Eqalunniarneq

Eqaluk aalisagaanngilaq niuerutigineqarsinnaasoq, taassuminngalu aalisarniaraanni kikkut tamarmik Kalaallit Nunaanni aalajangersimasumik najugallit aalisarsinnaatitaapput.  Inuussutissarsiutigalugu piniarsinnaanermut allagartaqaruit kalaalimineerniarfimmut eqalunnik tunisisinnaavutit.  
Inuussutissarsiutigalugu aalisartutut aalisarnermut malittarisassat piumasaqaatillu aalajangersarneqarsimasut malinnissaannut pisussaaffeqarputit. Tamatuma saniatigut maleruaqqusat kommunerisannut atuutsinneqartut soorlu sumiiffiit eqqissisimatitat illersorneqarnissaannut tunngasut malinneqartussaapput.

Inuussutissarsiutigalugu piniarnermut uppernarsaatimik qinnuteqarniaruit una tooruk

Uku taamaallaat atorlugit eqalunniarsinnaavutit:

• Qarsorsat sukisaarsaatigalugu aalisarnermut atorneqartartut
• Qalut naatsunnguamik ipullit qassutillu nigartunerat tasillugit minnerpaamik 100 mm-usut

Qassutinik atuiniaruit makku aamma atuupput:

• Qassutit meterinit 30-nit takinerussanngillat
• Aalisarnermut atortuutit piginnittup aqqanik aamma/imaluunniit angallatip aqqanik ersarissumik ilisarnaaserneqarsimassapput. Nalunaaqutsiussat imermit arrortinneqarsinnaassanngillat.
• Qassutit ningeqqatillugit tamatigut nakkutigisassavatit. 
• Aalisarnermut atortut atorneqareernerisa kingorna peerneqarnissaat illit nammineerlutit akisussaaffigivat. Aalisarnermut atortutit nalunaaquttap akunneri 24-t iluanni qaqissinnaassanngikkukkit tamanna KANUAANA-mut nalunaarutigissavat. Aalisarnermut atortunik 3 sømilimik killeqarfiup iluani annaasaqarsimaguit taakku kommunimut nalunaarutigissavatittaaq.

Aalisarfigineqartoq qimakkukku illit qassutinik piginnittutut qaqittussaavatit.

Qassutinik aalisartillutit malittarisassat tullinnguuttut malittussaavatit:

• Kuunni taakkualu tasinngortaanni qassusersorluni eqalunniarneq tamarmi inerteqqutaavoq.
• Tatsini eqalunniarnermi kuuit tatsimut akuaniit kuuillu aariaanniit 100 m-init qaninnerusumut qassuserneq inerteqqutaavoq.
• Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat.
• Kuup naaffianit sammiviit arlaanni 150 meterimit qaninnerusumi qassusersorneq inerteqqutaavoq
• Qassutit timaatungaat ulinnerani immap angusagaanut attuumasunngorlugit nivinngarneqartassapput.
• Qassutit sinerissamiit sinerissamut ikertussusiata pingajorarterutaa sinnerlugu takissuseqassanngillat.
• Qassutit narlusuumik nunamiit avammoorlugit nivinngarneqassapput. Pisaqarujussuarnissaq siunertaralugu qassutit allatut ilusilerlugit nivinngarnissaat inerteqqutaavoq.
• Qassutit eqalunniutit qassutinut tullernut minnerpaamik 30 meterinik akunnilerlugit nivinngarneqartassapput.

Ujaqqanik sapusiat atorlugit eqalunniarsimagaanni eqalunniarfik qimatsinnagu saputit ingerlaarfeqalerlugit ammarneqassapput.

• Inuussutissarsiutigalugu piniarnermut allagartaq