Nunaminertamik nutaamik atuilersitsinerit tamarmik Kommunalbestyrelsip nunaminertamik atugassiilluni akuersissuteqarneratigut pisussaavoq. Aamma nunaminertat illulluunniit allatut atorneqarnissaat, nunaminertamik atuigallarnermi, nunamik allannguinerit kiisalu illunik ingutserinermi nappaaqqinnermilu tamanna atuuppoq.
Nunaminertamik atugassiisarneq tunniunneqartoq allamut atugassinneqartussaanngilaq piginnittussaatitaasumullu allamut tunniussinissaq aatsaat nunaminertamik oqartussaqarfimmit tunniunneqarsinnaalluni. Taamaattumik piginnittumit allamut illumik aammalu/imaluunniit sanaartukkamik pisinermi tunisinermilu, imaluunniit kingornussinermi aammalu pigisanik piginnittussaatitaanerit piviusunngortinnerini, nunaminertamik atugassiisarnikkut atuinissamut piginnittussaatitaaneq suliarineqassaaq.
Nunaminertamik atugassinneqarnissamik qinnuteqaat
Illit innuttaasutut, inuinnartut suliffeqarfittulluunniit assersuutigalugu illuliorusukkuit nunamik atuisinnaatitaavutit. Nunaminertamik atugassinneqarnissamut qinnuteqaateqarnikkut nunaminertamik atuisinnaatitaalersinnaavutit.
Qeqqata Kommuniani Teknikkeqarnermut Avatangiisillu immikkoortortami, nunaminertamik atugassinneqarneq Nunaminertanik Oqartussanit isumagineqartarpoq.
Qinnuteqarniarnermi immersugassaq anillatseriarlugu nunaminertamik atugassinneqarnissamut qinnuteqarsinnaavutit:
ansøgningsskema.pdf
Immersugassaq anillatseriarlugu immersoreerukku atsiussavat. Qinnuteqaat Maniitsumi imaluunniit Sisimiuni Teknikkeqarnermut Avatangiisinullu immikkoortortamut, imaluunniit najukkami innuttaasunut sullissivimmut imaluunniit nunaqarfimmi allaffimmut nassiussinnaavat tunniulluguluunniit. Nunaminertaq qinnutiginiagaq nunap assingani nalunaarsorneqassaaq qinnuteqaammullu ilanngullugu. Nunap assinganik ataani allassimasunut saaffiginnillutit piumasinnaavutit.
Maniitsumi, Atammimmi, Napasumi Kangaamiunilu nunaminertamik atugassinneqarnissaq pillugu qinnuteqaatit apeqqutillu,
otm.man@qeqqata.gl aqqutigalugu nassiunneqassapput.
Sisimiuni, Kangerlussuarmi, Itillimi Sarfannguinilu nunaminertamik atugassinneqarnissaq pillugu qinnuteqaatit apeqqutillu,
otm.sis@qeqqata.gl aqqutigalugu nassiunneqassapput.
Nunaminertamik atugassinneqarnissamik qinnuteqarnermut immikkut ittumik paasissutissaq uani nassaassaavoq:
Nunaminertamik atugassinneqarnissamik qinnuteqarnermut paasissutissaq
Kalaallit Nunaanni nunamut piginnittunngortoqarsinnaanngilaq, kisianni nunaminertamik atuinissamut pisinnaatitsisoqarsinnaavoq, tassalu nunaminertanik ingerlatsinermut tunngaviusuusoq.
Tamanna siusinnerusukkut kalaallit inooriasiannit patsiseqarpoq, tamatumi nuna ataatsimut atugassiaasarsimammat. Aallaaniarnermut piniarnermullu atuinermut tunngavissatut atorneqarnerunikuummat. Nunami sumiluunniit inissinnissamut piniarnissamullu appakaassinnaaneq sukkulluunniit pisinaasutut isigineqarnikuuvoq. Piniagassanik pinngitsuuvisinnaannginnerup kingunerisimaa, ilaqutariit tamanna malillugu nuttartarnerat piniagassallu malillugit nuttartarneq. Najugarisat utaqqiisaasutut ilusiligaasarput, aasaanerani toqqit, ukiuunerani issunik qarmanillu illuikkiat.
Ullumikkulli ataatsimoorussilluni atuineq killeqalernikuuvoq, illuliortullu nunami illuliorfimmini illullu atornerani nunamut attartortutut pisinnaatitaaffeqarpoq.
1953-imiilli nunaminertanik atuinerup aqunneqarnissaanut pisariaqartitsisoqarnikuuvoq. Ullumikkut inatsit atuuttoq tassaavoq, pilersaarusiorneq aamma nunaminertat atorneqartarnerat pillugit inatsisartut inatsisaat nr. 17, 17. november 2010-meersoq.
Nunaminertanik aqutsinermut tunngavigisani Qeqqata Kommuniani aamma atuuttuupput, nunaminertamik atugassiinermik nalunaaruteqarnissaq sioqqullugu aalajangersakkanik annikitsukkaanik pigisaqartoqassasoq. Nunaminertanik atugasssiinerit tamarmik kommunip pilersaarusiorneqarneranut naapertuutissapput.
Kommunip aqutsineranut aammalu nunaminertanik atugassinneqarnissamik qinnuteqartunik sullissinermi innuttaasunut paasissutissiinissami ileqqoreqqusat uku sakkussaapput.
Nunaminertamik atugassiineq aamma nunaminertamut akuersissut ataatsimut isigalugu paasissutissiineq
Nunaminertat kommunip iluaniittut, immikkoortortanut agguataagaapput, aalajangersangaallutillu kommunip pilersaarutaanut ilaallutik. Aalajangersakkat taakku aalajangersartarpaat ilaatigut:
- Nunaminertaq qanoq atorneqassasoq,
- Siunertamut sumut atorneqassava aamma
- qanoq atorneqartigissava.
Taamaattumik nunaminertamik atulinnginnerani – assersuutigalugu sanaartorneq, ilioraaneq, alliliineq imaluunniit atuinerup allanngornera – akuersissummik nunaminertamik atugassiineq -ngorlugu imaluunniit nunaminertamut akuersissut-inngorlugu pissarsiarineqarsimassaaq.
- Nunaminertamik atugassiineq
Nunaminertamik atugassiinerup illunik imaluunniit atortulersuutinik - assersuutigalugu illumik imaluunniit inissiivimmik nikisinneqarsinnaanngitsunik - sanaartornissamut, allannguinissamut imaluunniit isaterinissamut nunaminertap atornissaanut pisinnaalersissavaatit. Pisinnaatitsineq taanna aallaavittut isigalugu ataavartuuvoq.
- Nunaminertamut akuersissut
Nunaminertamut akuersissutip atortunik nikisinneqarsinnaasunik – assersuutigalugu container-imut, umiatsisamut imaluunniit inissiiviugallartussamut - nunaminertap atornissaanut pisinnaalersissavaatit.
Imatut Nunaminertamik atugassiissummik qinnuteqarsinnaavutit:
- Digitalimik NunaGIS aqqutigalugu imaluunniit
- Kommunerisarnut saaffiginnillutit immersugassamik pissarsisinnaavutit, immersoreerukkulu tunniunneratigut kommunimut.
Kommunerisat toqqaruk
Qanoq ilillutit kommuninni qinnuteqarsinnaanerit pillugu ersarinnerusumik paasisaqarumaguit, toqqassavat ”illit kommunit” allanneqartumiittoq "Kommunerisannuinnaq aalajangersimasunik paasissutissaqarpoq" uani "Nunaminertamik atugassiisarneq" sullissivik.gl-imi.
Danskisut innuttaassuseqanngikkuit Kalaallit Nunaanni atuisinnaatitaanermut inatsisit immikkut ittut atuupput. Tamanna nunanit allamiuneersunut kisimi atuuppoq, danskisut innuttaassusillit kalaallillu pinnagit.
Immikkut ittumik akuersissuteqarani nunaminertamik atugassinneqarnissamik qinnuteqarsinnaanermut piumasaqaatit
Nunami allamiuullutit nunaminertamik atugassinneqarnissamik taamaallaat qinnuteqarsinnaavutit, illit:
- sivikinnerpaamik ukiuni marlunni Kalaallit Nunaanni inuit allattorsimaffianni nalunaarsorneqarlutit aalajangersimasumik najugaqareersimaguit aamma
- piffissami tassani Kalaallit Nunaannut tamakkiisuusumik akileraaruteqartuusimaguit.
Piumasaqaatinik naammassinninngikkuit
Nunaminertap (nunaminertamik akuersissummut) atornissaani atuinissamut pisinnaatitaaffimmik tunineqarsinnaanermut piumasaqaatit naammassinngikkukkit, Ineqarnermut Attaveqaatilersuutinullu Naalakkersuisoqarfimmut immikkut ittumik akuerineqarnissamik qinnuteqassaatit. Akuersissummik tassannga peqanngikkuit, nunaminertamik atugassinneqarnissamik qinnuteqaatit suliarineqarsinnaanngilaq.
Nunaminertamik atugassinneqarnissamik qinnuteqarsinnaassagaanni, immikkut ittumik akuersissummik qanoq qinnuteqartoqartarpa
Siuliini allanneqartut piumasaqaatit eqquutsinngikkukkit, qinnuteqarsinnaavutit immikkut ittumik akuerineqarnissamik qinnuteqaatinnik nassiussinikkut uunga:
Ineqarnermut Attaveqaasersuutinullu Naalakkersuisoqarfik.
Box909@nanoq.gl
Ersarinnerusumik paasisaqarusukkuit qinnuteqaatit sunik imaqassanersoq, Ineqarnermut Avatagiisinullu Naalakkersuisoqarfik saaffigissavat.