Saattussanik inuussutissarsiutigalugu aalisarniaruit aalisarsinnaanermut akuersissummik peqartariaqarputit.
Saattuarniarnermi immikkut piumasaqaatit maleruagassallu quppernermi uani atuarsinnaavatit. Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit. Tamatumalu saniatigut ileqqoreqqusat kommunerisannut immikkut atuutsinneqartut soorlu sumiiffiit eqqissisimatitat illersorneqarnissaannut tunngasut malinneqartussaapput. Kommunini ileqqoreqqusat pillugit inatsisit.gl-imi atuarsinnaavatit.
Inuussutissarsiutigalugu aalisartutut nalunaaruteqartarnissamik pisussaaffeqarputit. Pisatit pisarisuukkatillu nalunaarutigisartussaavatit. Saniatigut pisarisuukkat tunineqarsinnaanngitsut tassaapput aalisakkat, timmissat, miluumasut imarmiut, pupiit koral-illu.
Saattussanik aqitsunik qalerualinnik aalisarnermi saniatigut pisarisuukkat aamma nalunaarutigineqartussaapput. Saattussanik aqitsunik qalerualinnik aalisarnermi saniatigut pisarisuukkat pisassiissutinit ilanngaatigineqarneq ajorput. Pisarineqartuni saattussat aqitsunik qaleruallit 20 %-init sinneqarpata aalisarneq allamut nuunneqassaaq.
Pinngortitap eriagineqarnissaanut nammineerlutit akisussaaffeqarputittaaq. Imaq ataatsimoorluta isumalluutigaarput ataatsimoorlutalu aamma akisussaaffigalutigu.
Saattuarniarneq aqutsiveqarfinnut agguagaavoq. Aqutsiveqarfiit tamarmik immikkut pisassiiffigineqartarput. Aalisarneq PNNP (pisassiissutit niuverutigineqarsinnaasut nammineq pigisat) atorlugit ingerlanneqarpoq. Pisassiiviusumi pisassiissutit tamarmik aalisarneqarneqareeraangata aalisarneq unitsinneqartarpoq.
Saattuarniarneq aqutsinermut pilersaarut malillugu ingerlanneqarpoq.
Kitaani saattussanut aqutsinissamik pilersaarut atuarniarukku una tooruk
Pinngortitaleriffiup saattussat aqittunik qaleruallit pillugit isiginnaagassiaaraliaa uani takusinnaavat.
Saattuarniarneq sumiiffinni angisuujusuni, tassa sinerissamut qanittumi aamma avataani killeqarfiit atorunnaarsinnaqarput.
Saattuarniarneq aqutsiveqarfinnut arfinilinnut agguagaavoq. Sumiiffiit arfineq pingasuusut ilaanni aalisarnissamut akuersissut pillugu qinnuteqarsinnaavutit.
• Upernavik (aqutsiveqarfik 37-IOK)
• Qeqertarsuup Tunua - Uummannaq (aqutsiveqarfik 36-IOK)
• Sisimiut, sinerissap qanittuani (aqutsiveqarfik 32-IOK)
• Sisimiut, avataasiorluni (aqutsiveqarfik 32-IOK)
• Maniitsoq - Kangaamiut (aqutsiveqarfik 31-IOK)
• Nuuk – Paamiut, sinerissap qanittuani (aqutsiveqarfik 30-IOK)
• Nuuk – Paamiut, avataasiorluni (aqutsiveqarfik 30-IOK)
• Narsaq – Qaqortoq (aqutsiveqarfik 29-IOK)
Malugiuk: Saattuarniartunut ilanngukkusukkaanni pisassiissutinit pigisanik pisisoqassaaq.
Saattuarniarnermi aqutsiveqarfinni piffissaq aalisarfiusartoq assigiinneq ajorpoq:
1. januar - 31. december:
• Narsaq – Qaqortoq
• Nuuk – Paamiut
• Maniitsoq – Kangaamiut
1. april – 31. december:
• Sisimiut
• Qeqertarsuup Tunua
• Upernavik
Saattuarniarnermi aalisaatit makku atorneqarnissaat piumasaqaataavoq:
• Pullatit atorlugit taamaallaat saattuarniarsinnaavutit.
• Pullatini affarmik nigartanut nigartat minnerpaaffissaat tassaavoq 70 mm.
• Pullatit amerlanerpaamik 50-it siaarlugit ningissinnaavatit.
• Pullataatitit atorneqanngikkaangata imaani uninngateqqusaanngillat.
• Pullatigisanni "qimaaffissaq" atortussaavat.
• Aalisarnermi atortut piginnittup aqqanik/imaluunniit angallatip aqqanik ersarissumik nalunaaqutserneqarsimassapput. Nalunaaqutsiussat imermit arrortinneqarsinnaassanngillat.
• Aalisarnermut atortut atorneqareernerisa kingorna peerneqartarnissaat illit nammineerlutit akisussaaffigaat. Aalisarnermut atortutit nalunaaquttap akunneri 24-t iluanni qaqissinnaassanngikkukkit tamanna KANUAANA-mut nalunaarutigissavat. Aalisarnermi atorunik 3 sømilimik killeqarfiup iluani annaasimagukkit taakku kommunimut nalunaarutigissavatittaaq.
"Qimaaffissaq" pillugu piumasaqaat
"Qimaaffissap" ilinnit atorneqarnissaa piumasaqaataavoq, taannalu allunaasaavoq arrortinneqarsinnaasoq, taannalu pullammi qimaaffissaliorniarluni saattussanut pullammut ikkunneqartussaavoq, taassumalu imaani uninngaannarluni pisaqaannartarnissaa tassuuna pinngitsoortinneqarsinnaavoq. Imaani piniutit qaqinneqaratit uninngaannartunik pisaqartarnermi aalisakkanut atortuutit annaaneqaraangata qimaannarneqaraangatalu, pisallu qaqinneqarsimatinnagit aalisaannalertarnerat pineqarpoq.
Saattussanut pullatitit tamaasa qimaaffissamik minnerpaamik ataatsimik ikkussiffigissavatit, taannalu allunaasaq bomuldiusoq ikiorsiullugu matoqqatinneqassaaq. Allunaasaq bomuldiusoq nigartat affaannut arfinilinnut ikkunneqassaaq.
Bomuldimik allunaasaaraq atorneqartoq allunaasaaqqani amerlanerpaanik 96-inut nigartaqartinneqassaaq.
Affarmik nigartani allunaasaq bomuldiusoq qanoq inississanerit uani takutinneqarpoq:
Asseq: KANUAPNA