qulingiluanit pisarpoq. Pisariaqavissumik kingusinnerusukkut meeraq takkutsinniaraanni nalunaaqutaq qulingiluanut sioqqullugu meeraateqarfimmut 86 66 14-imut sianernikkut nalunaarutigereersimassaaq. Meeraateqarfik meeqqanut ineriartortitsiviummat sapinngisamik kingusinaarnerit pisariaqanngitsut pinngitsooqquneqarput, matumani pingaaruteqarmat meeqqap sammisaqarnerit meeqqamut ineriartuutaasut peqataaffigissagai.

Meeqqat kingusinnerpaamik nalunaaqutaq tallimanut aatereersimassapput, angajoqqaat namminneq aallersinnaanngikkunik immersugassami meeqqap isernerani immersorneqartartumi kina aallertorissanerlugu ilisimatitsissutigissavaat. Meeraq aallertartorineqassappat 12-it sinnerlugit ukioqalereersimassaaq, ullormi allamik aallertoqariasaassagaanni angajoqqaap sulisunut minnerunngitsumillu meeqqamut ilisimatissavaa kiap aassaneraa.

Meeraateqarfimmut imigassartorsimasut aanngajaarutinillu atuisimasut meeqqanik aallersinnaanngillat.

Meeraq sapinngisamik ullaakkorsioreersimalluni meeraateqarfimmut takkunneqassaaq, ullaakkut nerisat pingaaruteqarmata sukkoqarpallaanngitsunik ullaakkorsiorsimanissaq pingaaruteqarpoq, meeqqap tiguartissinnaassusaa ilikkajassusaalu sunnerneqartarmata.

Ullup qeqqasiorneq: 11:00 – 13:00 akornani meeraq neriartorsinnaavoq.

Ualikkorsiorneq: 14:00 – 15:00 akornani meeraq neriartorsinnaavoq.

Meeraq silap qanoq innera malillugu, qanorlu ilisinnaanera piareersimaffigalugu atisaqartinneqassaaq, meeraq pinngitsoorani iluatigut atisassamaateqassaaq. Sillimaniarneq eqqarsaatigalugu isersimmatit pigeqquneqarput. Siallerajussitillugu sialussiutit gummillu nassartuarnissaat pingaaruteqarpoq meeqqat aneerusukkunik aneersinnaajuarniassammata.

Meeqqat atisaat ilisarnartunik ilisarnaasersorneqassapput, atisat assigiiaakkajummata paarlaattoornerit pinaveersimatinniarlugit

Ukuninnga inuttaqartoq, angajoqqaat, meeqqamut pilersuisuiusut sulisullu ukiumut minnerpaamik sisamariarlutik ataatsimiittussaapput, taakkununnga ilaallutik ukiup tullissaanut anguniagassanik pilersaarusiorneq.

Meeqqat killiffimmikkut ineriartornerat aallaavigalugu sulisut meeqqallu angajoqqaavi, pilersuisuii ukiumut marloriarlutik naapeqatigiittarput. Taakkununnga ilaalluni meeqqat atualertussanngoriartortillutik naliliiuniummik killiffiinik nalilerneqareerneri sutigullu sulisut angajoqqaallu tapersersoqatigiinnissaat eqqartorneqartarlutik.

Sapinngisamik meeqqat, angajoqqaat, pilersuisuiit sulisullu ajunnginnerpaamik suleqatigiittussaapput, arlaatigut saaffiginnissutit tamaasa tikilluaqquneqarput.

Pisortaq: Jacobine Jeremiassen