Avataasiorluni aalisarnissamut akuersissummik qinnuteqarneq

Inuussutissarsiutigalugu aalisartutut Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfimmit aalisarnermik ingerlatannut akuersissummik atuuttumik peqassaatit.
Aalisarsinnaanermut akuersissummik qinnuteqarsinnaavutit:

• inuttut ataasiakkaatut
• ingerlatseqatigiiffittut peqatigiiffittulluunniit

Aalisarnermut akuersissut aalisakkamut ataatsimut atuuppoq:

• Sumiiffimmi killilikkami ataatsimi
• Ukiumi ataatsimi 1. januar-imiit december 31-nut, imaluunniit
• piffissami aalisarfiusumi ataatsimi Aalisarnermut, Piniarnermut, Nunalerinermut Imminullu Pilersornermut Naalakkersuisoqarfimmit nalunaarutigineqartumi

Avataasiorluni aalisarnermi aalisarsinnaanermut akuersissummik piffissamik killilikkamik qinnuteqarsinnaavutit, tamannalu 1. januarimiit 31. decemberip tungaanut atuutissaaq.

Akuersissummi ukiumi akuersissutip atuuffiani aalisakkanik annerpaamik qanoq tonsinik annertutigisunik pisaqarsinnaanersutit takuneqarsinnaassaaq.

Inuussutissarsiutigalugu aalisartutut nalunaartarnissamut pisussaaffeqarputit. Pisarisatit saniatigullu pisarisuukkatit nalunaarutigisartussaavatit. Saniatigut pisarisuukkani aalisakkat tunisaanngitsut, timmissat, imaani miluumasut, immami pupiit koralillu pineqarput.

Pinngortitap eriaginissaanut inuttut nammineerlutit akisussaaffeqarputittaaq. Imaq ataatsimoorluta isumalluutigaarput ataatsimoorlutalu aamma akisussaaffigalutigu.

Kalaallit Nunaata aalisarnera pillugu, pisassiissutit pillugit, aqutsinissamut pilersaarutit pillugit il.il. Aalisarnermut Piniarnermut, Nunalerinermut Imminullu Pilersornermut Naalakkersuisoqarfiup nittartagaani paasisaqarnerusinnaavutit. www.apn.gl.

Inuussutissarsiutigalugu aalisartutut aalisarsinnaanermut akuersissut pillugu qinnuteqarsinnaanermut piumasaqaatit makku naammassisimassavatit:

• Qitiusumik Suliffeqarfinnik Nalunaarsuiffimmi (CVR-registeret) nalunaarsorneqarsimassaatit
• Angallatit Søfartsstyrelsip angallatinut nalunaarsuiffiani nalunaarsorsimassaaq.
• Kalaallit Nunaanni akileraartuussaatit, ukiunilu kingullerni 5-ni akileraartuusimassallutit
• Kalaallit Nunaanni najugaqartuuvutit, ukiunilu kingullerni 5-ni najugaqartuusimallutit

Tamatuma saniatigut ingerlatseqatigiiffinnut makku piumasaqaataapput:

• Ingerlatseqatigiiffik aktiaateqarluni ingerlatseqatigiiffiussaaq, piginneqataassuteqarfiulluni ingerlatseqatigiiffiussaaq, piginneqatigiiffiussaaq,soqutigisaqaqatigiiffiussaaq imaluunniit piginneqatigiilluni umiarsuaatileqatigiiffiussalluni
• Ingerlatseqatigiiffiup aningaasaatai tamarmik inunnit ataasiakkaanit imaluunniit ingerlatseqatigiiffinniit toqqaannartumik toqqaannanngitsumilluunniit pigineqassapput, taannalu

- Kalaallinut inuiaqatigiinnut aalajangersimasumik attuumassuteqassaaq (piginnittuunermut uppernarsaat aamma inuit allattorsimaffiat)
- Kalaallit Nunaanni inuit nalunaarsorsimaffianni allanneqarsimalluni najugaqassaaq Kalaallit Nunaannilu inuit nalunaarsorsimaffianni allanneqarsimallutik ukiuni siuliini tallimani najugaqassaaq,
- Ukiuni qaammatisiuteqarfiusuni tallimani siuliini Kalaallit Nunaanni tamakkiisumik akileraartussaatitaasimassaaq

• Ingerlatseqatigiiffik ukioq kaajallallugu aningaasaqarnikkut patajaatsumik tunngaveqarluni aalisarnissamik qulakkeerinnissimassaaq

Piginnittuuneq pillugu piumasaqaatit allassimasut Aalisarneq pillugu Inatsisartut inatsisaat 23. maj 2024-meersup atuutilernerata kingorna kingusinnerpaamik ukiut qulit qaangiutsinnagit naammasseriissapput.

Aalisarnermut atortuutit pillugit piumasaqaatit:

• Aalisarnermut atortuutit piginnittup aqqanik aamma/imaluunniit angallatip taaguutaanik ersarissumik nalunaaqutserneqarsimassapput. Nalunaaqutsiinerit imermit arrortinneqarsinnaassanngillat.
• Aalisarnermut atortuutit tamarmik atorneqareernermikkut peerneqartarnissaat nammineerlutit akisussaaffigaat. Aalisarnermut atortuutit nalunaaquttap akunneri 24-t ingerlaneranni qaqissinnaassanngikkukkit tamanna KANUAPNA-mut nalunaarutigissavat. Tunngaviusumik killeqarfimmit 3 sømilit iluanni atortuutitit annaasimagukkit tamanna aamma kommunimut nalunaarutigissavat.

Imarpimmi aalisarsinnaanermut akuersissummut qinnuteqarusukkuit (kalallit nunaanni, nunallu tamalaat imartaanni, norskit, islandimiut imaluunniit savalimmiut imartaanni) qarasaasiakkut toortagaq sungaartoq toorlugu nammineq sullinnermi "Maana qinnuteqarit" uani quppernerup qulaani allaqqasoq toorlugu qinnuteqassaatit. Immersuiffissaq qarasaasiakkut immersorniarukku nassiunniarukkulu "Immersoruk nassiullugulu" toqqaruk.

Qinnuteqaatinni ilanngussassat makku ilanngutissavatit:

• Piginnittuunermut uppernarsaat (ingerlatseqatigiiffinnuinnaq attuumassuteqarpoq)
• Angallatigisappit Søfartsstyrelsenip angallatinut nalunaarsuiffiani nalunaarsorsimaneranut uppernarsaat (qinnuteqartunut/angallatinut nutaanut taamaallaat atuuppoq)
• Nunami sorlermi najugaqarnermut uppernarsaat, tassanilu uppernarsarneqarsimassaaq angallatigisat Kalaallit Nunaanneersuusoq, ilinnillu pigineqartoq (qinnuteqartunut/angallatinut nutaanut taamaallaat atuuppoq)
• Angallatip takissusaanut uppernarsaat, tassanilu angallatip pisinnaassusaa uppernarsarneqassaaq (qinnuteqartunut/angallatinut nutaanut taamaallaat atuuppoq)
• Pisariaqarpat angallammut tunngatillugu pisinermut uppernarsaat atsiugaq, taannalu nunami sorlermi najugaqartuunermut uppernarsaataagallartutut atorneqassaaq
• Angallatip digitaliusumik qalipaatilerlugu assilineqarnera (angallatinut qinnuteqartunut nutaanut taamaallaat atuuppoq)

Aalisarsinnaanermut akuersissut aalisagaqatigiinnut ataatsinut atuuttarpoq, taamaattumillu aalisagaqatigiit aalisarusutatit ataasiakkaarlugit immikkuutaarlugit qinnutigissavatit.

Toortakkap sungaartup "Ugguuna qinnuteqarit"-mik allaqqasup toorneratigut qarasaasiakkut nammineerlutit immersuiffissamik immersuillutit aallartissaatit.

Imarpimmi aalisarsinnaanermut akuersissummut qinnuteqarusukkuit (kalallit nunaanni, nunat tamalaat imartaanni, norskit, islandimiut imaluunniit savalimmiut imartaanni) qinnuteqarnermut immersugassaq immersoqqaassavat.

Toortagaq sungaartoq "Uani qinnuteqarit" toorneratigut:

• "Immersoruk anisillugulu" toorsinnaavat, immersugassaq qarasaasiatigut immersornissaa aammalu anisinnissaa kissaatigigukku.

Qinnuteqaatinni ilanngussassat makku ilanngutissavatit:

• Piginnittuunermut uppernarsaat (ingerlatseqatigiiffinnuinnaq attuumassuteqarpoq)
• Angallatigisappit Søfartsstyrelsenip angallatinut nalunaarsuiffiani nalunaarsorsimaneranut uppernarsaat (qinnuteqartunut/angallatinut nutaanut taamaallaat atuuppoq)
• Nunami sorlermi najugaqarnermut uppernarsaat, tassanilu uppernarsarneqarsimassaaq angallatigisat Kalaallit Nunaanneersuusoq, ilinnillu pigineqartoq (qinnuteqartunut/angallatinut nutaanut taamaallaat atuuppoq)
• Angallatip takissusaanut uppernarsaat, tassanilu angallatip pisinnaassusaa uppernarsarneqassaaq (qinnuteqartunut/angallatinut nutaanut taamaallaat atuuppoq)
• Pisariaqarpat angallammut tunngatillugu pisinermut uppernarsaat atsiugaq, taannalu nunami sorlermi najugaqartuunermut uppernarsaataagallartutut atorneqassaaq
• Angallatip digitaliusumik qalipaatilerlugu assilineqarnera (angallatinut qinnuteqartunut nutaanut taamaallaat atuuppoq)

Immersugaq Aalisarnermut Piniarnermullu Naalakkersuisoqarfimmut tunniutissavat.

• Qinnuteqaatit nassiukkukku, qinnuteqaatit Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfimmit  tiguneqartutut nalunaarsorneqassaaq, qinnuteqaativillu Naalakkersuisoqarfimmit tiguneqarsimaneranut uppernarsaammik tigusaqassaatit.
• Qinnuteqarnissamut ulloq killigititaasup qaangiunneranit qinnuteqaatit Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfimmit suliarineqalissapput. Avataasiorluni aalisarnissamut qinnuteqarnissamut killiliussaq tassaavoq ulloq 1. november.
• Sulianik sullissineq naammassippat Aalisarsinnaanermut akuersissutit pisassiissutillu pillugit nalunaarut naapertorlugu Naalakkersuisut pisassiissutissat inissereerpagit taava
  
  • qinnuteqarsimasuni akuersissutinik pissarsisimasut pisassiissutissaannik tunineqarumaarput.
  • pisassiissutissanik tunineqarsimanngitsut itigartitsissummik tunngavilersukkamik nassinneqassapput.
• Qinnuteqarninnut akissuteqaat decembarip naalernerani januarilluunniit aallartisimalernerani tigujumaarpat.
• Pisassiissutit Naalakkersuisut.gl-ikkut imaluunniit tusagassiutitigut nalunaarnikkut saqqummiunneqarumaarput.

Aalisarsinnaanermut akuersissummi massakkut pigisanni paasissutissanik allanngortoqarsimappat, tamatuma Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfimmut paasissutissiissutiginissaanik pisussaaffeqarputit. Assersuutaasinnaapput ingerlatseqatigiiffiutit angallataatilluunniit pillugit allannguinerit.

Allannguutit tiguneqariarpata nutaamik akuersissusiunneqassaatit, tassanilu paasissutissat nutaat ilaatinneqassapput.

Inuussutissarsiutigalugu aalisartutut paasissutissat eqqortut tunngavigalugit aalisarnermik ingerlatannut akuersissummik atuuttumik peqarnissat akisussaaffigivat.

Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfimmit aalajangiussaq Aalisarnermut, Piniarnermut, Nunalerinermut, Imminullu Pilersornermut Naalakkersuisoqarfimmut naammagittaalliutiginissaanut periarfissaqanngilaq.